VOV4.K’ho - Pơn jăt tai dơ̆ lơh broă tàm ală càr tiah ring dà dờng Cửu Long, drim òr (18/03), Chủ tịch Quốc hội mò Nguyễn Thị Kim Ngân, Chủ tịch mpồl duh broă tĕ khà dà lơgar lơh broă mờ Mpồl đơng lam broă tĕ khà càr An Giang.

Tus 5 jơ mho ngai 14 nhai 3, Uỷ ban tĕ khà càr An Giang neh dờp geh 15 pang sră bơh cau tơlĭk măt tĕ khà kuang bàng Quốc hội càr mờ 110 pang sră cau tơlĭk măt tĕ khà Hội đồng Nhân dân càr (HĐND). Uỷ ban Nhân dân (UBND) cấp xã gam sền wơl tơrgùm khà măt cau tĕ khà ală cau tơl 18 sơnam rơlao hờ đang tàm càr jăt tơl tiah đùh sră nàng tơmŭt tàm khà măt cau tĕ khà.

Tŭ do, tàm càr An Giang ờ hềt gơtìp cau yal yă bơh làng bol gơrềng tus mờ broă tĕ khà. Broă yal tơngĭt, lam sồr tàm tĕ khà geh càr An Giang lơh mờ uă broă lơh. Đơs tàm dơ̆ đơng lam lơh broă, Chủ tịch Quốc hội mò Nguyễn Thị Kim Ngân đơs là, càr An Giang neh lơh niam kơnòl crơng gơs ală mpồl tĕ khà kuang bàng HĐND mờ ring bal mờ 7 kơnòl bơh càr An Giang ai geh tàm tơngai tus; kơ̆p kờñ càr An Giang rơcang mờ bơyai lơh geh cồng nha niam bơnĕ dơ̆ tĕ khà kuang bàng Quốc hội, kuang bàng HĐND ală cấp.

Cau mblàng Ndong Brawl