Tàm gùl suơn blơn sŭt geh uă ngan ñhơ̆t hòn is mơya kung gam geh uă ngan plai sơl, lŏ Nguyễn Thị Loan, kis tàm xã Dăk Ha, kơnhoàl Dăk Glong, gam sơbăc tê rơwah nàng pĭc ală plai neh dum pơrhê. Lŏ chờ hờp đơs, bơh tŭ geh pơgồp bal tam biăp, kơnuh hữu kơ mờ Hợp ták xã, hìu lŏ geh priă kơl jăp: “Lài do tăc phan gơtìp kal ke ngan tài cèng tăc tàm drà den biăp ờ kas ngan. Tŭ do neh geh Hợp ták xã drơng broă tăc he in bloh, he pal lơh geh ală phan niam ngan den hơ̆ sồng he geh kwơ mờ bè hơ̆ sùm geh bơtàu tơnguh”.

Ồng Đặng Ngọc Hương, Kwang atbồ Hợp ták xã lơh sa suơn sre Dăk Ha, kơnhoàl Dăk Glong pà git, mpồl lơh sa do gam pơgồp bal mờ mờr 100 nă làng bol tam phan tàm bă ù ơnàng rơlao 300 lồ. Phan biăp, kơnuh, plai chi hữu kơ lơh geh kàr lơi ndrờm geh ală cau bơh ƀòn dờng Hồ Chí Minh tus blơi jơh. Cồng nha do là jơh tus bơh broă lơh broă bal nền nòn mờ làng bol lơh broă sa nàng lơh geh ală bơta phan geh bơta niam uă: “Bơta kwơ màng rơlao jơh là pal geh pơgồp bal, bơh broă yal mblàng, lam sồr nàng lơh geh mpồl tàm pơgồp bal, lơh geh mpồl lơh broă bal, tam klăc bal den hơ̆ sồng bơtàu tơnguh pràn”.

Kung jăt gùng dà pơgồp bal nền nòn lơh phan geh lơh bơh suơn sre dê jăt mpồl phan kă bro, Hợp ták xã Thịnh Phát, tàm xã Quảng Sơn, kơnhoàl Dăk Glong neh geh ală cau blơi kơl jăp ai ală bơta phan biăp, kơnuh in, tàm hơ̆ uă ngan là kải thảo. Mò Nguyễn Thị Toản, Kwang atbồ Hợp ták xã pà git: “Tŭ do bol añ gam pơgồp bal mờ dùl kông ty phan sa lơgar Việt Nam dê, là tam geh kải thảo nàng lơh kim-chi Hàn Quốk tàm hìu măi tàm càr Long An mờ tàm kơnhoàl Đức Trọng, càr Lâm Đồng dê. Pa do bol añ kung neh lơh broă bal mờ dùl kông ty tàm Nam Nung tai. Den pah ngai là làng bol kung gam jào kải thảo lài ngan là tus càr Long An, dơ̆ bàr là tus Đức Trọng mờ dơ̆ pe là blơi tơn tàm tiah do”.

Tŭ do gùt càr Dăk Nông neh geh 65 mpồl pơgồp bal lơh, tăc phan geh lơh bơh suơn sre mờ di pơgăp 10 rơbô hìu tus bal. Do là khà ờ uă ngan pơn drờm mờ mùl màl gah lơh sa suơn sre càr do dê. Ồng Phạm Tuấn Anh, Kwang atbồ Sở Nông nghiệp mờ Phát triển Nông thôn càr Dăk Nông yal, càr do geh 4 gah phan tờm bè phan tam jŏ tơngai, tàm hơ̆ kơphe mờ tiêu geh bă ù, khà phan geh lơh uă ngan tàm Tây Nguyên dê. Bơdìh hơ̆ tai là ală phan geh uă mờ geh bơta pràn bè tờm chi sa plai ală bơta (geh di pơgăp 15 rơbô lồ tàm hơ̆ geh sầu riêng, ƀơ, plai màk, pơ-ò, măk ka...), ală bơta biăp, kơnuh (rơlao 15 rơbô lồ).

Jòi drà kă bro ai phan geh lơh bơh suơn sre in, ală Sở, gah lơh broă, ală kơnhoàl, ƀòn dờng tàm càr Dăk Nông neh uă dơ̆ tus sền gùng dà broă kă bro tàm ală drà tăc phan, ală siêu thị dờng tàm ƀòn dờng Hồ Chí Minh; bơyai lơh pơrjum cri bơyai nàng ală mpồl lơh sa kă bro bal mờ làng bol lơh broă sa, Hợp ták xã cri bơyai bal, jòi geh jơnau đơs bal; hòi jà mpồl lơh sa kă bro tus bơcri priă nàng lơh hìu lơh gơs phan.

Ồng Phạm Tuấn Anh pà git, càr gam lơh pràn broă bơtàu tơnguh lơh sa mpồl bal nàng pơgồp bal làng bol lơh broă sa lơh gơs ală bă ù tam phan, tơnguh uă bơta niam phan geh lơh, rơhời bơ̆t bơtàu ală mpồl phan geh lơh bơh suơn sre dê. “Gah lơh sa suơn sre bol añ geh pơn jăt tai lơh geh ală bă ù tam phan di jăt mpồl gah phan, tàm nam do là tơrgùm ai lài kơphe in, tài do là gah phan tờm, tơnơ̆ mờ hơ̆ geh bơyai lơh mờ ală gah phan ndai. Mờ tơl bă ù tam phan geh lơh gơs ală hợp ták xã nàng lơh anih tờm pơgồp bal mờ ală mpồl lơh sa kă bro hờ bơdìh. Mờ ală cau do là cau dong kờl ai làng bol lơh broă sa in tàm ală broă bơyai lơh sa, pơgồp bal bal tăc phan, geh bal bơta ai càn priă jền”.

Càr Dăk Nông tŭ do geh 3 mpồl tam klăc bal Hợp ták xã, 193 hợp ták xã lơh sa suơn sre mờ git nđờ rơhiang mpồl lơh sa bal, suơn dờng tàm gah do dê. Bal mờ broă rơhời di pal mờ ală bơta nàng pơgồp bal lơh sa jăt mpồl, càr Dăk Nông kung gam wèt tus bơtàu tơnguh lơh sa suơn sre geh uă bơta kwơ, mờ ală broă lơh kơphe, tờm chi sa plai pơgồp bal mờ lòt nhơl, lơh broă... Do là ală broă lơh di pal ngan nàng bơtàu tơnguh lơh sa suơn sre mùl màl là dùl tàm 3 bơta tờm lơh sa càr Dăk Nông dê di jăt mờ Ngị quyết pơrjum dờng Đảng ƀộ càr neh geh ai tàm tơngai tus in.