VOV4.K’ho - Tàm ală nam do, bơdìh mờ broă bơcri priă lơh ală broă, tơnguh bơtàu broă lơh sa, tơnguh uă rài kis làng bol, broă bơ̆t bơtàu ƀòn lơgar pa tàm càr Dak Nông gam sền kuơ broă bơyai lơh sa bơh broă tơnguh bơtàu broă lơh HTX. Do kung là khà broă pal geh gơwèt mờ tơl xã lài mờ tŭ geh dờp xã ƀòn lơgar pa.

Tàm ală khà broă ƀòn lơgar pa, khà broă sồ 13 bè bơyai lơh sa geh gơnoar kuơ màng, chồl pràn broă tơnguh bơtàu lơh sa tàm ƀòn lơgar. Kờñ lơh jăt geh khà broă sồ 13, ală HTX neh rơcang tơnguh kơnòl, ngai sơlơ ai tơlĭk gơnoar tàm broă bơt bơtàu ƀòn lơgar pa tàm xã.

                  Hợp tác xã lơh sa suơn sre - Kă bro - Broă lơh drơng ala hữu cơ Hoàng Nguyên

Jăt kơrnoăt geh ai, xã geh dờp khà ƀòn lơgar pa pal geh bơh 1 broă lơh sa geh bơta dờng mpồl lơh broă bal HTX. Gơwèt mờ 7 xã tŭ do gam geh càr sền nàng dờp geh khà ƀòn lơgar pa den geh 11 HTX gam lơh broă geh cồng nha, pơgồp bal tàm broă chồl pràn broă tơnguh bơtàu lơh sa, kă bro, tơnguh uă rài kis làng bol.

Xã Cư̆ Knia, kơnhoàl Cư̆ Jút, càr Dak Nông geh HTX kă bro ai phan lơh sa suơn sre làng bol lơh broă sa mờ HTX lơh sa suơn sre Tiến Thành. Jăt ồng Bùi Xuân Nghiã, kuang atbồ HTX Tiến Thành đơs, HTX gam lơh tiêu mờ kơphe jăt khà organic mờ gam tơlòng lơh kơphe ƀòk. HTX gam pơgồp bal mờ HTX ndai nàng lơh, blơi jơh kòi ST 24 ai làng bol in. Tàm broă lơh, HTX bơyai lơh bơto, tam jào broă lơh kỹ thuật ai làng bol lơh broă sa in nàng tơnguh uă cồng nha, bơta niam phan geh lơh.

Xã Thuận Hà, kơnhoàl Dak Song, càr Dak Nông geh HTX lơh sa suơn sre-kă bro-broă lơh drơng ala hẫu cơ Hoàng Nguyên mờ HTX lơh sa suơn sre Thuận Phát. Mò Trần Thị Thu, Kuang atbồ HTX Hoàng Nguyên pà gĭt, tơngai do, HTX neh ai gùng dà broă lơh mờ tơrgùm làng bol lơh tiêu jăt broă lơh hữu cơ, mờ bă ù rơlao 100 lồ. Kơnờm mờ hơ̆, ală cau tàm HTX geh priă uă, bŭ lah khà priă gar tiêu tàm drà kă bro gơmù uă. Nam 2020, HTX tăc mờ lơgar bơdìh 400 tấn gar tiêu hữu cơ mờ khà priă geh uă rơlao 2 dơ̆ mờ tàm drà kă bro, den tàng làng bol chờ hờp ngan. Broă lơh tiêu Hữu cơ tàm xã ngai sơlơ geh uă, di pal mờ ring niam rơlao.

Uă tiah ndai tàm càr Dak Nông, ală HTX neh mờ gam tơnguh gơnoar bơyai lơh sa, tơnguh uă priă geh làng bol in. Xã Dak Sôr, kơnhoàl Krông Nô geh HTX lơh sa suơn sre-Kă bro-Broă lơh drơng ala tiêu kloh Dak Sôr mờ 30 nă cau mờ HTX lơh sa suơn sre tơlir Thành Phát mờ 12 nă cau. Ală HTX do neh tam jào broă lơh khoa học kỹ thuật ai làng bol in nàng tơnguh uă cồng nha broă lơh sa, kă bro, mờ pơgồp bal mờ ală mpồl lơh sa kă bro nàng blơi phan geh lơh.

Gơwèt mờ HTX kă bro mờ broă lơh drơng ala Bình Minh tàm xã Ea Pô, kơnhoàl Cư̆ Jút neh pơgồp bal mờ làng bol tam kơphe mờ tiêu jăt jơnau kờñ 4C, VietGAP. HTX kung pơgồp bal mờ ală công ty nàng blơi phan geh lơh ai làng bol in...

Kung ndrờm bè hơ̆ sơl, mờ uă broă dong kờl, HTX Lơh sa suơn sre-Kă bro-Broă lơh drơng ala-Ai càn priă Đại Đồng Tiến mờ HTX Tân Thịnh, xã Quảng Khê, kơnhoàl Dak Glong neh hòi jà geh 47 nă cau tus pơgồp bal lơh kơphe jăt jơnau kờñ UTZ. Tàm broă pơgồp bal, HTX sền gròi broă lơh bơh làng bol mờ ai phơng sih, priă, kỹ thuật lơh... nàng lơh geh khà uă, bơta niam phan geh lơh di jăt mờ jơnau kờñ UTZ dê.

Ồng Bùi Hoa Thám, Phó Chủ tịch mpồl tam klăc HTX càr Dak Nông yal, tơngai do, gơnoar atbồ ală cấp sùm ai tơl bơta niam nàng HTX tơnguh bơtàu broă lơh sa, kă bro. ală xã geh uă HTX ngai sơlơ lơh broă geh cồng nha, bơta niam. Tàm hơ̆ uă ngan là ală HTX neh tơnguh niam gơnoar să tờm tàm broă bơ̆t bơtàu ƀòn lơgar pa tàm xã, dong kờl làng bol bơyai lơh sa niam rơlao. tàm hơ̆, ală HTX geh gơnoar niam tàm broă dong kờl làng boo tam gơl phan tam, phan ròng mờ ngui khoa học kỹ thuật tàm broă lơh sa nàng tơnguh cồng nha, bơta niam phan geh lơh.

Ală HTX  ngai sơlơ sền kuơ broă pơgồp bal lơh sa, kă bro phan geh lơh mờ lơh sa jăt broă lơh geh kuơ. Bơh tŭ hơ̆, broă lơh sa suơn sre ngai sơlơ geh kuơ tàm broă lơh sa uă, pơgồp bal tàm broă tơnguh uă priă geh ai làng bol in.

Cau mblàng Ndong Brawl