Ngai mờr tus sa tềp bơhiàn dà lơgar dê nam 2023, tàm bă mìr ơnàng rlau 13 lồ tàm ƀòn Ea Bráh, xã Ea Sô, kơnhoàl Ea Kar, ồng Võ Quốc Dỵ bal mờ 10 nă cau lơh broă apah gam ờ ru ngan mờ broă koh tàu, dăp gơs căp mờ dăp ơn tềng hơđang rơndeh pơndiang lòt jun nàng tăc mờ hìu măy in. Ồng yal, 20 nam do, đềt mềr mờ tờm tàu, ờ hềt gŏ kàl lơi pal kơlôi rơcăng mơya tơnơ̆ hơ̆ gơlơh chờ hờp wơl bè nam do ờ. Giă phơng sih, sơnơm sền gàr phan tam mờ sơntìl, apah cau lơh broă gơguh uă ngan. Bulah bè hơ̆, nam do, trồ tiah niam, tàu geh cồng nha uă gơguh bơh 15 tus 20%, tàm tŭ giă blơi kung geh khà gơguh mờr ndrờm bè hơ̆ sơl, tơl lồ kờp jơh priă tă bơcri kung gam lơh geh priă cồng bơh 50 tus 60 tơlak đong sơl tàm dùl lồ. Mờ 13 lồ, hìu bơnhă gơtùi lơh geh priă cồng rlau 700 tơlak đong. Ồng Võ Quốc Dỵ chờ hờp yal: Añ mŭt ndo tam tàu di 20 nam do gơmờn, cồng nha lơh geh tàu bơh tŭ lơh digơlan nam do là geh uă ngan rlau jơh, mờr bơh 90 tus 100 tấn tàm dùl lồ. Giă tàu kung gơguh jơnhoa sơl, bồ kàl tăc geh 10 tơlak 500 rbô đong dùl tấn tàu nrang. Hìu añ tam bơh 12 tus 13 lồ, geh tơnhàu uă den tàng añ pa tam tai bơh 2 tus 3 lồ. Giă tàu, cồng nha lơh geh bè do den cau tam chờ hờp, nam do digơlan là sa tềp dờng rlau gơ.

            Tàu lơh geh cồng nha uă, tăc geh giă tai den tàng jơh ală cau tam tàu tàm ală kơnhoàl: Ea Kar, Mdrak, Buôn Đôn mờ Ea Súp, càr Dăk Lăk dê chờ hờp ngan ờ gŏ di mìng is hìu bơnhă ồng Dỵ dê lơm gời ờ. Ồng Nguyễn Na ơm tàm thôn Quyết Thắng, xã Ea Tih, kơnhoàl Ea Kar kung tam 10 lồ tàu sơl bơh nam 1998, chờ hờp pà gĭt: Giă phơng sih nam do gơguh mờr dùl dơ̆ mờ nggùl, hơ̆ là 1 tơlak 400 rbô đong dùl tấn bơh nam lài den tŭ do gơguh tus 1 tơlak 900 rbô tấn. Dùl nam tàm nam lài bơcri pơgăp 140 tơlak đong, geh phơng sih, dà kơlhề sơngka sền gàr, cau koh tàu, den nam do bơcri pơgăp 200 tơlak đong. Mơya bơsir wơl lơh geh cồng nha uă mờ giă gơguh ngan. Tiah Ea Kar do jơh ală nam tàu lơh geh bơh 70 tus 80 tấn tàm dùl lồ, mơya nam do digơlan geh 100 tấn tàm dùl lồ, geh tŭ là uă sươn tàu geh uă rlau tai ih. Hìu añ geh 10 lồ den digơlan kung gơ ai priă cồng bơh 550 tơlak tus 600 tơlak đong sơl, hơ̆ là neh tơm jơh priă bơcri lơh.

            Kàl lơh tàu nam 2022- 2023, càr Dăk Lăk geh pơgăp 11 rbô lồ, tam uă tàm ală kơnhoàl: Ea Kar, Mdrak, Buôn Đôn mờ Ea Súp. Tàm hơ̆, uă ngan rlau jơh là tàm 2 kơnhoàl: Ea Kar mờ Mdrak. Kờp jơh tàu lơh geh bơh jơh gùt càr dê kờp dŭ geh 700 rbô tấn. Jơh ală geh ală hìu măy lơh tàu sơdàng tàm càr Dăk Lăk mờ bàr pe càr rềp bal, bè Khánh Hoà mờ Phú Yên blơi. Giă tàu geh ală hìu măy blơi tŭ do bơh 10 tơlak 500 rbô đong tus 11 tơlak đong tàm dùl tấn tàm sươn tàu tơn, gơ jăt tàm bơta sơdàng geh tàm tàu nrang.

            Ồng Lê Tuân, Phó Kwang ătbồ dờng Kông ty Tàu sơdàng 333 Dăk Lăk pà gĭt, digơlan nam do kông ty blơi pơgăp 400 rbô tấn tàu nrang làng bol dê. Kông ty rơ̆p gàr sùm khà giă blơi tàu bơh 10 tơlak tus mờr 11 tơlak đong dùl tấn mờ pơn jăt tai ală broă lơh dong kờl cau tam tàu tàm tiah tam tàu. Ồng Lê Tuân, đơs: Gơwèt mờ dùl lồ tam pa den rơ̆p geh kông ty bơcri 30 tơlak đong, mờ 15 tơlak đong gơwèt mờ dùl lồ tàu gàr wơl tờm. Bơdìh hơ̆ tai, bol añ dong kờl ờ tơm wơl ai làng bol in 3 tơlak dùl lồ tŭ tam pa, 1 tơlak mờ nggùl tàm dùl lồ gơwèt mờ tàu gàr wơl tờm; dan blơi phơng sih mờng ngui pà làng bol. Broă lơh giă sền gàr rềs àr bơh tŭ do tus 3 nam tus là 900 rbô đong tàm dùl tấn tàm sươn ai tàu geh sơdàng 10cs in, mờ giă blơi sùm geh tơm uă rlau 10%, ndrờm mờ pơgăp 1 tơlak đong tàm dùl tấn. 

            Do là nam dơ̆ 3 sùm cau tam tàu nrang tàm càr Dăk Lăk geh cồng. Priă lơh geh uă bơh tờm tàu neh dong uă hìu bơnhă cau lơh broă sa gơ gơs pas sơm. Tiah tàu nrang neh gơ gơs wơl là tờm chi tam pràn ngan tàm ală kơnhoàl ù tiah lŭ rơđeh tàm bơrlŭ bal mờ bràs tàm ală kơnhoàl: Ea Kar, Mdrak, Buôn Đôn mờ Ea Súp bơh càr Dăk Lăk dê.