Phan lơh geh bơh lơh sa suơn sre là phan bơna tăc mờ lơgar ndai tờm ngan bơh càr Gia Lai dê, mờ priă lơh geh bơh tăc phan mờ lơgar ndai 500 tơlak dolar Mỹ pah nam mờ gam gơguh sùm. Bơta do gơtùi lơh geh là kơnờm bơh uă nam do, càr neh sền gròi bơt bơtàu, pờ ơnàng ală tiah tam phan lơh gơlik phan lơh geh bơh lơh sa suơn sre jat ală jơnau sồr tơl khà geh dờp. Jat jơnau yal bơh Sở Nông nghiệp mờ Phát triển Nông thôn càr Gia Lai, tŭ do kờp jơh bă ù sih tam phan jơh gùt càr dê kờp dŭ 557 rơbô 700 lồ. Tàm hơ̆, geh 230 rơbô lồ, ndrờm mờ 41% bă ù, geh tam phan jat ală jơnau kờñ tơl khà bè VietGAP, GlobalGAP, 4C, Organic, Rainforest Alliance… Bal mờ hơ̆, tŭ do Gia Lai kung neh geh dờp 55 mã tiah tam phan ală phan bơna tờm chi sa plai, sồr pal tơl khà tăc mờ lơgar ndai jat sră pơrgon tăc uă dê.

Ồng Lưu Trung Nghĩa- Kwang atbồ Sở Nông nghiệp mờ Phát triển Nông thôn Gia Lai pà gĭt, bàr pe phan bơna bè kơphê, plai màk càr dê neh gơtùi mŭt tàm ală drà kă bro kal ke bè Nhờk mờ EU. Jat broă rơndap lơh, tơngai bơh nam 2022-2025, càr geh tơnguh bă ù tam phan lơh sa jat tơl khà geh dờp pơgap 5 rơbô lồ dùl nam, tơnguh uă bơta niam bơkah bơh phan lơh geh bơh gah lơh sa suơn sre dê nàng drơng broă tăc phan mờ lơgar ndai nàng kờñ tơnguh uă priă jền ai cau lơh broă sa in.

Ồng Lưu Trung Nghĩa, đơs: Phan lơh geh bơh gah lơh sa suơn sre càr dê ngai sơlơ tơngŏ geh bơta pràn bè bơta niam bơkah mờ di pal mờ jơnau sồr bơh drà kă bro ală lơgar dê. Tơnơ̆ tơngai kòp dờng, càr neh bơtàu tơnguh wơl gah phan bơna tăc mờ lơgar ndai. Bơta pràn tăc phan mờ lơgar ndai bơh ală mpồl lơh sa kă bro dê neh lơh di pal mờ jơnau sồr. Tàm tơngai pa do, ờ geh bơta phan lơh geh bơh suơn sre lơi pal kờñ geh bơta dong kờl tai. Kwơ màng ngan là geh ală mpồl lơh sa kă bro bè Hoàng Anh Gia Lai, Hương Sơn, Doveco, Quiconac… neh lơh geh ală mpồl lơh gơlik phan tăc mờ lơgar ndai geh cồng nha uă ngan.

Dilah càr Gia Lai gam sền gròi pờ ơnàng ală tiah lơh gơlik phan lơh sa suơn sre jat ală jơnau kờñ tơl khà geh dờp den tàm tiah mat tơngai mŭt đah Tô dê, càr Sơn La gam tơrgùm bơcri priă tàm broă lơh logistics nàng bơsong jơnau sồr ai broă tăc bro phan lơh geh bơh suơn sre tiah do dê. Sơn La tŭ do geh 55 mpồl lơh sa kă bro lơh broă lơh logistics mơya broă lơh dềt ngan, ală bơta broă bal hiă. Tàm broă lơh jun pơn diang tăc bro phan, càr gam geh 2 gùng dà broă lơh hơ̆ là jun pơndiang jat gùng rơndeh mờ gùng dà tàm dơlam lơgar dê.

Ờ tơl broă lơh logistics, kung lơh broă tăc bro phan biăp, plai đo ris bơh càr Sơn La dê gơtìp uă ngan kal ke. Cau tam phan gơtìp kơn jơ̆ ngan tŭ tơngai tam phan mờ gơtìp cau kă bro bơklơn giă. Bal mờ hơ̆ là broă ờ tơl anih lơh gơlik kơldung ơn phan, anih ơn prap, jun pơndiang phan, mpồl cau lơh broă.... Ồng Nguyễn Khắc Hào, Kwang atbồ Cơldŭ lơh broă Nông nghiệp mờ Phát triển Nông thôn kơnhoàl Mai Sơn, càr Sơn La pà gĭt: Kơnhoàl geh 11 rơbô lồ tờm chi sa plai, mờ khà tơnhào 70 rơbô tấn plai pah nam. Broă pik plai sùm geh lơh uă tàm ală tơngai ngan ngồn, tŭ tơngai lơyah, den tàng broă ơn prap là kờñ pal geh ngan. Mơya, ală  anih ơn prap mrềt tàm ù tiah kơnhoàl dê tŭ do geh bơcri lơh dềt ờ hoàn uă, uă ngan là tàm ală hìu bơnhă làng bol cau lơh broă sa, Hợp ták xã, khà ơn prap phan ờ geh uă. 

Ồng Nguyễn Khắc Hào, đơs: Kơnhoàl neh geh ală jơnau dan mờ càr, kơ̆p kờñ tàm tơngai tus tàm ù tiah kơnhoàl dê geh lơh dùl anih tờm logistics, dong ală hìu bơnhă làng bol Mai Sơn mờ ală kơnhoàl rềp bal in tàm broă lơh gơlik phan, ơn prap phan mờ tăc bro phan lơh geh bơh suơn sre ƀuơn ƀoài.

Sơn La geh 856 mpồl lơh sa kă bro, Hợp ták xã, hìu bơnhă lơh sa kă bro gah jun pơndiang phan, mơya uă ngan broă lơh dềt, mìng geh 6 anih lơh broă, đại lý bơh mpồl lơh sa kă bro ƀưu cíñ, jun pơndiang mhar dê. Jơh gùt càr pa mìng geh pơgap 30 anih ơn prap mrềt, ơn prap hơđơm 250 khối dùl anih; 2 rơbô 500 anih pơr rañ phan ris dềt rah rài, mờ bơta pràn pơr rañ 60 rơbô tấn plai ris dùl nam (uă ngan là plai jràng); 12 container mrềt, ờ hềt geh anih ờs lơh gơlik ală phan, phan bơna drơng broă lơh kơldung glòm plai, kơldung ơn phan, tăc phan mờ lơgar ndai.

Ală bơta ờ hềt pràn mờ kal ke bơh ală broă lơh logistics tàm broă lơh sa suơn sre neh lơh kal ke ai gah tăc bro phan lơh geh bơh suơn sre dê. Jat ală kwang bàng, Sơn La pal lơh uă gùng dà broă lơh nàng tơrmù priă tă ngui logistics, lam lơh ală broă lơh nàng gơ hòi gơ jà bơcri priă tàm gah phan bơna bơt bơtàu logistics. Ồng Trần Thanh Hải, Phó Kwang atbồ Kụk tăc mờ blơi phan mờ lơgar ndai, Ƀộ Kông thương, đơs là: Tŭ do, phan bơna gùng lòt tàm tơrbŏ bal mờ ală tiah càr Sơn La dê gam ờ hềt tơl, ờ hềt geh ală bơta nàng lòt tàm gùng tiah nhàr lơgar, gùng dà, gùng rơndeh par. Den tàng, broă bơcri priă lơh gùng rơndeh ntoăt răt Hòa Bình- Mộc Châu kung bè pờ ơnàng gơl gùng tiah drà là kờñ geh ngan nàng tàm tơrbŏ bal mờ ală tiah. Bơdìh hơ̆, gơwèt mờ phan bơna lơh geh bơh lơh sa suơn sre geh bơta pơn rơ bơkah den kờñ pal geh ơn prap, den Sơn La pal geh broă lơh, gùng dà broă lơh gơ hòi gơ jà cau bơcri priă nàng bơt bơtàu ală anih ơn prap mrềt, anih ơn prap lơngơm mờ anih tờm lơh gơlik phan lơh geh bơh lơh sa suơn sre.

Mò Phạm Thị Doan, Kwang atbồ Sở Kông thương càr Sơn La pà gĭt, nàng bơtàu tơnguh lơh sa suơn sre kơ̆ kơljap, càr Sơn La sền gĭt logistics là dùl broă lơh kwơ màng tàm broă lơh pràn tăc bro phan lơh geh bơh suơn sre mờ phan bơna dê. Mò Phạm Thị Doan, đơs: Sở Kông thương geh bal mờ ală sở, ngàñ tă pơgồp jơnau đơs mờ càr tàm broă rơndap ù tiah ală phan bơna bơt bơtàu bè bơtàu tơnguh logistics bè gùng lòt, anih ơn prap, ngan là broă mpồl cau lơh broă tàm logistics, broă lơh gơ hòi gơ jà bơcri priă tàm gah broă do.

Bal mờ broă lam lơh dùl ròt bal ală broă lơh bơh ală kấp, ală ngàñ dê, tơl mpồl lơh sa kă bro, hợp ták xã, cau lơh broă sa càr Sơn La kung kờñ pal tam gơl pa kơlôi sơnơng, tơnguh uă bơta niam bơkah phan bơna dê, tam gơl lơh sa jat tơl khà geh sồr, tơnguh uă bơta kwơ, tơnguh uă bơta jak chài tàm pơrlòng ai gah phan lơh bơh suơn sre càr Sơn La dê.