Bơh bơta lơh ngan jơh nùs, brồ guh lơh pas tơn tàm bă ù ƀòn lơgar tờm, tơnơ̆ tŭ tơngai kơlôi sơnơng, bal mờ bơta hòi jà pơn jờng bơh kâp ủy, gơnoar ătbồ tiah do dê, bi Y Hưng Niê, đảng viên Ci ƀộ ƀòn Trấp, xã Ea Hđing, kơnhoàl Cư Mgar, càr Dăk Lăk neh khin cha lơh Mpồl lơh bal (Hợp tak xã) lơh broă sa sươn sre dơng broă kă bro phan xã Ea Hđing. Mŭt tàm mpồl lơh bal là ală ơruh pơnu đoàn, ơruh pơnu tơryăng tơryồng, jơh nùs jơh tồr kờñ lùp bơsram, đòm jăt mờ ngui bơta gơguh jak tàm lơh sa. Tơnơ̆ rlau 03 nam lơh, tus tŭ do, mpồl lơh bal neh bơtòm tơrgùm geh 25 nă cau ngan ngồn tàm mpồl mờ rlau 500 nă cau lơh bal. Uă broă lơh tơrlòng lài pa, broă lơh niam neh cèng wơl bơta kwơ lơh sa uă. Bi Y Hưng Niê pà gĭt, bal mờ ală broă lơh tơrlòng lài, bè: ròng be krơ̆ tàm wàng, tam kòi mìr, lơh kơphê, tiêu, sầu riêng kơ̆ kơl jăp, pah nam, tơl hìu mŭt bal tàm mpồl lơh bal lơh geh priă cồng bơh 50 tơlak tus 1 tơmàn đong. Bi Y Hưng Niê, đơs: Broă bơtàu tơnguh lơh sa bơh xã dê kwơmàng ngan, is ồn là lơh sa bal, bơtàu tơnguh tam phan, ròng phan, lòt nhơl ƀòn brê bơnơm mpồl bơtiàn. Kơ̆p kờñ là he rơ̆p dong kờl ai cau tàm mpồl in bơtàu tơngguh ală broă lơh tơrlòng lài geh kwơ ngan rlau jơh ai să tờm cau tàm mpồl mờ ƀòn lơgar in. Dờng màng rlau tai là mpồl lơh bal geh dùl ci ƀộ gơ wèt đảng ƀộ xã Ea Hđing nàng pơlam gùng tai dong làng bol bơtàu tơngguh tai.

Khin cha, khin kơlôi, khin lơh là jơnau đơs bơh uă làng bol thị trấn Quảng Phú, kơnhoàl Cư Mgar, càr Dăk Lăk dê lời ai bi Dương Văn Ngọc in, dồ nă đảng viên pa, pơnrơ tàm ală srơh tàm pơrlòng lơh sa. Bi Ngọc pà gĭt: sền gŏ jơnau ngui sa sồr ngai sơlơ uă bè bơta niam, nam 2019, bi neh tam gơl 4 lồ kơphê kra jŏ sơnam nàng lời wơl ù tam tờm sầu riêng jăt gùng dà ờ ngui phơng hoá họk, ờ ngui sơnơm sền gàr phan tam, pơgồp bal ală ding tuh dà tềm pềr. Tus tŭ do, broă lơh tơrlòng lài tam sầu riêng jăt gùng dà ờ ngui phơng hoá họk mờ ngui sơnơm sền gàr phan tam bơh bi dê bơh sơnrờp đơs nền bơta cồng nha tŭ priă ai bơcri lơh sa in gơmù rlau 20, mơya cồng nha mờ bơta niam lơh geh gơguh wơl tus mờr bàr dơ̆. Broă lơh tơrlòng lài gam geh ală hìu làng bol gùt dar lòt còp, lùp bơsram, rề ơnàng lơh uă. Jăt bi Dương Văn Ngọc đơs, là đảng viên he pal jơh nùs lam lài tàm ală srơh, lơh krơh lơh lài, nàng làng bol ƀòn lơgar pin dờn mờ lơh jăt. Bi Dương Văn Ngọc, đơs: Tŭ he lơh geh ală broă lơh gah Đoàn, gah Đảng den he lùp bơsram ală broă lơh tơrlòng lài niam, broă lơh tơrlòng lài geh cồng nha bơh hơ̆ he ngui ai hìu bơnhă he dê in lơh cồng nha rlau. Tàm tơngai tus, he rơ̆p pơnđơl pràn rơndăp tăp sèng ring bal broă hìu bơnhă mờ ală srơh tus bal nàng lơh sir rlau.

Ờ mìng lam lài tàm bơtàu tơngguh lơh sa hìu bơnhă, ală đảng viên geh rài kis tơl ngui tơl sa rlau gam tus bal tàm broă tă pơgồp priă, lơh geh kes priă ai ală hìu kal ke in càn tàm pơdar ờ sa priă cồng. Bơh priă jền do, uă hìu bơnhă neh iang nùs bơcri priă lơh sa, sơrlèt kal ke, klàs bơh rƀah brồ guh. Tàm sơnah ƀòn Đoàn Kết, thị xã Buôn Hồ, càr Dăk Lăk, ồng Hà Ngọc Cẩn, đảng viên Ci ƀộ Mpồl làng bol tiah drà 2, là dùl tàm ală đảng viên tus bal lơh broă do. Ồng Cẩn pà gĭt, bulah priă tă pơgồp ờ uă, mơya bal mờ nùs nhơm “Tàm dong tàm kờñ gơboh bal”, ală đảng viên bè ồng kơ̆p kờñ dồ bơnah lơi pơn jờng ală hìu bơnhă rƀah brồ guh tàm rài kis. Ồng Cẩn, đơs: Tàm do, làng bol đơs bal là lơh broă sa sươn sre geh hìu geh priă jền tơm tơn, geh hìu cau blơi lèng nàng hơ̆ sồng tus kàl tơnhàu sir jơh den hơ̆ sồng geh priă tăc phan bơna, cau hơ̆ sồng tơm. Den tàng bè hơ̆, gŏ làng bol kal ke tàm bơta hơ̆ den kung bơcri ai làng bol in mơya ờ sa priă cồng.

Bơh ală krơh pơnrơ pa yal pà gŏ, uă đảng viên tàm càr Dăk Lăk neh lơh jăt niam gơnoar broă lam lài lơh krơh, gơgơs là ală kwang bàng jak, ală làng bol lơh krơh, pơnrơ ngan tàm lơh broă lơh sa, tơn jơh jơgloh, tơrmù rƀah, bal mờ gơ̆p bơ̆t bơtàu ƀòn lơgar tờm ngai sơlơ pas sơm niam bơnĕ.