VOV4.K’ho- Tơnơ̆ mờ tơngai lơh jăt broă tam cah ngaì mpồl bơtiàn rơcang sơndră mờ kòp Covid-19, càr Dak Nông neh ai pờ wơl ală broă lơh gal cau, bè lơh chờ, broă lơh chài rơgơi, tàp pràn să jan.

Bal mờ hơ̆, càr sồr lơh jăt nền nòn ală broă rơcang sơndră mờ kòp pal geh lơh, rơcang sơndră geh cồng nha ală bơta gơbàn. Jăt UBND càr Dak Nông đơs, broă ai pờ wơl ală broă lơh chờ, bơta chài rơgơi, tàp pràn să jan, broă lơh geh tơrgùm gal cau là tài kòp Covid-19 tàm ală tiah neh geh sền gròi. Nàng gàr niam ờ do ờ dă mờ broă rơcang sơndră mờ kòp gơtờp, UBND càr Dak Nông sồr gah nhơl chờ lơh jăt ndang ală broă hòi jà nhơl chờ, mờ lơh jăt broă rơcang sơndră mờ kòp Covid-19 ndang.

Bơdìh hơ̆ tai, càr Dak Nông bơto sồr làng bol lơh sùm broă pơn chèo tŭ lĭk bơdìh hìu, tàm anih mpồl bơtiàn mờ tàm rơndeh; sùm rào tê mờ sơƀong ha là dà lơh kloh vi khuẩn, gàr niam bơta ngài tŭ tìp bal.

Cau mblàng Ndong Brawl