Rài lơh sa sơlơ mut gơ rờm bal uă, broă lơh mat kă bro sơlơ kuơmàng. Jơnau kờñ bơh broă lơh mat kă bro là lơh gơlik dùl tềl kuơmàng, dùl mat krơi is, dùl rùp hin pơn rơ is mờ bơta kuơ mìng dùl lơm mờ cau blơi gơtùi đal git mờ sơnơng tus phan bơna halà broă drơng ala hơ̆. Kơnờm bơh hơ̆, mpồl lơh sa kă bro gơtùi tac phan bơna mờ giă jơnhua rlau, lơh geh uă priă cồng rlau.

Mờng chài ngan ngồn bơh uă lơgar tàm dunia dê ai gŏ, nàng lơh geh cồng nha tàm broă sơlơ tơnguh tac phan bơkah ƀòn lơgar dê tàm ală drà kă bro tac phan hờ lơgar ndai, pal sền gròi tus lơh, sền gàr mat kă bro. Tàm lơgar Việt Nam, bulah neh geh jơnau lơh nền, broă rơndap lơh lơh mat kă bro ai phan lơh gơs bơh suơn sre tac hờ lơgar ndai in. Mơya, broă do geh đơs ờ hềt loh làng, ờ hềt geh bơta tơrbŏ bal, ờ hềt geh bơta đơng lam pơgồp bal đah ală gah geh gơ rềng… Den tàng, broă lơh mat kă bro phan lơh gơs bơh suơn sre tus tŭ do kung ờ hềt lơh geh jơnau kờñ bè ai tơlik.

Pơn yơu gơ wèt mờ phe, Việt Nam là lơgar tac hờ lơgar ndai phe uă dơ̆ 3 dunia, mơya uă ngan phe Việt Nam dê tac hờ lơgar ndai jat bơta lơh broă, ơn tàm kơldung kò, ờ geh mat sơnđan, tus lơgar ndai hơ̆ sồng lơh niam kơldung ơn, lir logo mat kă bro bơh mpồl tac phan lơgar ndai dê tac tàm drà kă bro. Den tàng, mat kă bro phe Việt Nam kung ờ hềt ngan ngồn geh cau ngui sa ală lơgar git tus. Ồng Phan Minh Thông, Củ tịc Hội đồng Quản trị, Kwang atbồ dờng Tập đoàn Phúc Sinh đơs là: “Bol he geh git tus là lơgar tac phan hờ lơgar ndai uă, mơya bol he ờ hềt git tus là ală mpồl lơgar tac phan hờ lơgar bdai geh mat kă bro. Ală mat kă bro tiơng pơn rơ tàm dunia ờ geh mat Việt Nam he dê”. Jat ală cau jak chài lơh sa đơs, Việt Nam tac uă ngan phan lơh gơs bơh suơn sre ai dunia in, mơya kuơmàng là pal gơtùi rơ wah ală phan bơna krơi is, geh bơta pràn tàm pơrlòng nàng tơrgùm lơh mat kă bro. Geh phan bơna krơi is den pal geh tơl khà bơta niam mờ pal geh broă rơndap lơh yal tơnggit kâp dà lơgar.

Bơta moat jrùm tŭ do là bulah 2, 3 mat kă bro phan lơh gơs bơh suơn sre tàm lơgar geh bơta niam mơya mpồl lơh sa kă bro ờ geh tơl bơta pràn priă jền nàng lơh gơs tiah tam phan drơng broă tac hờ lơgar ndai in. Bơta do sồr pal geh bơta sền gròi uă rlau tai bơh anih lơh broă dà lơgar dê, dong kờl ală broă lơh dipal, dong mpồl lơh sa kă bro phan lơh gơs bơh suơn sre pràn rlau. Jơnau đơs bơh ồng Lê Thanh Hòa – Phó Kwang atbồ Kụk bơta niam lơh gơlik mờ Bơtàu tơnguh drà kă bro, Ƀộ Nông nghiệp mờ Phát triển Nông thôn dê: “Să tờm jơh ală mpồl lơh sa kă bro Việt Nam ndrờm là ală mpồl lơh sa kă bro dềt mờ di mơ, kung bè bol he ờ tơl priă bơcri, bol he ờ tơl bơta pràn jak, jơnau git wă tàm broă lơh kă bro, kuơmàng là kă bro mờ ală lơgar. Do là ală bơta ờ niam mờ jat añ là tàm tơngai tus bol he pal pơn jat tai geh bơta tơnguh niam rlau tai nàng tus bal tàm gah do. Bol he tac phan uă ngan ală mpồl lơh sa kă bro lơh phan sa dờng bơh dunia dê in mơya phan lơh gơs dut ndơl den ờ geh top mat Geh lơh gơlik tàm Việt Nam. Do là dùl bơta hoàc huơr nàng anih lơh broă atbồ dà lơgar pal git broă do nàng geh ală broă dong kờl niam rlau bè priă bơcri, phan bơna, lơh bè lơi ală mpồl lơh sa kă bro tơl pràn nàng ai ală phan geh bơta niam tac tàm drà kă bro dunia mờ mat kă bro Việt Nam”.

Jat ồng Trần Văn Trung – Kwang atbồ Kông ty Kổ phần Bơcri priă Hải Âu Việt đơs, lơh mat kă bro ai phan lơh gơs bơh suơn sre Việt Nam dê in là bơta jal mhar. Bal mờ hơ̆, mpồl lơh sa kă bro mờ gah lơh broă geh gơnoar kung pal sền gròi tus broă lơh sền gàr mat kă bro. Broă lơh do rơp dong ală mpồl lơh sa kă bro tơrmù ƀà dùl bă lơyah ngan rlau jơh ală hoàc huơr bơh broă ngui mat kă bro tìs mờ adat boh lam bơh ală mpồl ndai dê. Bơh hơ̆ gơtùi gàr bơngă pin dờn, bơta tiơng pơn rơ bơh mat kă bro dê tàm drà kă bro: “Drà kă bro bơh tiah đah tô mut tàm tiah đah jum dà lơgar neh geh phe ST25 tac mờ giă bu ba ngan bơh 150 rbô đông. Ai lài do den pơn yơu bè tiah đah tô dà lơgar geh phe Hải Hậu là tiơng pơn rơ ngan, tiah lơi kung tac phe Hải Hậu. Khi tac mờ cau blơi kung dờp broă blơi phan đòm lơh. Dơ̆ 2 là ală mpồl lơh sa kă bro den ờ sền gròi tus broă sền gàr mat kă bro, lơh gơbàn bơta tŭ gơlik geh broă bè hơ̆ den ờ geh gơnoar nàng geh sền gàr”.

Ală cau jak chài đơs là, broă lơh jal mhar là pal geh mat kă bro bal ai phan lơh gơs bơh suơn sre Việt Nam dê in mờ pal gơtùi lơh gơs Logo. Bè đah ală mpồl lơh sa kă bro tac hờ lơgar ndai phan lơh gơs bơh suơn sre kung pal lơh jat ală jơnau sồr bơh mpồl blơi dê, lam lơh gơlik nàng gàr tơl khà, bơta niam, giă tac. Sền gròi tus broă lơh gơlik phan nàng lơh tiah tam phan kơ̆ kơljap sùm ai tơl bơta phan lơh gơs bơh suơn sre krơi is in.