VOV4.K’ho - Tàm broă bơ̆t bơtàu ƀòn lơgar pa, gơnoar bơh mpồl Đoàn ơruh pơnu kuơ màng ngan, tàm hơ̆ uă ngan là tàm broă lam sồr mờ hòi jà cau lơh broă. Broă lơh bơh cau kơnòm să sùm ñhăp ñhar, pràn kơl dang, khăt tàm bơta mùl màl bơh tơl tiah dê. Tàm tơngai tŭ do, broă dong kờl ală hìu nhă geh rài kis gơtìp kal ke tài gơrềng bơh kòp Covid-19 là geh kuơ ngan. Tàm xã tiah ngài Ia Blứ, kơnhoàl Chư Pưh, càr Gia Lai, mpồl Đoàn ơruh pơnu neh tơlik geh gơnoar do, tàm hơ̆ rùp rài cau ùr Bí thư Đoàn xã Trương Thị Ngọc Lan là geh uă ngan.

Jơ lơh broă tờm neh jơh bơh jŏ ngan, mơya lŏ Trương Thị Ngọc Lan, Bí thư Đoàn xã Ia Blứ (kơnhoàl Chư Pưh, càr Gia Lai) mờ ờ uă đoàn viên, ơruh pơnu kung gam ơm tàm hìu lơh broă UBND xã, dờp phan geh lơh boh broă lơh sa suơn sre, phan làng bol dong kờl ai tiah gơtìp kòp Covid-19 in.

                   Lŏ Lan (đah ma) bal mờ ală ơruh pơnu tàm xã Ia Blứ dong kờl làng bol gơtìp rơƀah

Ală phan dong kờl geh uă ngan là phan sa geh kuơ, bè biăp, plai chi ris, sơn prồm tê, chèo, ào, mpha gàr să… Jơh ală phan lơi làng bol pơyoa tus mhar geh ală bơyô gam kơnòm să dờp, tam cah is. Geh mpồl lơh broă pơn diang tus tàm ală tiah tam cah is ha là mpồl lơh broă kơnòl tàm tiah sơnrờp xã dê; geh mpồl lơh broă geh jun tus Bình Dương, ƀòn dờng Hồ Chí Minh dong kờl tiah gơtìp kòp in. Lŏ Nguyễn Thị Hà, kis tàm ƀòn Thiên An, Xã Ia Blứ cèng phan dong kờl tus pà git: “Bơh broă hòi jà bi Trương Thị Ngọc Lan, Bí thư Đoàn xã dê, den phan ờ geh uă sơl, añ kung tă pơgồp ờ uă thùng ƀung mi nàng bal mờ ală cau pơyoa tus làng bol tàm tiah tam cah is mờ làng bol kis tàm tiah gơtìp kòp. Añ kung dong kờl bal mờ ală cau, phan ờ geh uă, nùs nhơm geh uă, kơ̆p kờñ kòp gơtờp mhar jơh nàng ală làng bol iang nùs lơh broă sa”.

Ndrờm sùm bè hơ̆ pah ngai mờ rơndeh Honda, di lah ờ ru mờ ală kơnòl lòt lơh broă ngài, lŏ Lan tus còp mờ lam sồr ală hìu rơ[ah tàm xã. Ồng Nguyễn Văn Doan, kis tàm ƀòn Thiên An, xã Ia Blứ neh mờr 60 sơnam, gam ròng ùr bi rơlao 70 neh kra să bồ ờ sô tai. Bàr nă oh mờ mi ồng Doan ndrờm ờ geh oh kòn, ờ geh broă lơh, kis kơnờm bal tàm hìu tam klăc lơh neh klar. Pa dờp phan dong kờl bơh xã bal mờ să tờm Bí thư đoàn xã, ồng Doan ngoh rơngăc ngan đơs: “Bàr nă oh mờ mi kis kung glar bòl, lŏ ùr añ gơtìp uă kòp tê jê să den tàng ờ gơtùi lơh broă lơi, añ ờ geh broă lơh sơl. Dơ̆ sào sa tàm hìu geh phan lơi sa phan hơ̆, bè biăp, ƀung mi. Geh priă den lòt drà di lah ờ geh den sào piang mờ dà màn, biăp nàng kis gan ngai. Đoàn ơruh pơnu kung tus dong kờl ƀung mi, phe mờ dà màn den tàng añ kung ờ hoan gơtìp kal ke, đoàn ơruh pơnu geh nùs nhơm niam mờ bàr nă oh mờ mi añ den kuơ màng ngan”.

                                  Al pò phan hòi jà bơh làng bol nàng dong kờl tiah gơtìp kòp in

Bơdìh mờ ală broă dong kờl ni sơna ai cau rơƀah mờ ală kơnòm bơsram tàm xã in, Đoàn ơruh pơnu xã Ia Blứ gam sùm lam sồr, pơgồp bal nàng dong kờl ală hìu bè rài kis broă lơh sa in nàng làng bol geh tai phan sơrlèt mờ kal ke, bè dong kờl sơntìl be nàng ròng, sơntìl phan tam, lơh hìu cau rơƀah in.

Đoàn viên ơruh pơnu xã Ia Blứ, kơnhoàl Chư Pưh, càr Gia Lai ndrờm git loh rài kis broă lơh bơh cau atbồ să tờm kung gơtìp kal ke. Lŏ Trương Thị Ngọc Lan gam dùl nă să ròng 2 nă kòn ùr gam dềt. Bơklao lŏ gơtìp kòp ờ pràn leh jroă mờ gam gơtìp kòl tàm tiah kòp ƀòn dờng Hồ Chí Minh. Lŏ Lan mìng pồn jơnau moăt, mờ nting is să tờm pal pơn jăt tai là cau dong kờl kơl jăp, là cau lam lài bơh ơruh pơnu xã dê, lŏ Trương Thị Ngọc Lan yal: “Tus tàm bơta lơi he kơnờm tàm bơta hơ̆, broă lơh kuang pal lơh, tŭ do gơtìp kal ke den ală cau kung kal ke bal, mìng tài ờ bơtoah gơdê. He neh ai bloh, broă lơh là broă lơh, bơta kòp bè do he kung ờ gơtùi lơh bơta lơi ndai tai. Rê tàm hìu lơh broă tàm hìu, lòt lơh broă den kung gam pal lòt lơh broă, ờ gŏ di ờ sŭk den ờ geh bơsong jơnau lơi”.

Lŏ Phạm Thị Thu Thảo, Bí thư Huyện Đoàn Chư Pưh, càr Gia Lai pà git: nam 2020, Ia Blứ geh UBND kơnhoàl rơwah lơh xã lam lài bè broă tơnguh bơtàu lơh sa mpồl bơtiàn. Jăt mờ hơ̆, Đoàn ơruh pơnu kung ai loh gơnoar kơnòl bơh să tờm dê. Xã neh pơgồp bal khà priă krơi is bơcri di pơgăp 1 tơmàn 700 tơlăk đong nàng dong kờl sơn tìl phan tam, phan ròng di pal. Tus tŭ do, xã neh tơnguh bơtàu geh 720 lồ ù tam tờm chi sa plai, be geh mờr 11 rơbô nơm, rơlao 3 lồ ù tam tờm jơu ròng tu mờ rơlao 400 lồ ù tam kơphe. Tàm hơ̆ geh uă hìu đoàn viên, ơruh pơnu neh sơrlèt mờ kal ke brồ guh lơh pas. Mờ broă lơh jăk chài bơh mpồl đơng lam Đoàn xã, tàm hơ̆ uă ngan là Bí thư Trương Thị Ngọc Lan, ală broă lơh, bơnah broă ơruh pơnu neh lơh di pal mờ mùl màl, den tàng dờp geh uă broă kờñ bal bơh đoàn viên ơruh pơnu. “Gơwèt mờ bi Trương Thị Ngọc Lan, Bí thư đoàn xã Ia Blứ là dùl bí thư lơh broă ñhăp ñhar ngan mờ jơh nùs mờ broă lơh đoàn tàm xã dê. Bŭ lah rài kis hìu nhă gơtìp uă kal ke, bơklao gơtìp kòp jroă gam kơ̆p nàng bơkiar leh tàm ƀòn dờng Hồ Chí Minh, mơya tài kòp gơtờp den tàng pal ơm kơ̆p ờ hềt gơtùi bơkiar, gam dùl nă bi Lan lơh broă dà lơgar ndang mờ lơh broă tàm hìu nhă bal mờ ròng bàr nă kòn gam dềt ndang. Mơya, sơrlèt jơh mờ ală kal ke, bi Lan sùm jơh nùs mờ ală broă lơh đoàn mờ huyện đoàn geh ai bal mờ đoàn xã Ia Blứ là mpồl lam bồ lài tàm broă lơh đoàn kơnhoàl dê. Pa do, tàm broă rơcang sơndră mờ kòp gơtờp, bi Lan kung bè đoàn xã Ia Blứ ndrờm geh dờp sră jờng rơ bơh Tỉnh đoàn, Huyện đoàn lơm”.

Mờ broă jơh nùs, đềt mềr lam lài mờ ñhăp ñhar tàm broă lơh đoàn, lŏ Trương Thị Ngọc Lan gam ai tơngŏ bơta pràn niam, chồl pràn ală broă lơh đoàn tàm xã Ia Blứ, lam sồr ơruh pơnu lơh broă lơh sa. Mờ bơh tŭ hơ̆, Đoàn xã Ia Blứ pơn jăt tai lơh gơs jăk chài ală kơnòl, ngai sơlơ geh uă broă pơgồp bal mùl màl tus mờ mpồl bơtiàn, pơgồp bal kuơ màng tàm broă bơ̆t bơtàu ƀòn lơgar pa tàm xã do dê.

Cau mblàng Ndong Brawl