Sơnđờm mut lơh broă mờ mìng geh 9 nă cau lơm, tus tŭ do Mpồl lơh broă bal Broă lơh sa- Kă bro phan- Drơng broă Tơ Tung (xã Tơ Tung, kơnhoàl Kbang, càr Gia Lai) neh gơguh tus 67 nă cau tàm mpồl tus bal tam mờ lơh gơlik plang lơh sơnơm. Jat bi Nguyễn Thị Thanh Hương, Củ tịc Mpồl lơh broă bal yal, lài do làng bol uă ngan kơnờm tàm tờm bùm blàng mờ phan tam lơyah ngai. Bơh nam 2019 tus tŭ do, kơnờm broă lơh tam plang, mờ ală cau tàm mpồl lơh broă bal lơh geh priă jền sùm.

Mpồl lơh broă bal neh lơh mat kă bro tơnghi plang lơh geh tơl jơnau sồr OCOP 3 sơrmañ kấp càr, mờ broă tăc bro kơ̆ kơl jăp tàm bàr pe drà pa mờ hìu tăc sơnơm. Bi Nguyễn Thị Thanh Hương đơs:“Tŭ lơh geh ngan ngồn ală bơta phan bơna dê, bơta niam rơ̆p uă rlau. Bol añ lơh ngan lơh jat ală jơnau sồr OCOP nàng ƀuơn ai phan bơna tus tàm drà kă bro, lơh geh pin dờn ai năc in. Tŭ do, Mpồl lơh broă bal geh Kông ty Lơh sơnơm mờ Phan bơna gah lơh sơnơm Đà Nẵng dờp blơi phan bơna, mờ priă lơh geh kờp bal bơh 50 tus 60 tơlak đông dùl lồ pah nam”. Tàm tiah tờm bơh Tiah prap gàr brê bơnơm Kon Chư Răng, bàr pe mpồl lơh sa kă bro neh sơnđờm bơcri priă bal mờ làng bol kơnhoàl Kbang ngui bơta ƀuơn, bơta pràn bè tờm chi lơh sơnơm. Bè tàm xã Đăkrong geh 2 rơndăp broă lơh tam tờm chi lơh sơnơm gam lam lơh tàm ƀòn Kon Trang mờ ƀòn Kon Lanh Te, kờp jơh bă ù ơnàng mờr 40 lồ. Drờm bè hơ̆ sơl, tàm ală xã: Sơn Lang, Kon Pne, Sơ Pai, mờ Krong (kơnhoàl Kbang) neh geh mờr 240 lồ sa nhân tím, kơnuh sơnơm lŭ, đương quy, đinh lăng mờ rơmĭt gam geh tam tơrgùm bal halà hơđơm mƀur brê. Ồng Ngô Văn An, Phó Củ tịc Anih duh broă làng bol xã Đăkrong, kơ̆p kơnờm ală rơndăp broă lơh tờm chi lơh sơnơm rơ̆p pơgồp bơnah tam gơl rài kis lơh sa bơh làng bol jơi bơtiàn dồ ết nă cau dê:“Bơh rơndăp broă lơh tàm Kon Trang (7 lồ) mờ ƀòn Kon Lanh Te (30 lồ), rơ̆p lơh geh tai uă broă lơh ai làng bol tàm xã in. Ală kông ty kung rơ̆p dong kờl tờm sơntìl, phan bơna mờ kĭ sră pơrgon dờp tăc bro phan bơna mờ làng bol tàm tơngai pơn jat tai”.

Bơh tŭ geh Jơnau lơh nền tàm pơrjum sồ 09 bơh Mpồl duh broă Đảng ƀộ càr Gia Lai khoă XV nam 2019 bè prap gàr mờ bơtàu tơnguh tờm chi lơh sơnơm, tus tŭ do, jơh gùt càr neh bơtàu tơnguh geh rlau 4 rơbô 200 lồ phan lơh sơnơm. Gia Lai neh geh 55 phan bơna tờm chi lơh sơnơm geh dờp OCOP (tàm hơ̆ geh 9 phan bơna 4 sơrmañ). Càr geh 4 hìu măi lơh gơlik phan lơh sơnơm, gàr niam jòi gĭt tiah tờm lơh gơlik, mơkung sŏk sền kràñ broă lơh bơh broă tam tus broă lơh gơlik phan. Bal mờ hơ̆, tŭ do càr Gia Lai geh 4 rơndăp broă lơh tam uă tờm chi lơh sơnơm neh geh kĭ, kờp jơh priă bơcri lơh pơgap 497 tơmàn đong mờ 10 rơndăp broă lơh tàm mat hòi jà bơcri priă mờ priă bơcri lơh kờp dŭ lài rlau 7 rơbô 272 tơmàn đong. Ồng Nguyễn Văn Hoan, Phó Kwang atbồ Sở Broă lơh sa mờ Bơtàu tơnguh Ƀòn lơgar càr Gia Lai, pà gĭt, càr lơh geh ală bơta ƀuơn ai ală mpồl lơh sa kă bro in bơcri priă tàm gah tờm chi lơh sơnơm. Ồng Nguyễn Văn Hoan, đơs: “Bè gơ hòi gơ jà bơcri priă, bol añ rơ̆p lơh geh ală bơta ƀuơn ngan rlau jơh ai ală mpồl lơh sa kă bro lòt sền ală tiah gơtùi tam tờm chi lơh sơnơm di pal mờ bơta kis gơs bơh tờm chi tam bơh bơta tờm chi lơh sơnơm dê. Ală rơndăp broă lơh geh đơs den rơ̆p yal tơngĭt ai mpồl lơh sa kă bro in ală tiah gơtùi lơh rơndăp broă lơh. Is ồn bol añ kơ̆p kờñ ngan mpồl lơh sa kă bro ai ală hìu măi lơh gơlik tờm chi lơh sơnơm tus tàm càr”.