Ồng Hà Văn Mừng ơm tàm thôn Lũng Vân, xã Ia Lâu, kơnhoàl Chư Prông, càr Gia Lai pa koh kơl jơh nggùl bă sươn điều 3 lồ. Uă nam đềt mềr mờ tờm chi tam gơdờp mờ ù tiah ro kơnrañ do, ồng Mừng kung gơlơh ờ khin sơl koh kơl mơya sùm tàm 03 nam rềp ndo, giă gar điều gơmù mờr nggùl tơn, cồng nha lơh geh mìng gam 30% lơm den tàng hìu bơnhă ờ jai kong tai. Tềng đăp măt, ồng rơcăng rơ̆p tam kòi tàm bă ù sươn điều pa koh kơl nàng gơtùi geh phan sa tàm rài kis hìu bơnhă in. Ồng Hà Văn Mừng, yal: Bàr pe nam lài, 03 lồ là lơh geh 200 tơlak đong. Mơya bơh tŭ roh giă 3 nam rềp ndo, giă tăc bro gơ tam gơl sùm den añ koh kơl rơhời. Bơtơ̆t dơng dà Plei Pai geh dà rê drơng 500 lồ in den añ cò pơnring ù lơh geh 8 tấn kòi dùl lồ.

Broă koh kơl sang jơh tờm điều gam gơlik geh uă làm bă tiah tàm ù tiah ală xã tiah nhàr lơgar: Ia Lâu, Ia Ga, Ia Piơr, kơnhoàl Chư Prông, càr Gia Lai. Mìng is tàm xã Ia Piơr, bơh lồi nam 2022 tus tŭ do, neh geh 300 lồ điều gơtìp koh kơl sang jơh nàng tam gơl wơl tam tờm chi lơyah ngai, mìng là kòi, tơngời, bùm blàng lơm...Ồng Bùi Văn Tiến, Củ tịc Ủy ƀan Ñân zân xã Ia Piơr, pà gĭt: Tŭ do, xã ờ hềt geh bơto pơlam loh làng mờ dong kờl geh cồng nha ai làng bol in tàm broă tam gơl chi tam. Broă tam chi lơyah ngai do tàm bă ù tam điều lài do mìng là broă lơh bơh sơnrờp lơm gơ dê. Ồng Bùi Văn Tiến, đơs: Gùng dà bơh xã dê là hòi jà, mblàng yal làng bol in, bă ù lơi mờ geh cồng nha den gàr wơl sơngka sền gàr nàng chi kơryan, ờ gŏ di sơrbì chi. Ală bă ù lơi ring, lơ òr geh den tam bùm blàng, tam tơngời...hơ̆ là tờm chi lơyah ngai. Ai bă ù lơi mờ gơtùi gàr geh dà den tam chi sa plai.

Jơnau koh- tam, tam- koh tŭ gơtìp tam gơl giă phan lơh geh bơh sươn sre neh geh tŭ gơlik geh mờ uă phan lơh geh bơh sươn sre tờm ngan tàm càr Gia Lai bè kau su, tiêu, kơphê...tŭ do gơlik geh tai gơwèt mờ tờm điều. Bơta do dùl dơ̆ tai gơ sồr gah lơh broă sa sươn sre pal lơh niam gơnoar broă bơto pơlam tàm broă tam gơl rơndăp tăp sèng chi tam mờ bơ̆t bơtàu ală anih lơh gơlik phan lơh geh bơh sươn sre kơ̆ kơl jăp jŏ jòng tàm tiah he dê.