VOV4.K’ho– Lơh mờ atbồ sră kimta làng bol là gùng dà bơh Chính phủ dê. Lơh jat jơnau đơng lam bơh Bộ Kuang àng dê, Mpồl kuang àng càr Dak Lak gam sơlơ tơnguh cau lơh broă, tơnguh tŭ tơngai lơh broă nàng dờp sră nggal yal tơnggit lơh sră kimta làng bol crap chíp điện tử ai làng bol in gàr bơta niam mờ di broă rơndap lơh ai tơlik.

Tiah tờm drơng broă hành chính dà lơgar càr Dak Lak là 1 tàm 18 anih lơh sră nàng lơh kimta làng bol crap chíp điện tử tàm gùt càr. Mờ 3 mpồl lơh broă tam pà gơs 3 dơ̆: àng drim, trồ mho mờ trồ mang, bơh 7 jơ drim tus 10 jơ mang, pah ngai dờp mờr 600 sră nggal bơh làng bol dê tus lơh sră kimta làng bol. Tơngai lơh broă gơguh tus 15 jơ tàm dùl ngai ala mờ 8 jơ tàm gùl ngai bè lài do, neh lơh gơlik bơta ƀuơn làng bol in tus yal tơnggit lơh sră kimta. Ồng Y Dhêc Kbuôr, dùl nă cau ơm tàm ƀòn Ako Dhông, sơnah ƀòn Tân Lợi, ƀòn dờng Buôn Ma Thuột tus lơh sră tàm klo ngai pà git: “Oh mi lơh broă jơh nùs ngan nàng gơtùi lơh jat jơnau kờñ mờ tŭ tơngai lơh sră kimta làng bol in. Mờ nùs nhơm geh kơnòl uă bè do, bol hi kung gŏ gơ lơh chờ hờp ngan tài tus ndo geh lơh mhar ngan. Mờ tŭ tơngai bè do añ gŏnùs nhơm lơh broă pơn drờm mờ broă lơh ngan ngồn là uă ngan”.

Kuang àng Dak Lak lơh ngan dong làng bol lơh sră kimta

Ồng Kiều Văn Trầm, Phó Kuang atbồ Cơldŭ kảnh sát atbồ hành chính bè ờdo ờdă mpồl bơtiàn Kuang àng càr Dak Lak pà git, bal mờ tơnguh rlau 2 dơ̆ tŭ tơngai lơh broă pah ngai mờ lơh sùm 7 ngai tàm poh, gah Kuang àng gam sồr kuang bàng geh bơta chài rơgơi lơh broă, geh mờng chài tus kấp hơđơm dong làng bol lơh sră nàng lơh kimta. Bulah bè hơ̆, tài bă tiah dờng ơnàng, làng bol ơm kis rah rài, khà phan bơna ờ huan uă den tàng broă lơh sră kimta gam gơtìp uă kal ke. Tềng đap jơnau sồr uă bơh broă lơh dê, Kuang àng càr Dak Lak sồr tơnguh tŭ tơngai lơh broă tus 19 jơ tàm dùl ngai mờ crơng gơs tai ală mpồl lơh broă làm bă tiah tus xã ngài: “Nàng ƀuơn làng bol tàm tiah sar lơgar ngài in tus lơh sră kimta làng bol, bol añ neh sồr mpồl tus lơh tàm ală xã, sơnah ƀòn gơwèt ală kơnhoàl, thị xã, ƀòn dờng. Làng bol tàm tiah lơi den tus anih dờp sră nggal nàng lơh gơ in rềp. Mơkung geh bơta tìs bè jơnau tơnggit den kuang àng xã, sơnah ƀòn bơ tơl wơl nàng làng bol in geh ƀuơn ƀuài. Dơ̆ 2, tŭ do gùng dà bol hi dê là tơrgùm lơh tàm ală tiah lơi gal làng bol den lơh lài, klo ngai lơh tàm tiah ngài, trồ mang lơh tàm tiah rềp. Bơh tŭ do tus ngai 30/6, jơh ală làng bol ndrờm geh lơh sră kimta tàm ƀòn lơgar he dê”.

Jat khà kờp, gùt càr Dak Lak geh mờr 1 tơlak 500 rbô nă cau geh tơl bơta geh lơh sră kimta làng bol. Tus tŭ do, Kuang àng càr neh dờp 70 rbô sră nggal pơyua rê hờ Bộ Kuang àng bơsong nàng lơh tam gơl. Jat broă rơndap lơh, tus ngai 30/6 kuang àng Dak Lak lơh gơs mờr 1 tơlak 200 rbô sră kimta làng bol (jat jơnau kờñ lơh êt ngan rlau jơh 70% mờ Bộ sồr). Bè hơ̆, kờp bal pah ngai, pal dờp mờr 9 rbô 600 sră nggal. Mờ nùs nhơm geh kơnòl uă ngan rlau jơh bơh mpồl kuang àng dê, làng bol tàm càr pin dờn broă lơh sră kimta làng bol pah ngai geh ƀuơn rlau mờ lơh gơs di mờ tŭ tơngai hơ pơrgon ai tơlik.

Tus ngai 30/6, Kuang àng Dak Lak lơh gơs mờr 1 tơlak 200 rbô sră kimta làng bol

Thượng tá Tô Anh Dũng, Phó Kuang atbồ Cục Kảnh sát atbồ hành chính bè ờdo ờdă mpồl bơtiàn, Bộ Kuang àng pà git: Tơnơ̆ tŭ Adat kimta làng bol geh Quốc hội ring bal, Bộ Kuang àng neh bơyai lơh tam gơl, dờp git măi mok, mpồl lơh gơlik mờ atbồ kimta làng bol gơs sră kimta làng bol. Sră kimta làng bol geh tơrbŏ, tam pà, ngui, drơng geh cồng nha tàm broă atbồ dà lơgar, jơnau sồr mờng chài lơh broă bơh gah kuang àng dê: “Lài do, lơh sră kimta làng bol là geh mờng chài bè broă ai tềl lir nau tê ala mờ ai tềl nau tê ring. Den tàng bol hi neh rơcang ai broă bơ to pơlam gơwèt mờ 63 càr tàm Đại học Bách khoa mờ C06 geh rơcang geh sră nggal pơyua tus kuang àng ală càr, ƀòn dờng nàng ală oh mi in cih mat kuang bàng, cau ling kuang àng nàng bol hi in geh broă rơndap lơh bơto bơtê”.

Broă lơh sră kimta mờ atbồ kimta làng bol gơs sră kimta làng bol là gùng dà bơh Chính phủ dê. Bộ Tài chính neh ai tơlik thông tư bè broă tơrmù priă tă lơh ai làng bol lơh sră kimta làng bol in. Jat hơ̆, jơh ală làng bol Việt Nam tơl 14 sơnam rlau hơđang tŭ lơh sră nàng tam gơl, lơh wơl sră kimta làng bol, tam gơl bơh kimta làng bol 9 sồ, 12 sồ gơs lơh sră kimta làng bol kung geh tơrmù 50% priă tă lơh pơn drờm mờ jơnau cih lài do. Tŭ do, gah kuang àng ală càr, ƀòn dờng sơbac mhar chồl mhar tơngai lam lơh rơndap broă sră kimta mờ atbồ sră kimta làng bol.

Cau mblàng K’Duẩn