Tàu gơtìp ồs sa ờ mìng lơh gơbàn hoàc huơr ai làng bol lơh broă sa in mờ gam lơh gơ rềng tus broă rơndap lơh blơi, lơh broă lơh sa bơh mpồl lơh sa kă bro brê. Tŭ do, ală tiah pơgồp bal mờ mpồl lơh sa kă bro mờ làng bol gam lam lơh uă broă lơh rơcang sơndră ồs sa, mhar koh tàu dong làng bol lơh broă sa tơrmù ƀà hoàc huơr. Jat Kông ty TNHH MTV Thành Thành Công Gia Lai yal, bơh tơnơ̆ sa tềp bơhiàn yau, bơta ồs sa tàu tàm tiah tam tàu bơh kông ty dê gơlik geh kal ke, lơh gơ rềng tus broă rơndap lơh sa.

Tus tŭ do neh gơlik geh 30 dơ̆ ồs sa tàu bơh bă tàu gơtìp hoàc huơr rlau 270 lồ, gơguh uă rlau 5 dơ̆ pơndrờm mờ kàl lài. Ồng Trương Quang Trình, Phó kwang atbồ Kông ty pà git, tềng đap bơta tàu ồs sa, hìu măi neh geh broă rơndap lơh blơi gờñ, tam pà cau lơh broă dipal nàng cau tam tàu in ờ huan kơlôi rơcang.