Ntào tàm gùl suơn tam tiêu gam hòn tơlir niam, tềng tiah jơng là ñhơ̆t kung gam hòn tơlir niam, bi Nguyễn Văn Tú, kis tàm xã Trường Xuân, kơnhoàl Dăk Song pà git, lơh sa suơn sre hữu kơ dong kờl bi ờ mìng gàr niam bơta pràn kơl dang să jan, mờ gam geh cồng nha lơh sa loh làng ngan. “Lài do lơh broă ngui uă sơnơm tu, den tàng gơtìp uă bơta khih ngan. Tŭ do neh tam gơl den añ ờ ngui sơnơm tu, sơnơm gơsơ̆t ñhơ̆t tai, mìng ngui phơng rơpu, kơnrồ bal mờ phơng vi sinh. Tơnơ̆ mờ hơ̆, jăt Hợp ták xã Trường Xuân lơh tiêu hữu kơ tai mờ lơh broă bal mờ Hoàng Nguyên tàm xã Nâm Njang tai, den phan geh lơh hữu kơ tŭ do neh tăc tus ală lơgar Nhờk, Mỹ, câu Âu. Khà priă tăc den sùm geh uă rơlao mờ drà kă bro, tŭ do 120 rơbô đong tàm 1 kĭ, tŭ lài là bơh 160 tus 180 rơbô đong”.

Lam lài tàm broă lơh gơs phan lơh geh bơh broă lơh sa suơn sre hữu kơ tàm xã Trường Xuân, Hợp ták xã phan geh lơh bơh broă lơh sa suơn sre hữu kơ Bechamp Dăk Nông tŭ do neh tơnguh bơtàu geh 20 nă cau, mờ kờp jơh bă ù rơlao 70 lồ tam tiêu, kơphe. Phan geh lơh bơh Hợp ták xã mìng geh drơng nàng tăc mờ ală lơgar bè tàm câu Âu, lơgar Nhờk. Kwang atbồ Hợp ták xã ồng Lê Đình Hùng pà git, jơnau kờñ drà kă bro uă ngan, mơya hợp ták xã ờ tơl phan nàng tăc mờ ală pang sră dan blơi geh uă ngan. Rề ơnàng tiah tam, bơh bồ nam tus tŭ do, Hợp ták xã neh bơyai lơh pờ 6 ơdŭ bơto bè kỹ thuật tam phan hữu kơ ai ală cau tàm mpồl bal mờ làng bol lơh broă sa tàm xã Trường Xuân in. Lơh sa hữu kơ ờ kal ke, mơya làng bol lơh broă sa pal geh tơngai nàng tam gơl broă tam phan jăt broă lơh lài do. Ồng Lê Đình Hùng đơs loh rơlao: “Ù tiah niam, phan tam hòn gơs niam là ờ geh gơtờp kòp. Den gùng dà broă lơh bơh Hợp ták xã là geh pờ ơnàng ală cau tàm mpồl lơh bal. Bơdìh hơ̆ tai, bol añ geh lam sồr làng bol nàng tơmù ờ uă ngan phơng hoá họk, mờ ngui ală phan siồ siă neh geh lài tàm suơn jơm gơs phơng sih nàng lơh ù mƀùr niam. Bol añ kung kơnờm mờ gơnoar atbồ ƀòn lơgar bal mờ ală kông ty tăc mờ lơugar bơdìh tiêu pờ ală ơdŭ cri bơyai, bơto ai làng bol in git tàm broă tam phan jăt broă lơh hữu kơ, tơn jơh broă tam phan neh ờ geh cồng nha, dong kờl làng bol git ngui broă tam phan pa di pal ai tiêu in hòn gơs niam kơl jăp”.

Jăt ồng Phạm Tuấn Anh, Kwang atbồ Sở Nông nghiệp mờ Phát triển Nông thôn càr Dăk Nông yal, ờ mìng tiêu, broă lơh phan geh lơh bơh broă lơh sa suơn sre jăt ală jơnau kờñ geh dờp là gùng dà tơnguh bơtàu lơh sa suơn sre kơl jăp càr dê. Tŭ do càr Dăk Nông neh lơh gơs dùl tiah lơh sa suơn sre ngui kông nghệ kao (ơnàng 120 lồ) mờ 4 tiah lơh sa suơn sre ngui kông nghệ kao (kờp jơh bă ù ơnàng mờr 2 rơbô 500 lồ). Neh geh rơlao 25 rơbô lồ phan tam ală bơta geh tam jăt ală jơnau kờñ geh dờp bè VietGAP, 4C, UTZ... Ală tiah tàm càr kung rơhời lơh gơs broă pơgồp bal đah làng bol lơh broă sa mờ ală hợp ták xã, mpồl lơh sa kă bro. Phan geh lơh bơh broă lơh sa suơn sre càr Dăk Nông neh tăc tus 35 lơgar, kơnhoàl ù tiah, mờ khà priă tăc phan gơguh sùm, geh di pơgăp 800 tơlăk dolar Mỹ pah nam.

Bŭ lah bè hơ̆, gah lơh sa suơn sre càr dê kung gam ờ hềt ngui jơh bơta pràn, bơta kwơ uă bè trồ tiah, ù tiah... Ồng Phạm Tuấn Anh đơs là, pơgồp bal lơh gơs tiah tam phan tơl pràn tàm pơrlòng tàm drà kă bro là dùl tàm ală broă lơh càr Dăk Nông gam lơh jăt nàng tơnguh bơtàu lơh sa suơn sre kơl jăp: “Lơh gơs ală tiah tam phan tàm tơngu me pơgồp bal mờ làng bol lơh broă sa, ală hìu làng bol bơh ală mpồl lơh broă bal, hợp ták xã. Bơh hợp ták xã den he hơ̆ sồng geh tơl bơta niam nàng hòi jà bơcri priă, bơyai lơh sa geh bơta dờp, geh ai mã tiah tam mờ ală broă lơh gơrềng bal. Gah lơh sa suơn sre bol añ gam dan mờ UɃÑZ càr geh ală broă lơh nàng tus nam 2025 jơh ală gah phan kă bro pal lơh gơs ală tiah lơh sa tơrgùm bal bơh ală hợp ták xã mờ tơrbŏ bal geh mờ ală mpồl lơh sa kă bro blơi, lơh drơng tàm broă tăc phan mờ lơgar bơdìh”.