Rơlao 800 lồ brê nho tàm bă brê koèl kơh Mang Yang geh tam bơh 10 tus 20 nam lài, tŭ do là bă brê kwơ màng tiah do dê. Mơya, tàm bơta trồ prang duh jŏ ngai, tăp nha nho ro tơrgùm tàm tiah brê gơs phan ƀuơn gơtìp ồs sa. Mìng kờñ dùl broă lơh ờ thàn mƀrơs măt ngan, bơta di gơlan gơtìp ồs sa rề tàm bă brê dờng ơnàng là geh ngan. tềng đăp mờ bơta do, broă lòt sền, gàr brê geh lơh sùm. Ală mpồl dờp sền gàr brê sùm pơdar bal lòt sền tơl bă brê, tàm hơ̆ uă ngan là ală tiah di gơlan gơtìp ồs sa uă. Ồng Phạm Đức Mạnh, mpồl dờp sền gàr brê thôn 9, sàh Đăk Pơ pà git: “Mpồl dờp sền gàr brê bơh bol añ dê den ngai lơi kung geh sồr oh mi lòt sền tàm tiah brê bơh mpồl dờp sền gàr. Di lah gŏ ồs sa den bol añ mhar yal Mpồl atbồ brê in”.

Bal mờ broă lòt sền, broă tơnguh jơnau git wă bơh làng bol kis rềp mờ brê kung geh sền gròi ngan. Ală dơ̆ mblàng yal geh bơyai lơh sùm, nting bơto làng bol tàm broă ngui ồs niam tàm rài kis mờ lơh broă. Ồng Nguyễn Uyên Danh, mpồl 8, sàh Đăk Pơ pà git: “Sùm mblàng yal, nting bơto làng bol là pal rơcang kơrian ồs sa nền nòn ngan. Dơ̆ bàr là mblàng yal nàng oh kòn hờ bơdìh, tŭ lòt ê kơnrồ là bañ chu ồs, pleh mờ bơta ồs sa phan tam mờ lơh ồs sarề tàm brê bol añ atbồ”.

Broă tơnguh, lơh tơl ală gùng dà broă rơcang kơrian ồs sa brê kung gam geh lơh niam tơn tàm ală mpồl cau tờm brê tàm càr Gia Lai dê. Ồng Lê Thái Hùng, Kwang lam bồ Mpồl Atbồ brê rơcang gàr bồ tô dà Bắc An Khê pà git, Mpồl sồr rơcang kơrian ồs sa brê tàm ƀòn lơgar neh geh lơh tơl, bal mờ 4 mpồl dờp sền gàr mờ rơlao 100 nă cau sùm crăp rơcang tus drơng. Broă mus chi che, wàs chi nàng lơh gùng kơrian ồs geh lơh nàng tơrmù phan gơtìp ồs sa tàm brê. “Tàm broă mus chi che jăt gah brê den mpồl lơh broă ndrờm geh broă pơgồp bal nền nòn mờ Mpồl sền gàr brê tàm tiah An Khê kung bè Anih duh broă Làng bol sàh Đăk Pơ. Lài mờ tŭ bơyai lơh mus wàs chi che, tàm hơ̆ uă ngan là tàm ală tŭ trồ mho den bol añ ndrờm tŏp jơnau yal tềng jơng koèl kơh mờ hờ đang bồ koèl kơh Mang Yang. Mờ yal Anih duh broă Làng bol sàh bal mờ mpồl sền gàr brê in git nàng pơgồp bal, lòt sền”.

Tàm ală tiah tờm, mpồl sền gàr brê geh sùm broă sền gàr 100% khà cau lơh broă tàm tơngai jơh kàl prang, mờ tơnguh broă jăt sền tàm ală tiah, git nền nòn tơl tiah, tơl hìu làng bol. Ồng Ngô Hữu Niên, Lam bồ mpồl Sền gàr brê tiah Tây Sơn pà git, mpồl do atbồ rơlao 41 rơbô lồ brê gam geh kấp yal lài ồs sa brê ngòt rơngơ̆t ngan, broă jăt sền geh lơh sùm. “Sền gàr sùm mờ khà 100% cau lơh broă tàm ală tiah, tơrgùm tàm tiah brê tam mờ mpồl chi che jăt gah brê 2, 3 nam tus tàm tŭ geh kơl chi. Ală bă brê hơ̆ neh wàng se, di gơlan gơtìp ồs sa brê. Bơnah lơh broă mìng gah do pal nggui sền gàr măi lơh broă nàng sền tiah di gơlan gơtìp ồs sa hơ̆, tŭ vệ tiñ pờ tơlik mờ yal tus tàm pang rùp den mpồl lơh broă pal lòt sền mơ nàng git gơtìp ồs sa ha là cau chu jăt gah brê nàng yal mơ”.

Tơnơ̆ mờ tŭ tơmŭt bal mờ càr Bình Định, càr Gia Lai geh 987 rơbô lồ ù geh brê, khà tìm chi brê tus rơlao 45%. Bă ù geh atbồ gơguh tàm tŭ mpồl lơh broă sền gàr brê gam ờ gal, lơh gơtìp kal ke uă ngan tus mờ broă sền gàr mờ rơcang kơrian ồs sa brê. Ồng Phan Văn Hải, Lam bồ phó Ci Kụk Sền gàr brê càr Gia Lai pà git, nàng rơcang kơrian broă di gơlan gơtìp ồs sa brê, mpồl do gam sền wơl jơh, tam pà ală tiah di gơlan gơtìp ồs sa jăt mờ tơl tŭ, tàm hơ̆ uă ngan là tàm brê hòn is, tiah rềp mờ ală tiah di gơlan gơtìp ồs sa uă tàm kàl prang. Tàm tơngu me hơ̆, mpồl sền gàr brê geh ntrờn kwang bàng tàm ală tiah nàng tơnguh ai tàm ală “tiah di gơlan gơtìp ồs sa uă”. Bal mờ hơ̆, mpồl sền gàr brê tơnguh broă lòt sền, ơm gàr tàm tiah di gơlan gơtìp ồs sa uă; pơgồp bal mờ gơnoar atbồ ƀòn lơgar, cau tờm brê mờ làng bol nàng gŏ gờñ, bơsong di tŭ ală bơta di gơlan lơh gơtìp ồs sa. 

Ồng Phan Văn Hải, pà git: “Mpồl sền gàr brê neh dan mờ Sờh broă lơh sa suơn sre mờ Tiah ơm kis, Anih duh broă Làng bol càr Gia Lai nàng lơh sir broă bơyai lơh, mpồl lơh broă, tam pà mpồl ală mpồl lơh broă sền gàr brê tàm tiah sùm tơnguh broă mblàng yal, lam sồr làng bol tàm broă rơcang kơrian ồs sa brê. Ală tiah lơh jăt niam gùng dà broă lơh 4 tàm tiah tơn nàng rơcang kơrian lài là lơh tờm ngan, tŭ gŏ ồs sa den jal mhar di tŭ bal mờ ală mpồl lơh broă tàm hơ̆ tơn nàng pù ồs sa di tŭ, pleh mờ ồs sa rề, ồs sa dờng”.

Tàm bơta trồ tiah tơngai duh jŏ, mờr 1 tơlăk lồ brê tàm càr Gia Lai sùm kong gơtìp mờ broă di gơlan ồs sa brê tàm khà uă ngan. Bơta do pal geh broă tus ndrờm bal bơh ală mpồl lơh broă geh gơnoar, cau tờm brê bal mờ làng bol nàng rơcang kơrian lài, gŏ gờñ mờ bơsong di tŭ ală dơ̆ ồs sa brê.