VOV4.K’ho – Rơcang tus nhai ơruh pơnu nam 2017, wèt tus pơrjum mpồl ơruh pơnu gùt lơgar mờ tơngkah 86 ngai crơng gơs Đoàn ơruh pơnu Cộng sản Hồ Chí Minh, cau kơnòm să càr Gialai mut lơh uă broă lơh ngan ngồn, geh kuơ. Bơta pràn cau kơnòm să mờ nùs nhơm lam lài cau kơnòm să càr Gialai dê gam lời wơl ală tềl kah kir niam ngan tus mờ làng bol, ngan là tàm ală tiah sar lơgar ngài :

Tềng gùl dòr bơnơm, tàm bơta duh rơ ồ bơh tơngai nhai prang tàm Tây Nguyên dê, git nđờ jơt nă ơruh pơnu, cau ìa sơ bèng, cau ìa wơu, cau ìa jơ lèng tryang trỳông ngan lơh broă. Ală cau kơnòm să gam tờ rơbòng nàng crap brong dà bơh bơnơm Kon Ma Har rê hờ bòn Kon Jôt jòng rlau 3 kơi sồ, lòt gan ală bă tiah kal ke ngan. Do là broă kơn jơ\ ngan rlau jơh tàm broă lơh dà sàng kloh bơh Mpồl ơruh pơnu càr Gialai đơng lam mut lơh, dong làng bol xã kal ke Hà Đông. Bơnah broă do uă ngan jàu ơruh pơnu Quân đoàn 3 dê mut lơh mờ bơta dong kờl bơh ơruh pơnu tàm [òn lơgar dê. Tê ìa jơ lèng, àu suh dà kơl hề, Thiếu uý Đậu Đình Oánh, Phòng tham mưu Sư đoàn 10, Quân đoàn 3 pà git: “Geh kuang đơng lam Sư đoàn jàu kơnòl dong làng bol, bơh tàm tơngai ơm ndo, den bol a` git là rài kis làng bol tiah do dê bòl glar, kal ke ngan. Bơh hơ\, bol a` geh mut lơh mờ nùs nhơm lơh ngan uă rlau jơh, lơh ngan lơh jơh ală kơ nòl broă geh jàu.”

Cau ling kơnòm să crap brong dà

Tàm dơ\ dong xã Hà Đông lơh broă lơh dà sàng dơ\ do, Quân đoàn 3 sồr 45 nă kuang bàng, ơruh pơnu bơh Sư đoàn 10 dê rê ơm bal, sa bal, lơh bal mờ làng bol. Thượng tá Nguyễn Văn Tuyên,Chủ nhiêm Chính trị Sư đoàn 10, Quân đoàn 3 pà git, mpồl dờp lơh 2 broă lơh là tờ rơbòng mờ pơndiang phan nàng lơh broă lơh dà sàng kloh. Rơndap broă ai tơlik là 1 nhai, mpồl gam lơh ngan mut lơh mờ digơlan lơh jơh broă lơh lài mờ tơngai pơrgon. Thướng tá Nguyễn Văn Tuyên yal: “Tus tu\ do, kuang bàng, ơruh pơnu lơh broă jơh nùs ngan. Pah ngai, ndrờm lơh rlau mờ rơndap broă ai tơlik. Rơndap broă Quân đoàn dê kung bè mpồl ơruh pơnu càr dê là lơh ngan tus ngai 20/3 ai ngui broă lơh. Nùs nhơm lơh ngan bơh kuang bàng, ơruh pơnu dê là geh lơh gơs broă lơh lơh gờ`.”

Bal mờ lơh broă geh cồng nha den bơta pràn cau kơnòm să ling klàng dê neh khồm dùl bơta pràn pa tus ơruh pơnu tàm [òn lơgar in. Bi Sưh, kòn cau Bơnhàr, Phó bí thư đoàn xã Hà Đông pà git, ơruh pơnu tàm xã ờ mìng jơh nùs mut lơh ală bơta broă nàng lơh broă lơh dà sàng mờ gam nhap nhar rlau tàm ală srơh chài rơ gơi, đơs crih tamya, tàp pràn să jan. Bi đơs: “Bơh tu\ ală cau ling tus ndo den làng bol, ơruh pơnu tàm xã đơs bal chờ hờp ngan, nhap nhar ngan. Làng bol, ơruh pơnu mờ ală cau ling lòt lơh bal. Bơdìh mờ broă lơh tàm trồ ngai den [ùi mho gam tàp pràn să jan, nhơl bơlai, nhơl `o\, tìp mat chài rơgơi.”

Cau ling mờ đoàn viên lơh broă bal

Rê bal tus tàm xã dong làng bol, bi Phan Hồ Giang, Phó bí thư Tỉnh đoàn Gialai pà git, Hà Đông là dùl tàm ală xã kal ke ngan rlau jơh càr dê. Nđờ nam pa do, trồ prang dờng soat dà gơlik geh rài kis, rài kis làng bol dê sơlơ kal ke rlau tài ờ tơl dà. Den tàng, kờ` dong làng bol kung là kờ` ơruh pơnu tă pơgồp bơta pràn cau kơnòm să dê, Tỉnh đoàn neh lam lơh mờ đơng lam mut lơh broă lơh dà sàng kờp priă rlau 1 tơmàn ai xã Hoà Đông in. Mờ bal mờ broă lơh do, kờ` tơngkah 86 nam ngai crơng gơs Đoàn, Tỉnh đoàn kung mut lơh ờ uă broă lơh ndai tàm ală xã kal ke. Bi Phan Hồ Giang pà git: “Bơh bồ nam mơ, broă lơh sơn rờp, broă lơh ơruh pơnu kơnă càr den bol a` neh lam mut lơh bơh ngai 19/2 mờ digơlan lơh gơs di tơngkah 86 nam ngai crơng gơs Đoàn. Tàm nam 2017, den ală kơnă Đoàn ơruh pơnu càr dê kung lơh pa mờ lơh niam rlau 70 nơm hìu ai ală hìu nhă kal ke in.”

Ơm rềp tàm [òn lơgar, bơyai mut lơh geh cồng nha mờ tơl niam neh dong broă lơh ơruh pơnu kơnă càr nam 2017 bơh Tỉnh đoàn Gialai dê tàm xã Hoà Đông gam mut lơh geh cồng nha. Ờ gam jo\ tai, làng bol xã Hoà Đông geh ngui dà sàng bơh bơnơm Kon Ma Har, bơh bơta pràn cau kơnòm să dê. Broă lơh ai go\ bơta pràn cau kơnòm să bơh ơruh pơnu càr Gialai dê gam geh brồ guh nàng tă pơgồp mpồl bơtiàn in.

          Cau cih mờ yal tơnggit K’Duẩn