Rơcăng drơng jơnau kờñ blơi prăp phan Sa tềp ai cau ngui sa in, Kông ty Bơcri priă bal Ƀañ mư̆t kèo Hà Nội (Hanobaco) neh rơcăng phan Sa tềp nam 2025 bơh gùl nam lài. Jăt mờ hơ̆, khà phan bè mư̆t sa tềp, ƀañ kèu sa tềp…gơguh 10%, bal mờ mờr 350 tấn mư̆t, 100 tấn ƀañ kèu. Lòt bal mờ cau ngui sa, mpồl lơh broă do tăc uă phan bơna drơng jơnau kờñ Sa tềp bal mờ phan bơna niam mờ giă dipal, rùp să muh măt li la. Ồng Lê Ngọc Huy, Lam bồ Cơldŭ Kă bro, Kông ty Bơcri priă bal Bañ mư̆t kèu Hà Nội pà gĭt, tàm ală tŭ lơh sa, kông ty sùm lơh jăt kràñ ngan ală jơnau sồr niam sàng goh phan sa nàng kờñ cèng tus bơta niam ngan rlau jơh ai cau ngui sa in. Bal mờ hơ̆, phan bơna drơng Sa tềp in geh mpồl lơh sa kă bro sền gròi bơta ƀô bơkah bơh ală kơnhoàl ù tiah ƀòn lơgar dê: “Bol hi geh ală phan bơna gơcèng bơta pa rlau halà tàm bơtờp bal bơh pe kơnhoàl ù tiah ƀòn lơgar dê. Hơ̆ là ală hồp mư̆t mờ bol hi ai tơmŭt tàm ală phan bơna jơh bal pe tiah Đah Tô- Tàm gùl mờ Đah Jum dà lơgar dê ală bơta mư̆t geh 12 bơta ƀô bơkah; bal mờ ală bơta ƀô bơkah ờs mờng bơh yau, bè: khoah phòng, ca, kơ rốt…den geh tai bal ală bơta ƀô bơkah bè plai lò, mãng kầu, pơnăt, sầu riêng…Jăt mờ hơ̆, kơ̆p kờñ cèng wơl bơta li la ai cau ngui sa in, kung bè là bơta li la ai phan bơna in nàng cau ngui sa geh tai săc rwah”.

Tơngai do, uă mpồl lơh sa kă bro tàm broă phan sa geh gar, phan sa kung rơcăng wil tơl anih tăc phan, khà phan uă drơng jơnau kờñ blơi prăp Sa tềp làng bol dê. Ồng Trương Mạnh Linh, Kwang Lam bồ Đơng lam lơh jăt Gah phe bơh Tập đoàn Tân Long dê pà gĭt, tơngai dop neh bềng ală sră blơi phan qúy I nam 2025 dê. Bal mờ tăc mờ lơgar ndai, mpồl lơh sa kă bro neh rơcăng dồ khà phe uă nàng drơng Sa tềp bơhiàn, mờ khà phe kung gam gơguh sùm jăt pah nam mờ neh geh broă rơndăp lơh ơn prăp sền gàr bơta niam niam ngan rlau jơh drơng cau ngui sa wă rò nam pa Sa tềp Ất Tỵ 2025 in: “Bol hi sùm sùm crăp rơcăng ơn prăp ală phan ngui nàng lơh phan nàng kờñ lơh geh jơnau kờñ bơh tàm lơgar dê, bơh broă pơr mờ ơn prăp phe tàm tiah prăp gàr niam, nàng gàr niam geh bơta niam phe mờ gàr geh bơta niam jŏ ngan rlau jơh ai drà tàm lơgar in, gàr niam drơng jơnau kờñ tàm dơ̆ Sa tềp”.

Nàng kờñ drơng niam ngan rlau jơh kàl blơi prăp phan dờng ngan tàm nam, ală mpồl tăc phan sa kờñ pal geh kung neh sir broă rơndăp lơh lơh gơlik bè bơta phan. Ală mpồl lơh broă tăc bro, lơh gơlik phan bơna kờñ pal geh rơcăng tàm tơrbŏ, jòi phan lơh geh bơh sươn sre, phan sa, ală bơta phan pơnrơ is bơh yau bơh ală càr dê, lơh rơ̆ ru bơta phan (ai lài gơ wèt mờ phan Việt Nam) drơng jơnau kờñ drà tàm dơ̆ lồi sơnam in, dơ̆ lài mờ tàm, mờ tơnơ̆ Sa tềp bơhiàn dà lơgar dê. Ồng Trương Sỹ Bá, Củ tịc Mpồl duh broă Ătbồ broă lơh Kông ty Bơcri priă bal Broă lơh sa sươn sre BAF Việt Nam pà gĭt, gơ wèt mờ bơta phan puăc sur mpồl lơh sa kă bro geh bơta rơcăng lài nền nòn ngan, tơngguh dơ̆ ròng gờñ nàng kờñ lơh geh jơnau kờñ bơh cau ngui sa dê tàm dơ̆ Sa tềp bơhiàn nam 2025: “Sa tềp nam do, bol hi digơlan tăc tàm drà 1 tơlak 100 rbô nơm tus 1 tơlak 200 rbô nơm sur, mờ khà sur kơn jơ̆ tus bàr dơ̆. Bal mờ bơta tơngguh dơ̆ ròng pràn kơldang bơh mpồl lơh sa kă bro dê bal mờ ală kông ty ròng siam ndai tai, rơ̆p pơgồp bơnah tơngguh khà sur tăc tàm drà…Bơh hơ̆ den gơtùi lơm lơh geh jơnau kờñ bơh cau ngui sa dê”.

Jăt mò Nguyễn Kiều Oanh, Phó Kwang Lam bồ Sở Lơh sa mờ măy mŏk mờ Kă bro phan ƀòn dờng Hà Nội dê yal, dơ̆ Sa tềp do ƀòn dờng neh geh bơta rơcăng lài gàr tơl ală anih lơh gơlik phan, kung bè ală bơta phan lơh geh bơta niam drơng làng bol tàm ù tiah ƀòn dờng- bơh lài mờ ngai Sa tềp bơhiàn dà lơgar dê 3 nhai. Bal mờ hơ̆, lam lơh uă anih tăc phan geh wil tơl phan bơna, giă ờ gơguh drơng làng bol in; lam lơh ală broă lơh tăc pà phan nàng gơhòi gơ jà cau ngui sa, ờ lời jơh phan, ờ tơl phan lơh giă gơtìp lơh tơngguh uă: “Bol hi kung neh lơh broă mờ ală gah tăc bro ală cau kă bro kung bè ală hìu bơnhă kă bro dềt rah rài, ală drà bơh yau nàng gĭt geh jơnau kờñ kung bè là ală phan drơng lơh geh jơnau kờñ bơh làng bol dê tàm dơ̆ Sa tềp nam do. Bol hi kung đơs ngan là rơ̆p lơh niam kơnòl broă he dê nàng ờ lời ờ tơl ir phan bơna kung bè ală phan bơna tăc tàm drà Hà Nội ndrờm lơh geh bơta niam”.

Nàng kờñ tàm pơnring tăc mờ blơi ală bơta phan kờñ pal geh, gàr niam drà kă bro dơ̆ Sa tềp bơhiàn nam Ất Tỵ 2025; Ƀộ Lơh sa mờ măy mŏk mờ Kă bro phan sồr Sở Lơh sa mờ măy mŏk mờ Kă bro phan ală càr, ƀòn dờng tàm jơh gùt lơgar jăt niam jơnau gơlik geh tàm drà kă bro, jơnau kờñ tăc mờ blơi ală bơta phan kờñ pal geh, rơcăng lài geh gùng dà halà dan mờ ală anih lơh broă geh gơnoar broă lơh nàng kờñ tàm pơnring niam drà kă bro, bañ lời gơlik geh jơnau ờ tơl phan, gơkòl phan kă bro lơh gơguh giă nisơna tàm dơ̆ lồi sơnam mờ Sa tềp bơhiàn dà lơgar dê.

Bal mờ hơ̆, rơcăng lài ală phan, ơn prăp phan kă bro kờñ pal geh drơng Sa tềp in; lam lơh ală broă lơh gàr niam drà kă bro jăt jơnau sồr bơh kơrnoăt boh lam dê. Mơkung lơh pràn lam lơh ală broă lơh lơh jăt Dơ̆ lam sồr “Cau Việt Nam ngui sa lài phan Việt Nam”, Broă lơh jun phan Việt Nam rê tus ƀòn lơgar, rê tus tiah, anih tơrgùm lơh sa mờ măy mŏk pơgồp bal mờ ală broă lơh pơrjum drà, tăc pà phan, tơrmù giă, lơh gơhòi gơ jà cau ngui sa. Tơngguh tai broă lơh lòt sền, jăt sền drà kă bro, sền gròi sền swì bè giă, bơta niam phan bơna, ală jơnau sồr bè niam sàng goh phan sa, ală broă lơi blơi tơrgùm uă ơm kơ̆p gơguh giă, prăp dram phan, tơngguh giă ờ dipal.