VOV4.K’ho- Mho ngai 16/3, mò Nguyễn Thị Kim Ngân, Chủ tịch Quốc hội, Chủ tịch Mpồl duh broă tĕ khà dà lơgar lơh broă mờ Mpồl đơng lam lơh broă tĕ khà ƀòn dờng Cần Thơ. Tus 5 jiơ mho ngai 14/03, Ủy ban tĕ khà ƀòn dờng neh dờp 15 sră nggal tơlik mat tĕ khà Kuang bàng Quốc hội khoá 15; 108 sră nggal tơlik mat tĕ khà Kuang bàng Hội đồng Nhân dân ƀòn dờng tơngai lơh broă bơh nam 2021-2026, neh lơh sră nggal tơn jơh broă dờp sră nggal cau tơlik mat tĕ khà Kuang bàng Quốc hội khoá 15, cau tơlik mat tĕ khà Kuang bàng Hội đồng Nhân dân ƀòn dờng tơngai lơh broă bơh nam 2021-2026 jat jơnau sồr.  

Chủ tịch Quốc hội lơh broă mờ Mpồl đơng lam lơh broă tĕ khà Cần Thơ  

Đơs tàm dơ̆ lơh broă, mò Nguyễn Thị Kim Ngân, Chủ tịch Quốc hội sồr, tơ nơ̆ dơ̆ pơrjum cribơyai bal dơ̆ 2, Cần Thơ pal lơh pràn broă lơh mblàng yal wèt tus dơ̆ tĕ khà; sền gròi broă gàr niam bơta lơngap lơngai, rơndap tap sèng, ờ do ờ dă mpồl bơtiàn, ngan là tàm ngai tĕ khà 23/05/2021; rcang lài ală gùng dà broă lơh nàng gàr niam broă lơh bơh gah lơh sơ nơm dê ngan là tàm tơngai kòp Covid-19 gam gơlik geh kal ke.

Cau mblàng K’ Hạnh