VOV4.K’ho- Ngai (20/12), tàm dơ\ lơh broă tàm ală càr tiah tàm gùl lơgar, mò Nguyễn Thị Kim Ngân, Chủ tịch Quốc hội neh tus còp mờ lơh broă mờ Kuang đơng lam bồ càr Quảng Nam; tam pà bal mờ pà phan ai làng bol gơ tìp hoàc huơr tài trồ tiah lơh aniai tàm kơnhòal Phước Sơn; còp mờ lơh broă mờ Khu Công nghiệp Thaco Chu Lai.

Tam pà bal mờ ală bơta kal ke bơh làng bol càr Quảng Nam dê, Chủ tịch Quốc hội jờng rơ ua\ kuang đơng lam bồ càr Quảng Nam ai tơlik ală gùng dà broă lơh krà` cê nàng lơh jat niam broă bơsong jơnau gơ lời wơl tơ nơ\ dơ\ mìu càl rơbu\t dờng dà ko\ dà cò, ngan là phan bơna mờ bè ờs wơl rài kis ai làng bol in bè jo\ jòng. Tu\ do ală hìu bơnhă neh roh jơh hìu đam gam ơm bal mờ cau gơ\p [òn bal, cau pròc mhàm bal. Càr hơ ai phan ngui sa tơl làm ai làng bol in lài mờ tu\ mờ tơ nơ\ dơ\ sa tềp.

Cih dờp ală jơnau dan bơh càr Quảng Nam dê, Chủ tịch Quốc hội pin dờn càr Quảng Nam mờ mpồl Kuang bàng lơh broă càr mờ dà lơgar dê, geh gờ` sơr lèt gan ală bơta kal ke nàng lơh niam wơl mờ bơtàu tơnguh lơh sa.

Cau mblàng K’ Hạnh