Là hìu bơnhă kòn cau Khmer rƀah, ùr bơklau bi Huỳnh Thị Cẩm Tú mờ bi Thạch Thường ơm tàm ƀòn Vĩnh Thanh, xã Vĩnh Quới jà bal lòt tus Bình Dương lơh cau lơh phan. Tŭ kòp Kovid-19 bơtờp uă tàm nam 2021, ùr bơklau rê wơl tàm ƀòn, geh mè bèp ai ù lơh hìu ơm is, lòt lơh broă ơpah nàng drơng rài kis. Ală nam pa do ờ geh rơndeh rơndồ lòt rê den broă lơh sa gơtìp uă ngan kal ke. Den tàng, tŭ geh sền sơ wì rơ wah dong kờl 10 tơlak đong tam gơl broă lơh, 2 nă ùr bơklau neh blơi rơndeh măi nàng geh rơndeh lòt rê, mơkung ngui nàng pơndiang plai chi lòt tăc.

Bi Huỳnh Thị Cẩm Tú, pà gĭt, kơnờm geh rơndeh mờ broă kă bro bơh hìu bơnhă bi dê neh ƀuơn ƀoài rlau tai: “Hìu bơnhă ờ geh priă jền sùm, ờ geh priă bơcri, ờ geh rơndeh lòt rê kă bro, den geh dà lơgar dong kờl den geh blơi dùl nơm rơndeh nàng lơh rơndeh lòt kă bro, tŭ do tam gơl tus broă tăc bro tơn. Dùl nhai kung geh bơh 7 tus 8 tơlak đong, tăc rơpung kài, dilah jơh kàl rơpung kài den tam gơl tus kă bro bơta ndai, bè kơnuh ngui lơh sràt, plai dà toh. Hìu bơnhă kung ưn ngài Đảng, Dà lơgar neh dong kờl oh in geh khà priă nàng hìu bơnhă in kă bro, 2 nă ùr bơklau rơ̆p pơn đơl pràn lơh ngan nàng lik bơh bơta rƀah, oh kơ̆p kờñ rài kis bơtàu tơnguh rlau tai”.

Ai mò Sơn Thị Lùng, ơm tàm ƀòn Vĩnh Thành, xã Vĩnh Quới, mờ khà priă 10 tơlak đong geh dong kờl bơh broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau, mò neh blơi 1 nơm sur me, lơh niam wơl wàng ròng sur mờ blơi phan sa ai sur in tàm ală nhai bơh chờm. Ngui ù bơh ngkời hìu, mò tam tai biăp bùm lô nàng lơh phan sa ai sur in. Tơnơ̆ mờr 4 nhai ròng, mò rcang tăc mpồl sur sơn rờp, mờ 13 nơm sur kòn, kờp dŭ geh rlau 20 tơlak đong. Mò Sơn Thị Lùng, đơs: “Geh dong kờl bè hơ̆ añ ưn ngài uă ngan. Tŭ do sur neh deh geh 10 nơm kòn, mờ añ tăc jơh dùl mpồl sur kòn tơn. Añ ròng siam niam ngan, priă lơh geh kung dong hìu bơnhă añ bè ờs wơl rài kis sơl”.

Broă dong kờl drơng rài kis lơh broă sa, tam gơl broă lơh ai làng bol jơi bơtiàn dồ ết nă cau ală nam pa do geh  ƀòn drà dờng Ngã Năm, càr Sóc Trăng sền gròi lơh jat mờ lơh geh cồng nha niam ngan. Tơngai pa do, ƀòn drà dờng neh tơrgùm lơh mhar broă lam lơh jat ală rơndăp broă lơh, rơndăp broă dềt... tàm broă lơh jơnau kờñ dà lơgar bơtàu tơnguh lơh sa- mpồl bơtiàn tàm tiah làng bol jơi bơtiàn dồ ết nă cau mờ tiah kơh bơnơm, tơngai bơh nam 2021-2030, tàm hơ̆, geh broă dong kờl tam gơl broă lơh ai làng bol jơi bơtiàn dồ ết nă cau in, hời rơ hời dong hìu bơnhă rƀah jơi bơtiàn dồ ết nă cau geh tai ală bơta lơh sa, sơlơ tơnguh priă lơh geh, hời rơ hời brồ guh tus bè ờs wơl rài kis.

Tus tŭ do, bơh broă lơh neh dong kờl hìu ơm ai 1 hìu bơnhă in mờ khà priă 44 tơlak đong; dong kờl hìu ơm ai 35 hìu bơnhă mờ khà priă rlau 1 tơmàn 500 tơlak đong; dong kờl tam gơl broă lơh ai 87 hìu bơnhă mờ khà priă 767 tơlak đong; dong kờl dà ngui sa pah ngai ai 9 hìu bơnhă in mờ khà priă 27 tơlak đong. Bơdìh hơ̆, càr gam lơh 2 broă lơh dong kờl bơtàu tơnguh lơh sa, lơh li la uă rài kis lơh broă sa mpồl bơtiàn, geh broă lơh ròng ada Tây, ka pềs tàm ƀòn Vĩnh Thuận, xã Vĩnh Quới mờ broă lơh ròng ada Tây tàm ƀòn Long Thành, xã Tân Long mờ khà priă rlau 343 tơlak đong mờ rơ̆p pơn jat tai lam lơh, lơh gơ rề uă tàm nam 2024.

Ồng Huỳnh Văn Lơ, Kwang atbồ Cơlŭ lơh broă, Cau ling sồt să mờ mpồl bơtiàn ƀòn drà dờng Ngã Năm pà gĭt: “Pơn jat tai cribơyai mờ Anih duh broă làng bol ƀòn drà dờng, lam lơh tơl làm broă rơndăp lơh, mờ lơh jat tơl làm broă dong kờl jat broă lơh jơnau kờñ tơrmù rƀah kơ̆ kơl jăp, broă lơh bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, uă ngan tơrgùm tam gơl broă lơh, bơto bơtê broă ai cau lơh broă ƀòn lơgar in nàng cau lơh broă ƀòn lơgar in gĭt lơh broă tus bal lơh broă cèng wơl priă lơh bơtàu tơnguh lơh sa hìu bơnhă in”.

Rơndăp broă lơh bè bơsong bơta ờ tơl ù ơm, hìu ơm, ù lơh sa tam gơl broă lơh mờ dà ngui pah ngai geh gơtha kwơ màng ngan, nàng kờñ lơh geh ală bơta ai ală hìu bơnhă kòn cau Khmer in geh gĭt bal, tam gơl broă lơh, bơtàu tơnguh rài kis mờ ală bơta tàm rài kis pah ngai. Den tàng, broă lơh lam lơh gam geh càr Sóc Trăng đơs bal mờ ƀòn drà dờng Ngã Năm đơs is tơrgùm lơh jat, gàr niam di mờ cau, di tŭ tơngai nàng ală hìu bơnhă in geh tai ală bơta nàng brồ guh, pơgồp bơnah lơh tam gơl muh mat, rài kis lơh sa- mpồl bơtiàn tiah làng bol jơi bơtiàn dồ ết nă cau tàm tơngai tus.