Tơnơ̆ ală ngai ơm rlô chờ hờp wă rò sơnam pa sa tềp, cau Rơđê tàm càr Dăk Lăk lòt lơh sa kàl mrềt prang, sền gàr sươn kơphê, kau su...Rài kis gơ rê wơl mờ broă lơh sre mìr ngai bồ sơnam pa duh hồl ngan, chờ hờp ngan, làng bol lơh broă sa gơn kơnờm geh dùl kàl lơh sa geh tơnhàu uă, sơnđờm ai dùl sơnam pa bal mờ uă cồng nha pa. Mò H’Duôn Mlô ơm tàm ƀòn Mui, xã Cư Nĕ, kơnhoàl Krông Buk, càr Dăk Lăk yal: Tàm dơ̆ sa tềp ală hìu geh phan sùm lơh yàng duh khuai dan pràn kơldang să jan ai oh kòn kòn sau in, bè hìu geh drăp tơrnờm, geh iar, geh sur den sùm lơh ală yàng duh khuai bè 3 nơm iar, 3 drăp tơrnờm ai oh kòn kòn sau in halà dùl nơm sur mờ 5 drăp tơrnờm, halà 6 drăp tơrnờm. Tơnơ̆ tŭ jơh sa tềp den sơnđờm rê wơl mờ broă lơh sre mìr. Rài yau, den lòt koh chi, jì ñhơ̆t nàng rơcăng tam kòi, tam tơngời, ai tŭ do den jì ñhơt sươn kau su in, koh klah ƀà ntê kơphê. Añ kơ̆p kờñ tàm nam pa să jan pràn kơldang, lơh sa bơtàu tơnguh, làng bol ƀòn lơgar sùm chờ hờp chờ hờn.

 Tàm gùng mŭt tus tàm ală xã Ea Sin, Cư̆ Nĕ, Cư̆ Pơ̆ng... kơnhoàl Krông Ƀuk, càr Dăk lăk, săp ntas rơndeh lơ-òr, măy tuh dà neh mpong sùm tàm ală suơn kơphe gam hòn gơs niam mờ bơkào bò crư. Ồng Y Bran Mlô, kis tàm ƀòn Dhiă, xã Cư̆ Nĕ, kơnhoàl Krông Ƀuk, càr Dăk Lăk yal, nam pa do, kơphe geh khà priă tăc mơya khà priă bơh ală bơta phan blơi nàng bơcri tàm broă lơh sa gơguh uă, ồng kơ̆p kờñ tàm nam pa Quý Mão geh bal khà priă xăng jờu, phơng sih kơl jăp niam nàng làng bol tam kơphe chờ hờp rơlao. “Hìu nhă añ tam 1 lồ kơphe, tơnhào geh 3 tấn gar. Mơya mờ khà priă dồs bơcri tàm broă lơh sa uă mờ rài kis pah ngai tai, hìu nhă añ lơh ngan tềm pềr tài khà priă ală bơta gơguh kas ngan. Tàm nam pa, añ kơ̆p kờñ geh bơta pràn kơl dang să jan, gơboh gơbài, lơh ngan tơnguh bơtàu lơh sa, tàm hơ̆ uă ngan là kơ̆p kờñ khà priă kơphe gơguh uă, xăng jờu, phơng sih kơl jăp khà priă. Bè hơ̆, làng bol hơ̆ sồng chờ hờp, tơriang tơriồng lơh broă”.

Tàm thôn A Dơk Kông, xã A Dơk, kơnhoàl Đăk Đoa, càr Gia Lai ală ngai bồ sơnam pa, gơnoar ătbồ ƀòn lơgar bal mờ làng bol tơrgùm să tuah wàs brêh brơm nàng geh gùng ai dà in lòt, geh dà pơđì tus lŏ sre nàng rơcăng sih tam kòi kàl mrềt prang. Ồng Y Xiu, là cau ătbồ thôn pà gĭt, bal mờ mờr 200 hìu làng bol, kòn cau Bahnar tàm thôn tam rlau 70 lồ kòi sre mờ rlau 200 lồ kơphê. Làng bol tàm thôn chờ hờp ngan lòt lơh broă sa ngai bồ sơnam pa bal mờ bơta kơ̆p kờñ kàl lơh kòi nam do geh cồng nha uă, kơphê nam tơnơ̆ pơn jăt tai tăc geh giă uă rlau. Ồng Y Xiu, đơs: Tàm thôn bol añ hòi jà thôn, ƀòn, lài mờ tŭ rơcăng wă rò sơnam pa nam do, bol añ lòt tuah wàs jơh brêh brơm, nàng geh gùng ai dà in lòt tus tàm lŏ sre, tơnơ̆ hơ̆ den lơ òr sơkam, mờ sih tam kòi. Làng bol ƀòn lơgar tŭ do khi ngui sơntìl kòi lơh geh cồng nha uă, kờp dŭ dùl sàu lơh geh bơh 40 tus 50 tạ tàm dùl nam, bơh phơng sih, ƀồm sơnơm làng bol kung lơh jăt bơta jak chài sơl, pah ngai lòt còp rwàng sươn sre, sền dà den tàng kòi dòn dờng niam ngan.

Lŏ Rơ Mah H’Peng, kis tàm ƀòn Thơ Nhueng, xã Ia Phang, kơnhoàl Chư Păh, càr Gia Lai pà git, lài do, rài kis bơh hìu nhă bal mờ làng bol gơtìp kal ke ngan. Mơya bơh tŭ lơh jăt broă bơ̆t bơtàu ƀòn lơgar pa, ƀòn neh geh bơcri priă lơh gùng lòt mờ ƀê tông tàm ƀòn, geh lơh hìu pơrjum ƀòn, hìu bơsram kấp 1 kung geh lơh pa... Bal mờ hơ̆, làng bol tàm ƀòn neh geh kwang bàng lơh broă gah lơh sa suơn sre bơto pơlam tam gơl phan tam mìng geh tam bè kơphe, tiêu nàng tam ală tờm chi sa plai, tus bal mờ hợp ták xã nàng pơgồp bal lơh sa. Să tờm hìu nhă lŏ ală nam pa do, kung neh tam gơl sơntìl kòi lài do mờ sơntìl kòi J02 pa, geh cồng nha uă rơlao 2 dơ̆. Bal mờ broă tam gơl bơh ƀòn lơgar dê, rài kis hìu nhă lŏ kung rơhời geh gơguh sơl. Chờ satầp, lŏ H’ Peng kung gam kah sùm ală broă rơcang lơh bơh lŏ dê tàm nam pa 2023 bal mờ hìu nhă bơyai lơh sa tơn bơh ală ngai bồ nam pa: “Tàm nam, bol añ neh lơh geh hìu rơlao 350 tơlăk đong. Nam pa, satềp bol añ bơyai lơh chờ hờp, hờm ram. Bol añ lơh sre geh Dà lơgar dong kờl sơntìl kòi, tàm tơngai lơh geh dà lơgar dong kờl sơntìl tus mờ broă bơto sơnka sền gàr, đơs ngan Dà lơgar dong kờl tơl mờ di tŭ. Tus do, geh lơh ngan rơlao tai tàm broă lơh sre nàng geh kòi uă rơlao”.

Bi Kkil ơm tàm ƀòn Wâu, xã Chư Á, ƀòn dờng Pleiku, càr Gia Lai nam 2022 lơh geh priă jền gĭt nđờ rhiang tơlak đong kơnờm khin cha bơcri priă tam gơl ală lŏ sre lơh kòi nàng lời wơl ù tam biăp. Tŭ do, ƀòn Wâu gơ gơs là ƀòn sùm tam biăp bơh xã dê, geh uă hìu lơh geh priă jền bơh 100 tơlak đong rlau hơđang pah nam. Đơs bè jơnau rơcăng lơh tàm sơnam pa, bi Klil, yal: Tơnơ̆ dơ̆ sa tềp, làng bol bol añ tus wơl tơn mờ broă tam biăp, do rơ̆p là tờm chi tam tờm bơh làng bol dê, tài bơh tŭ do lơh kòi den ờ geh dà, ờ geh tơnhàu, den tàng làng bol kòn cau tàm ƀòn Wâu he lơh jăt broă lơh tam gơl tờm chi tam, mùl màl là tam gơl lŏ sre lơh kòi nàng tam biăp, bè biăp lơpuơn, gam hòi là biăp nha lo brong, bơya, mrĕ, hơ̆ sồng tam tơngời, tam rơpung kài...Làng bol tàm ƀòn gĭt nền do là gùng dà bơtàu tơnguh lơh sa tàm tơngai tus.