VOV4.K’ho - Bal mờ kơunòl bơ̆t bơtàu ƀòn lơgar pa, càr Lâm Đồng gam lơh jăt lơh jăt broă lơh tơl xã dùl phan (OCOP). Ală nam do, càr do neh bơcri rơlao 13 tơmàn 300 tơlăk đong nàng lơh jăt rơndăp broă tơnguh bơtàu broă lơh OCOP. Bơh tŭ hơ̆, pơgồp bal tàm broă tơnguh bơtàu lơh sa ƀòn lơgar, tơnguh uă bơta kuơ phan geh lơh, nàng gờñ lơh gơs broă bơ̆t bơtàu ƀòn lơgar pa nam 2021 mờ ală nam pơn jăt tai.

Lâm Đồng là dùl tàm 9 càr, ƀòn dờng geh Chính phủ tơwah, đơng lam broă lơh jăt phan OCOP tơngai bơh nam 2018 tus 2020, wèt tus nam 2030. Bơh bàr nam lơh jăt, càr do neh geh 124 bơta phan geh dờp OCOP 5 sơrmañ, 4 sơrmañ mờ 3 sơrmañ cấp càr mờ cấp dà lơgar. Cồng nha do là broă lơh ngan dờng màng bơh càr Lâm Đồng dê tàm broă bơ̆t bơtàu broă lơh sa, bơ̆t bơtàu wơl broă lơh sa suơn sre nàng tơnguh bơtàu lơh sa tàm tiah ƀòn lơgar, tơnguh uă priă geh, rài kis làng bol tàm broă lơh jăt jơnau kờñ dà lơgar bơ̆t bơtàu ƀòn lơgar pa, rơhời lơh geh cồng nha mpồl khà broă bè lơh sa mờ bơyai broă lơh sa.

Tàm kơnhoàl Lạc Dương, kơnhoàl do geh sền là tiah lam lài tàm broă tơnguh bơtàu pràn ală phan tờm geh lơh jăt broă lơh phan OCOP. Tơnơ̆ mờ 2 nam lơh jăt broă lơh OCOP, khà priă geh bơh broă lơh sa suơn sre kơnhoàl dê geh 300 tơlăk đong tàm 1 lồ 1 nam, uă rơlao 3 dơ̆ pơn drờm mờ bè ờs gùt lơgar. Lạc Dương kung neh geh uă broă lơh sa suơn sre công nghệ cao, lơh sa suơn sre ngăc ngar mờ broă pơgồp bal, blơi lài phan geh lơh bơh làng bol in, bơh tŭ hơ̆ pleh mờ bơta gơtìp rềs àr “geh tơnhào, ờ geh priă”. Jăt Chủ tịch UBND kơnhoàl Lạc Dương ồng Sử Thanh Hoài yal, nàng dong kờl làng bol chồl pràn broă lơh jăt phan OCOP, kơnhoàl gam rơhời lơh gơs rơndăp broă lơh anih lơh gơs phan geh lơh bơh broă lơh sa suơn sre tơnơ̆ mờ tơnhào ơnàng 25 lồ. Bơdìh hơ̆ tai, pơn jăt tai bơcri priă tàm ală rơndăp broă tơnguh bơtàu phan lơh sơnơm geh kuơ làng bol kòn cau dê bè: Atiso, kơnuh Ngọc Linh...

Đơs bè bơta kuơ bơh broă tam gơl phan tam mờ gùng dà chồl pràn phan OCOP, Chủ tịch UBND xã Dà Sar, ồng Liêng Jrang Ha Ro Ky pà gĭt, nam 2016 neh geh tơl nă cau tàm xã mìng geh 18 tơlăk 500 rơbô đong, tus nam 2020 neh geh rơlao 42 tơlăk đong tàm 1 nă 1 nam. Mờ khà priă geh bè do, làng bol neh gơtùi iang nùs lơh broă sa.

Geh bơto bơtê di pal, dong kờl bè khoa học-công nghệ, do là bơta pràn nàng làng bol gơtùi sơrlèt mờ kal ke nàng brồ guh lơh pas bơh tàm bă ù ƀòn lơgar tờm. Tam pà bè ală bơta kuơ broă lơh sa uă bơh broă ngui công nghệ pơr mờ càl bơh lơgar Nhờk gơwèt mờ plai hồng tàm xã dê, Chủ tịch Hội Nông dân xã Xuân Trường, ƀòn dờng Dà Làc, càr Lâm Đồng ồng Lê Thịnh pà gĭt: Lài do ờ hềt geh công nghệ lơgar Nhờk, làng bol mìng gơtùi tăc plai hồng ris mờ khà priă ờ uă ngan (uă ngan là 3 rơbô đong tàm 1 kĭ). Tơnơ̆ mờ tŭ làng bol geh tus bal mờ ală ơdŭ bơto mờ gĭt ngui công nghệ pơr mờ càl, bơdìh mờ plai hồng ris, tŭ do xã Xuân Trường gam geh tai phan geh lơh bơh plai hồng pơr mờ càl geh cau ngui sa dờp uă ngan. Lồi nam lài, phan do geh ai sră dờp OCOP 3 sơrmañ. Jăt jơnau kơlôi sơnơng bơh làng bol dê, nàng geh 1 kĭ plai hồng pơr mờ càl, làng bol geh pơr bơh 4 tus 5 kĭ plai ris mờ khà bơh 12 tus 15 rơbô đong. Mơya tŭ neh pơr rañ, khà priă geh di pơgăp 250 rơbô đong tàm 1 kĭ; tơnơ̆ mờ tŭ neh kờp jơh khà priă bơcri, làng bol mờ mpồl lơh sa kă bro geh priă cồng uă ngan. Tŭ do, khà priă geh tơl nă cau pah nam tàm xã Xuân Trường geh 110 tơlăk đong. Cồng nha do pơgồp bal tàm broă jòi geh jơnau kơlôi sơnơng bè priă geh tàm broă bơ̆t bơtàu ƀòn lơgar pa tàm xã do dê.

Jăt Kuang atbồ Sở Nông nghiệp mờ Phát triển Nông thôn càr Lâm Đồng ồng Nguyễn Văn Sơn yal, càr gam chồl pràn tam gơl pa mờ tơnguh bơtàu ală broă lơh, broă pơgồp bal lơh sa mờ kă bro; chồl pràn broă tơnguh bơtàu khà măt kă bro phan geh lơh, khà măt “Dà Làc-Pơgồp bal bơta niam bơh ù tiah niam” mờ lơh jăt broă lơh tơl xã dùl bơta phan OCOP. Tềng đăp măt, chồl pràn broă ngui công nghệ cao tàm broă lơh sa mờ lơh gơs phan ală phan OCOP jăt gùng dà broă lơh gơs niam, pơgồp bal tàm broă tơnguh uă khà kuơ phan geh lơh tàm dùl bă ù tam gơguh uă rơlao dơ̆ pơn drờm mờ lài do.

Geh gĭt, tus do, càr Lâm Đồng geh chồl pràn broă lơh sa rơlao tai ală phan geh bơta pràn, geh sền là bơta kuơ bơh càr dê mờ lam sồr làng bol, mpồl lơh sa kă bro pơgồp bal gơs mpồl, nàng ai geh phan geh tơl niam dờp phan OCOP. Pơgồp bal tàm broă tơnguh bơtàu broă lơh nhơl chờ tam phan nàng tơnguh bơtàu broă lơh sa. Sở Nông nghiệp mờ Phát triển Nông thôn càr gam mhar lơh gơs rơndăp broă tơnguh bơtàu broă lơh sa suơn sre jăt broă lơh uă gah broă mờ nhơl chờ pơgồp bal mờ broă lơh sa suơn sre.

Cau mblàng Ndong Brawl