Hìu bơnhă ồng Phan Văn Xuân, ơm tàm ƀòn 2, xã Phú Lễ, kơnhoàl Ba Tri kung bè uă cau lơh broă sa ndai sơl tàm tiah do ờ gam kờñ tai mờ broă lơh ròng kơnrồ lơh puăc. Tài bơh 2 nam do, giă kơnrồ lơh puăc, kơnrồ sơntìl ndrờm gơmù uă ngan, cau ròng kơnrồ ờ hoàn geh priă jền. Ồng Xuân pà gĭt: "Ròng kơnrồ me den dùl nam nggùl gơ deh kòn bè, he tăc kơnrồ me geh 15 tơlak đong, priă cồng geh 5 tơlak đong mờ ờ hềt kờp priă ròng siam, kòp jê tai. Ai ròng kơnrồ dam den dùl nơm kơnrồ dam mìng geh priă cồng 3 tơlak đong lơm mờ ròng bơh 13 tus 15 nhai. Ñhơ̆t den tam is lơm, dilah ờ geh den pal ơpah ù nàng tam ñhơ̆t. Tŭ hơ̆, añ ròng 4 nơm kơnrồ me, pah nam gơ deh geh 8 nơm kòn bè, tŭ do gam mìng 1 nơm lơm, ròng ờ gŏ jai tai, ờ geh priă cồng den ờ gơ dan ròng tai”.

Ai ồng Nguyễn Văn Tân, làng bol tàm xã Phú Lễ pà gĭt, neh ờ gŏ ròng kơnrồ tai, tài bơh ờ geh priă jền: "Kơnrồ giă tăc lơyah ngan, làng bol tàm do ròng hoàc huơr ngan, giă tăc kơnrồ tŭ gơguh tŭ gơmù. Tŭ do làng bol tă sờr jơh wàng ròng uă ngan tài bơh tŭ do ròng kơnrồ lơh puăc kờp bal làng bol hoàc huơr rlau 5 tơlak đong. Pah nam poăc kơnrồ giă 40 tơlak đong dùl nơm, tŭ do gam 30 tơlak đong dùl nơm. Priă blơi lơ̆, phan sa den ờ gơmù, tàm do bơh lài geh 10 hìu bơnhă ròng  kơnrồ tŭ do mìng gam bơh 3 tus 4 hìu bơnhă gam ròng kơnrồ lơm”.

 Ròng kơnrồ lơh puăc, kơnrồ me là lơh sa tờm bơh làng bol xã Phú Lễ dê mờ kờp jơh mpồl kơnrồ rlau 5 rơbô 800 nơm, uă ngan rlau jơh kơnhoàl Ba Tri dê. Mơya pa do, uă hìu bơnhă lời gời wàng ròng, tam gơl lơh broă ndai nàng drơng rài kis, ờ gam kờñ mờ broă ròng kơnrồ tai. Ồng Hạ Văn Chức, Phó Củ tịc Anih duh broă làng bol xã Phú Lễ đơs: "Bàr nam pa do mpồl kơnrồ tàm xã Phú Lễ gơmù uă ngan, tài bơh giă phan sa jơnhoa ir mờ drà tăc bro lơyah ngan den làng bol ờ gam ròng uă bè lài do tai mờ rơwah kơnrồ sơntìl niam geh bơta niam hơ̆ sồng ròng. Tŭ do, tiah do kung geh mblàng yal ai làng bol in ờ gŏ di tăc gơ jal ir mờ pal lời wơl mờ broă lơh geh phan sa tàm dồ bă tiah, mờ priă jền bơh hìu bơnhă dê “ai lơyah tơngai ròng jòng tơngai” nàng bè ờs wơl mpồl kơnrồ”.

 Jat tơrgùm kờp bơh Anih duh broă làng bol kơnhoàl Ba Tri dê, kờp jơh mpồl kơnrồ tàm tiah do dê tŭ do geh mờr 97 rơbô nơm, tơrgùm uă tàm ală xã: An Đức, Phú Lễ, An Bình Tây, An Hiệp, Tân Xuân... geh mờr 2 bơnah 3 mpồl kơnrồ jơh gùt càr dê. Tàm tơngai tŭ do, giă poăc kơnrồ pơgăp 17 tơlak đong dồ tạ; kơnrồ me sơntìl bơh 14 tơlak tus 16 tơlak 500 rơbô đông dùl nơm. Bơh nam 2016, Kụk Sền gàr geh ngui bồ tơngoh jak neh pà sră dờp mat kă bro phan “Kơnrồ Ba Tri”. Bơdìh mờ tàm pơrlòng bè giă bơh kơnrồ blơi bơh lơgar ndai, mpồl kơnrồ tiah do dê kung sùm bơtờp kòp ngan là kòp as sồt kơltau pơnời, cau ròng pal tă tai priă jền sơm kòp, tơrmù tai priă lơh geh. Gơnoar atbồ, gah lơh broă geh gơnoar tiah do neh sền gròi, dong kờl cau lơh broă sa ròng uă mpồl kơnrồ jat gùng dà niam mơya drà tăc bro den ờ hềt gơ tùi tus bal ờ. Ồng Dương Minh Tùng, Củ tịc Anih duh broă làng bol kơnhoàl Ba Tri pà gĭt: “Giă kơnrồ den drà kă bro lơh nền lơm gơ dê, he geh gơnoar lơi nàng lơh nền bơta hơ̆ den pal kong lơm. Kơnhoàl kung neh lơh jơh lơm, lơh mat kă bro Kơnrồ Ba Tri neh lơh sơl rao, he kung neh yal ală phan bơna bè kơnrồ Ba Tri dê sơl. Pah dơ̆ pơrjum càr he geh jơnau đơs jơnau dan sơl... He geh hòi jà bơcri priă lơh drà bơh sơn rờp phan lơh geh bơh suơn sre, geh ù tiah mơya geh 2, 3 nă cau tus jòi gĭt rao, lik rê mơya ờ hềt lơh sră nggal bơcri priă den kal ke ngan”.

Ba Tri là tiah jat kềng gah dà lềng, kong uă ngan gơrềng bơh tam gơl nhơm trồ tiah dê, rài kis làng bol gam kal ke ngan. Broă bơtàu tơnguh wơl lơh sa ngan là gàr niam mờ bơtàu tơnguh mpồl kơn rồ lơh poăc bơh làng bol tiah do dê nàng lơh geh broă lơh drơng rài kis ai làng bol in là broă kờñ pal geh ngan mờ gơnoar atbồ mờ gah lơh broă geh gơnoar tiah do dê pal geh broă lơh kràñ rlau tai, geh cồng nha rlau tai.