Tŭ trồ ờ hềt rìng àng, tàm hìu ƀềp Hìu bơsram kòn cau ơm sa ngai kâp 1 Tu Mơ Rông neh hìt ồs. Cau den lơh phan, cau den rơcang phở, cau den trŭ gơm, tam pà gơp tơl bơnah broă nàng thàn geh phan sa drim ai git nđờ rhiang nă kơnòm bơsram in.

Dùl ngai bơh ală pơgru tiah do dê sơn đờm gờñ rlau pơndrờm mờ sap sơng gơr hìu bơsram.

Pơgru Dương Thị Kiều, pơgru ơdŭ 1A2, hìu ơm ngài hìu bơsram mờr 5 kơi sồ. Pah ngai, bơh 4 jơ drim, pơgru Kiều neh đì rơndeh măi lòt tus hìu bơsram bal mờ cau pơgru tàm hìu bơsram rơcang phan sa kơnòm bơsram in. Broă sơn đờm tŭ trồ gam jơngo, mơya tam gơl wơl, kơnòm bơsram geh tai dùl dơ̆ sa drim duh hồl lài mờ tŭ mut ơdŭ bơsram: “Bulah glar halà gơ dan bic mơya gơ lơh chờ hờp ngan tài kơnòm bơsram geh dùl dơ̆ sa drim nàng ală oh lòt bơsram geh wil tơl rlau”.

Pơgap 6 jơ drim, kơnòm bơsram sơn đờm lòt bơsram. Ală oh geh mè bèp jun mờ rơndeh măi, geh oh den lòt jơng bơh ƀòn ơm kis ngài hìu bơsram tus 2, 3 kơi sồ. Ală jơrlŭ phở duh geh jàu tàm tê ală kơnòm bơsram. Jơh sa den ală oh mut ơdŭ bơsram, sơn đờm dùl ngai bơsram pa.

Gơ wèt mờ kơnòm bơsram tiah kơh bơnơm Tu Mơ Rông, dùl dơ̆ sa drim tàm hìu bơsram ờ mìng là broă sàu sa. Hơ̆ gam là bơta pràn nàng ală oh jai bơsram sră, ngan là ală oh geh hìu ngài, pal lòt jòng git nđờ kơi sồ tus hìu bơsram. Uă ngan kơnòm bơsram là oh kòn làng bol jơi bơtiàn dồ êt nă cau. Rài kis hìu bơnhă gam uă kal ke, broă geh dùl dơ̆ sa drim wil tơl lài mờ tŭ lòt bơsram ờ di tŭ lơi kung ƀuơn. Oh Y Kim Ngân, kơnòm bơsram ơdŭ 5A5 đơs: “Phan sa tàm do bơkah ngan. Ngai do kòn geh sa ƀung mờ chả. Kòn lòt bơh gờñ, jơh sa den mut tàm ơdŭ nàng bơsram”.

Tơnơ̆ ală dơ̆ sa drim hơ̆ là bơta tă pơgồp bal dà kơl hề bơh uă pơgru tàm hìu bơsram dê. Pơgru Lê Tấn Thức neh 2 nam tus bal dong broă tàm hìu ƀềp. Broă ờ gơ ơm tàm mờng chài bơto bơtê, mơya gơ wèt mờ ală pơgru tiah do, hơ̆ là dùl bơnah kơnòl mờ kơnòm bơsram: “Añ kung ơm tàm hìu ơm bal ndo, den tàng dong kờl hìu ƀềp trŭ gơm ală oh in sa drim, nàng ală oh geh hờm. Kơnòm bơsram tàm do ƀùi drim den ờ huan geh sa drim, den tàng hìu bơsram bơyai lơh bè do ală sau chờ hờp ngan. Añ kung gŏ gơ lơh chờ hờp bal sơl”.

Nam bơsram do, Hìu bơsram kòn cau ơm sa ngai kâp 1 Tu Mơ Rông geh 902 nă kơnòm bơsram, tàm hơ̆ 665 nă oh gơ wèt cau geh dờp bơta dong kờl ơm sa ngai. Gùng dà broă lơh dong kờl uă ngan là ai sa ngai in. Tàm tŭ hơ̆, ờ di kơnòm bơsram lơi kung geh priă nàng sa drim wil tơl lài mờ tŭ mut bơsram. Geh oh hìu ơm ngài hìu bơsram git nđờ kơi sồ, geh oh pal lòt jơng. Gơ wèt mờ ală kơnòm bơsram do, broă tus hìu bơsram di tŭ jơ geh tŭ sơn đờm bơh dùl broă dềt ngan, hơ̆ là geh dùl dơ̆ sa drim.

Bơh mùl màl hơ̆, hìu bơsram bơyai lơh ai sa drim kơnòm bơsram in. Broă lơh tơrlòng lài geh gàr sùm bơh nam bơsram lài mờ pơn jat tai lơh tàm nam bơsram do. Nàng ală dơ̆ sa drim geh gàr sùm, ờ mìng geh pơgru tă pơgồp bơta pràn mờ mè bèp kung lơh bal sơl. Pah drim jun kòn lòt hìu bơsram, bàr pe nă mè bèp cèng ală cap lòng tă pơgồp hìu bơsram in. Ală cap lòng geh rơndap ring tàm hìu ƀềp, gơ gơs là phan nàng ală pơgru sing ồs, gơm ală phan sa duh hồl kơnòm bơsram in.

Pơgru Hồ Thị Thùy Vân, Lam bồ Hìu bơsram kòn cau ơm sa ngai kâp 1 Tu Mơ Rông yal, broă bơyai lơh sa drim lơh pơgru bòl rlau, mơya tam gơl wơl, kơnòm bơsram pràn kơldang, tryăng lòt bơsram mờ geh cồng nha bơsram niam rlau: “Tŭ bơyai lơh broă do den ală pơgru kung bòl ngan sơl, mơya tam gơl wơl kơnòm bơsram pràn kơldang, kờñ lòt bơsram mờ cồng nha bơsram geh tơnguh rlau. Hơ̆ là bơta chờ hờp dờng ngan rlau jơh bơh pơgru lơh broă tàm tiah sar lơgar ngài dê.

Mơya nàng geh ală dơ̆ sa drim chờ hờp hơ̆, ală pơgru pal tàm pơ gơl mờ tŭ jơ ơm rlô he dê. 4 jơ drim sing ồs. Pơgap 6 jơ rò kơnòm bơsram. Tus 7 jơ, kơnòm bơsram jơh sa drim, ală pơgru pal wàs jơh hìu sa hơ̆ sồng rê wơl mờ broă lơh mờng chài he dê: bơto bơtê, rơcang jơnau bơto, sền gròi kơnòm bơsram. Dùl ngai lơh broă pơgru dê tài bè hơ̆ mờ kung jòng rlau sơl.

Tàm hìu bơsram tiah kơh bơnơm Tu Mơ Rông, ală sơm pòl ồs kung gam geh sing hìt pah drim, tài bồ đap là ală kơnòm bơsram kờñ pal geh sa hờm nàng bơsram sră. Ală broă lơh dềt rơ hềt hơ̆ kung là dùl broă ai nùs nhơm Jơnau lơh nền tàm pơrjum sồ 71 Ƀộ Chính trị dê bè tam gơl pràn bơtàu tơnguh bơto bơtê mờ bơsram gơ mut ngan ngồn tàm rài kis.