VOV4.K’ho - Broă lam sồr tơnguh uă jơnau git wă tàm broă rơcang sơndră mờ kòp Covid-19 tàm ƀòn geh kuơ màng ngan, tàm hơ̆ uă ngan là tàm tŭ geh uă cau tàm tiah gơtìp kòp rê. Lŏ Nguyễn Thị Phương, kòn cau Tày, kis tàm xã Cư̆ Mgar, kơnhoàl Cư̆ Mgar, càr Dăk Lăk geh broă lam sồr bơceh lơh niam ngan, hơ̆ là cih jơnau pa tàm jơnau đơs Then jăt tơngu me rơcang sơndră mờ kòp Covid-19.

Bơh jơnau cih ƀuơn wă, geh uă tơngu me mùl màl neh geh lŏ đơs mờ săp đơs ròm niam pơgồp bal mờ đờng tính dê gơlơh ngoh rơngăc ngan. Gơl video bơh lŏ Phương geh tơlik tàm pang internet mpồl bơtiàn Facebook, Youtube neh geh uă cau tàm mpồl bơtiàn sền ngan.

Do là ală jơnau đơs pơn đik geh lŏ Nguyễn Thị Phương, kòn cau Tày, kis tàm ƀòn 5, xã Cư̆ Mgar, kơnhoàl Cư̆ Mgar, càr Dăk Lăk đơs jăt jơnau đơs Then kòn cau Tày - Nùng dê. Tàm jơnau đơs pơn đik geh lŏ Phương đơs geh gơl: “Tam dră mờ kòp bè tam dră mờ ling sò tơm, he dùl nùs bal tus nàng kơrian kòp gơtờp… ală cau, cau lơi kung là cau ling, he tus bal lơh ngan sơrlèt”…

                                   Lŏ Nguyễn Thị Phương đơs tàm internet mpồl bơtiàn

Mờ jơnau đơs niam, ƀuơn wă, mơya neh cèng jơh nùs nhơm đơng lam “tam dră mờ kòp bè tam dră mờ ling sò tơm” bơh Thủ tướng Chính phủ lam sồr, jơnau bơto sồr “5K” bơh Bộ Y tế tàm broă rơcang sơndră mờ kòp gơtờp. Mờ tam pà bal, ring bal mờ bota kal ke, phi să bơh mpồl y bác sĩ, mpồl kuang àng, cau ling… tàm tiah lài tam dră mờ kòp gơtờp. Bơh tŭ hơ̆, lam sồr ală cau lơh jăt nền nòn ală kơrnoăt tàm broă rơcang sơndră mờ kòp gơtờp, geh nùs nhơm niam, pin dờn geh kơrian kòp gơtờp nàng rê wơl mờ rài kis lơngăp lơngai.

                               Lŏ Nguyễn Thị Phương soh phan ờs mờng kòn cau nàng đơs then

Mìng tơnơ̆ mờ 2, 3 ngai geh tơlik tàm internet mpồl bơtiàn Facebook mờ Youtube, jơnau đơs pơn đik neh geh git nđờ rơbô nă cau sền, git nđờ rơhiang nă cau sền mờ geh tam pà bal. Bi Nguyễn Trung Hải, kòn cau Tày, kis tàm thị trấn Quảng Phú, kơnhoàl Cư̆ Mgar sền gơl video geh tơlik tàm Facebook pà git: “Bơh broă sền video lŏ Phương đơs añ gŏ niam ngan, bơh jơnau đơs, săp đơs, săp đờng ntas. Jơnau đơs neh lam sồr, pơlam nùs nhơm làng bol ală jơi bơtiàn kòn cau dùl nùs bal tam dră mờ kòp, mờ bơta tŭ do den gơdờp ngan. Broă ngui jơnau đơs nàng lam sồr, làng bol iăt jơnau lam sồr mờ jơnau đơs pơn đik kòn cau dê, den dong kờl làng bol ƀuơn wă. Să tờm añ mờ ală cau lơi iăt jơnau đơs pơn đik bơh lŏ Phương đơs ndrờm di nùs ngan mờ git tàm broă rơcang sơndră mờ kòp gơtờp rơlao”.

              Lŏ Nguyễn Thị Phương lam sồr dong kờl tàm kes priă rơcang sơndră mờ kòp Covid-19

Lŏ Nguyễn Thị Phương yal, tàm ală ngai do, lŏ mờ ală cau tàm mpồl rơcang sơndră mờ kòp tàm ƀòn, tàm xã gam lơh ngan lam sồr bè broă rơcang sơndră mờ kòp ai làng bol in, kung bè broă dong kờl tàm tiah tam cah is ai cau lơh broă rê bơh ală tiah gơtìp kòp. Lơh ngan tàm tơngai ơm rơlô, lŏ Phương neh pờ tàm internet nàng jòi jơnau đơs crih niam geh tơngu me bè broă rơcang sơndră mờ kòp Covid-19 nàng lơh gơs jơnau đơs then tơnơ̆ mờ hơ̆ geh đơs is mờ lơh lơma video pờ tàm internet mpồl bơtiàn. Jăt lŏ Phương, đơs then mờ đờng tính là jơnau đơs pal geh sùm bơh làng bol kòn cau Tày-Nùng dê. Ƀòn lŏ kis mờ ală ƀòn rềp bal geh gal ngan kòn cau Tày-Nùng ơm kis bal, den tàng broă lam sồr do geh dong kờl làng bol ƀuơn wă mờ ƀuơn kah rơlao. “Gŏ broă dờp bơh ală cau gơwèt mờ broă lơh añ dê den añ chờ hờp ngan. Bŭ lah tŭ do añ ờ ru ngan mờ broă dong kờl rơcang sơndră mờ kòp gơtờp tàm xã, mơya tus do kung gam lơh ngan ai tơngai jòi geh tai ală jơnau đơs then pa mờ jơnau đơs di pal nàng pơn jăt tai đơs ală jơnau đơs hơ̆ gơs jơnau đơs then nàng lam sồr làng bol”.

Mò Hồ Thị Thanh Hải, Chủ tịch Ủy ban Mặt trận dà lơgar Việt Nam xã Cư̆ Mgar pà git, làng bol kòn cau Tày-Nùng geh rơlao 16% khà kờp làng bol kis tàm xã. Jơh ală làng bol ndrờm tàm sơnam lơh broă tàm xã tŭ do gam lòt lơh công nhân tàm ală càr Bình Dương, Đồng Nai mờ ƀòn dờng Hồ Chí Minh. Ală ngai do, tŭ ală càr mờ ƀòn dờng do gơtìp kòp mờ tam cah ngài mpồl bơtiàn jăt Chỉ thị sồ 16, uă cau lơh broă neh rê tàm ƀòn nàng pleh mờ kòp gơtờp. Den tàng, bal mờ broă lam sồr dong kờl mờ dờp ală bơta phan dong kờl tàm broă rơcang sơndră mờ kòp gơtờp, den broă lam sồr tơnguh uă jơnau git wă mờ broă pơgồp bal bơh làng bol dê là kuơ màng ngan. Là kuang atbồ Mpồl lơh broă Mặt trận ƀòn, mờ kung là cau atbồ mpồl cau ùr ƀòn, lŏ Nguyễn Thị Phương neh geh uă broă lơh tus bal mờ ală mpồl rơcang sơndră mờ kòp gơtờp. Tàm hơ̆, geh ngui jơnau đơs then nàng lam sồr là broă lơh pa, di pal mờ jơnau đơs crih tŭ do bơh uă làng bol kis tàm xã dê. “Lŏ Phương là dùl tàm ală kuang bàng ñhăp ñhar ngan, tus bal ală broă lơh bơh xã dê, bi sùm geh gơnoar atbồ pin dờn mờ làng bol gơboh ngan. Tơngai pa do bi neh ai jơnau đơs then kòn cau bi dê nàng lam sồr làng bol tàm broă rơcang sơndră mờ kòp gơtờp. Do là broă lơh pa ngan, geh cồng nha gơwèt mờ xã Cư̆ Mgar đơs is mờ gùt kơnhoàl Cư̆ Mgar đơs bal”.

Đơs then, đờng tính là jơnau đơs pal geh bơh uă kòn cau Tày-Nùng dê tàm xã. Tơnguh bơta niam, bơta chài bơh jơnau đơs pơn đik mờ phan đơs crih ờs mờng kòn cau dê, lŏ Nguyễn Thị Phương neh cih jơnau đơs di pal nàng lam sồr bè broă tam dră mờ kòp bè tam dră mờ ling sò tơm, kung bè broă kal ke bơh mpồl kuang bàng tam dră mờ kòp tàm anih sơnrờp dê, bơh tŭ hơ̆ hòi jà tơnguh uă jơnau git wă bơh làng bol nàng tus bal tàm broă rơcang sơndră mờ kơrian kòp Covid-19 gơtờp.

Cau mblàng Ndong Brawl