“Pơn jat tai sền gròi, sơlơ tơnguh rlau tai broă lơh mblàng yal jơnau, yal tơnggit kơphe bơkah Việt Nam tus cau ngui tàm lơgar mờ ală lơgar”. Do là 1 tàm ală kơnòl broă geh Mpồl kơphe bơkah đơs nền tàm Jơnau lơh nền tàm Pơrjum dờng Mpồl kơphe bơkah dơ̆ 2, tơngai lơh broă bơh nam 2024 tus nam 2029 geh lơh tàm ngai 02/8, tàm ƀòn dờng Buôn Ma Thuột, càr Dăk Lăk. Mpồl kơphe bơkah (Gơ wèt Mpồl kơphe Buôn Ma Thuột, càr Dăk Lăk) geh crơng gơs nam 2019. Tơnơ̆ 5 nam crơng gơs mờ bơtàu tơnguh, tus tŭ do, Mpồl neh geh rlau 80 nă cau geh jơng tàm ală tiah tam kơphe uă ngan tàm gùt lơgar (geh: Dăk Lăk, Dăk Nông, Lâm Đồng, Gia Lai, Kon Tum, Sơn La, Quảng Trị, Nghệ An,…).

Tàm pơrjum, ală cau ala mat neh tă pơgồp jơnau đơs nàng bơt bơtàu mpồl bơtàu tơnguh rlau tai tàm tơngai lơh broă pa, đơs nền pơn jat tai tơnguh gơnoar broă tàm bơrkuăt bal ală cau tàm mpồl, là rbàng tơrbŏ gơ hòi gơ jà ală mpồl pơr, kă bro, ròt ală anih tac mờ ală mpồl lơh gơlik broă drơng ala nàng lơh ală mpồl lơh bal kơ̆ kơljap. Tơnguh pràn jak lơh kơphe bơkah, bơto pơlam ngui ală cồng nha măi mok pa, lơh kơphe bơkah gơ jat bal mờ ală jơnau sồr tam kơphe kơ̆ kơljap jŏ jòng sùm.