VOV4.K’ho - Drim òr 28/01, anih duh broă tam klac jat yàng bàp càr Dak Lak bơyai lơh pơrjum tơn jơh srơh pơr lòng kờ` gơ boh dà lơgar tàm làng bol jat yàng bàp nam 2014 mờ mut lơh rơndap broă, kơnòl broă nam 2015. nam 2014 pa do, anih duh broă tam klac jat yàng bàp càr Dak Lak neh pơ gồp bal mờ anih duh broă gah tề lam gùng dră bal dà lơgar Việt Nam càr jơh nùs mut lơh ală broă lơh làng bol jat yàng bàp sùm kis niam, tam klac, dong kờl bal mờ gơp bơtàu tơnguh lơh sa, tơn jơh jơ gloh tơmù rơbah, bơtàu tơnguh nùs nhơm tam klac bal đah ală bòn làng bol ơm kis, đah cau jat yàng mờ cau ờ jat yàng. Tàm nam 2014, làng bol jat yàng bàp gùt càr Dak Lak neh tă pơ gồp bơt bơtàu phan bơna, broă lơh drơng rài kis mpồl bơtiàn, broă lơh niam dong kờl cau, mờ khà priă rlau 13 tơmàn. Anih duh broă tam klac jat yàng bàp càr dờp git kơ nòl lơh broă nam 2015 tơr gùm tàm bơta lam sồr làng bol jat yàng bàp pơnjat tau lơh jat ală dơ\ lam sồr “ Bơt bơtàu rài kis ngac ngar jak chài tàm bòn ơm kis”, “Kis niam rài kis àng sơdah gùng yàng”, “Tài cau rơbah”, dong kờl bal mờ gơp bơtàu tơnguh lơh sa, sơ lơ tus tàm bòn lơgar nàng di tu\ git ală bơta gơlik geh, nùs nhơm di pal bơh ală bòn jat yàng bàp, hìu duh broă jat yàng bào mờ làng bol jat yàng bàp nàng geh jơnau đơs tus mờ ală kơnă gơnuar atbồ, lam sồr làng bol jat yàng bàp jơh nùs pơr lòng lơh geh uă cồng nha tàm broă bơtàu tơnguh lơh sa, lơh broă niam dong kờl mpồl bơtìan.