Mpồl ătbồ brê rơcăng gàr bồ tô dà Thạch Nham geh càr Kon Tum jàu ătbồ sền gàr 32 rbô lồ brê gơdă jòng tàm ù tiah 5 xã bơh kơnhoàl Kon Plông ơm rềp nhàr bal mờ ală kơnhoàl: Sơn Hà, Sơn Tây, Ba Tơ, càr Quảng Ngãi dê mờ kơnhoàl Đah Jum Trà My, càr Quảng Nam. Ù tiah ơnàng mờ geh tai nhàr ơm rềp bal mờ 2 càr jòng tus rlau 50 kơi sồ den tàng broă lơh sền gàr brê tìp oă ngan kal ke. Ồng Phan Quốc Vũ, Kwang ătbồ Mpồl ătbồ sền gàr brê rơcăng gàr bồ tô dà Thạch Nham pà gĭt, broă pơgồp bal niam mờ ală mpồl cau tờm brê tàm càr Quảng Ngãi mờ Quảng Nam là broă lơh niam nàng sền gàr brê gơtùi. Ồng Phan Quốc Vũ, đơs: Mpồl lam lơh jăt jơnau pal jăt pơgồp bal mờ ală mpồl cau tờm brê bơyô dê mờ ờs mờng pah dơ̆ sùm geh broă rơndăp lơh lòt sền, sền swì. Đah bàr gah kung sùm tàm lùp mờ lam lơh ală dơ̆ lòt sền jòi tơrkwĕt tàm tiah rềp nhàr bal kung bè mblàng yal hòi jà làng bol tàm tiah rềp nhàr bal. Bơh broă lơh pơgồp bal đah ală mpồl rềp nhàr bal den bă brê geh ătbồ sền gàr niam.

Ală bă brê tiah rềp nhàr đah kơnhoàl Ia H’Drai, càr Kon Tum mờ 2 kơnhoàl: Ia Grai mờ Chư Păh, càr Gia Lai dê neh geh tŭ là tiah pơneh mus kơl dơm chi brê tìs mờ adăt boh lam uă ngan mờ chu aniai brê ai ù lơh mìr. Is ồn là tàm tiah tơnau dà lơh đèng dà Sê San 3A mờ Sê San 4, bol mus kơl aniai brê sơmờm gùng dà tàm dà dờng jun pơrdŭ dơm chi, pah tŭ đah càr Kon Tum ting kŭp den ntoăt dô wơl tus đah càr Gia Lai mờ sơlơ̆u wơl. Bơh nam 2018, tŭ jơnau pal jăt pơgồp bal tàm broă lơh ătbồ, sền gàr brê mờ ătbồ phan brê tàm tiah rềp nhàr đah 2 càr: Kon Tum mờ Gia Lai geh kĭ hơ, ală mpồl 2 gah bal mờ gơ̆p pơgồp bal ătbồ, sền gàr brê den tàng jơnau lơh tìs gơmù uă ngan. Ồng Nguyễn Tiến Dũng, Phó Củ tịc Anih duh broă Làng bol kơnhoàl Ia H’Drai, pà gĭt: Broă lơh cribơyai yal tơnggit jơnau kung bè pơgồp bal lòt sền jòi tơrkwĕt tàm tiah rềp nhàr đah ală mpồl lơh broă geh gơnoar mờ 2 kơnhoàl bơh càr Gia Lai dê geh sền gròi nàng kờñ tơrmù broă lơh sơgràm aniai tus phan kwơ brê neh lơh geh cồng nha niam. Bơh pah nam broă lơh tìs kung neh gơmù uă ngan sơl. Tus tŭ do, tàm tiah rềp nhàr bơh kơnhoàl dê bal mờ ală kơnhoàl bơh càr Gia Lai dê đơs ngan là ờ gam tai pơneh uă bè lơh tìs Adăt Broă brê bơnơm.

Càr Kon Tum geh nhàr rềp mờ ală càr: Quảng Nam, Quảng Ngãi, Gia Lai kờp jơh jòng rlau 440 kơi sồ. Lơh jăt jơnau pal jăt pơgồp bal, 05 nam do, mpồl sền gàr brê ală càr neh lam lơh gĭt nđờ rbô dơ̆ lòt sền tiah brê rềp nhàr. Bơh hơ̆ gŏ 370 dơ̆ broă lơh tìs adăt boh lam tàm gah broă brê bơnơm, lơh glài kŭp jàm rlau 30 dơ̆, kŭp mờr 1 rbô khối dơm chi ală bơta…Ồng Nguyễn Văn Nam, Kwang ătbồ Ci Kụk Ătbồ sền gàr brê càr Kon Tum pà gĭt, broă lơh pơgồp bal sền gàr brê tiah rềp nhàr ngai sơlơ lơh ngan ngồn, geh cồng nha. Ồng Nguyễn Văn Nam, đơs: Mpồl cau tờm brê tiah rềp nhàr tàm broă lơh pơgồp bal ătbồ sền gàr brê lơh broă ngan ngồn. Sùm jăt sền cribơyai tàm yal tơnggĭt jơnau, geh broă lơh pơgồp bal lam lơh jăt niam broă lơh ătbồ sền gàr brê tàm ală tiah rềp nhàr jăt bơnah ù tiah ƀòn lơgar geh jàu ătbồ. Kơryan di tŭ jơnau sơgràm tam phan mus aniai brê, sơgràm ù brê, koh kơl, tăc blơi, jun pơndiang phan brê tìs mờ adăt boh lam, is ồn là ală tơngai mhar gơrềng ngai chờ ngai sa tềp.

Càr Kon Tum tŭ do geh rlau 616 rbô lồ brê, tàm hơ̆ jơh ală là brê geh is, bă ù geh brê bơh càr dê rlau 63% jơnhoa ngan rlau jơh tiah Tây Nguyên. Càr gam uă bă brê geh is mờ khà dơm chi uă, bơta li la phan kis uă, uă jơi phan puan jơng, ñhơ̆t chi che kwơmàng ờ huan geh. Kơnờm rơcăng lài, jơh nùs pơgồp bal đah ală mpồl lơh broă geh gơnoar mờ bal mờ ală càr rềp nhàr bal, Kon Tum gam sền gàr dà tơlir ai ală bă brê, sền gàr tiah ơm kis tềng đăp trồ tiah lơh aniai ngai sơlơ kơn jơ̆ ngan kung là sền gàr broă lơh broă sa ai ală mpồl bơtiàn làng bol jơi bơtiàn dồ êt nă cau tàm tiah do in.