Ală jơnau cribơyai tàm dơ̆ pơrjum neh bal mờ gơp cribơyai mờ tam pà mờng chài bơh ală rơndap broă lơh bè tơnguh bơta rơcang lài bơh ală cau jak chài, cau kơlôi sơnơng mờ 2 gah neh lam lơh tàm 3 tiah, geh: Tiah đah tô mat tơngai mut dà lơgar, Tây Nguyên mờ Tiah ring dà dờng Cửu Long kung bè jơnau sồr mờ bơta kuơmàng bơh broă bơtàu tơnguh cau lơh broă nàng drơng ai broă lkơlôi sơnơng jak chài tàm gah lơh sa suơn sre gơdờp mờ tam gơl nhơm trồ tiah mờ bơsong ală bơta lòng gơ wèt mờ ală mpồl lơh gơlik kòi phe, phan sa.

Thứ trưởng Ƀộ Nông nghiệp mờ Phát triển Nông thôn ồng Phùng Đức Tiến đơs là, nàng bơsong ală bơta lòng tŭ do, bè: trồ tiah lơh aniai ngai sơlơ kơn jơ̆, tam gơl nhơm trồ tiah, tơrmù tuh tơlik nhơm ƀơ̆, gơguh lơh sa tơlir kung bè ală bơta kòl yan bè bơta chài măi mok bơh ală lơgar blơi phan dê ngai sơlơ uă, 2 gah pal pơn jat tai pơgồp bal jơh nùs nàng đal git ală bơta lòng, bal mờ gơp bơsong dồ bă geh cồng nha.