Jơnau rcang cih Adat geh 13 tap, tơrmù 03 tap pơndrờm mờ ală rơndăp bơh Adat Ù tiah nam 2024, bàr pe bơta cih bè jơnau pal jat tàm ală tap do geh tàm pơn jat bal tàm ală tap gam wơl. Bè khà bơta, rơndăp broă lơh Adat geh 115 bơta (Adat Ù tiah nam 2024 là 260 bơta).

Tàm pơrjum, ală Bộ, gah tơrgùm cribơyai bè bàr pe broă gam geh jơnau đơs krơi is bè: gơnăp gơnoar lơh jat tơngume atbồ bè ù tiah; Bè dờp geh ngan sră pơrgon, sră nggal lơh jat ală gơnoar bơh cau ngui ù dê; Bè ai wơl ù tài jơnau kờñ bơtàu tơnguh lơh sa mpồl bơtiàn tài bơta kwơ dà lơgar mpồl bơtiàn. Đơs pơndŭt pơrjum, ồng Hồ Quốc Dũng, Phó Thủ tướng đơs sùm, do là rơndăp broă lơh Adat geh gơrềng jrô ơnàng uă ngan, tơl làm tus ală bơta bơh rài kis mpồl bơtiàn dê. Phó Thủ tướng jàu Bộ Broă lơh sa suơn sre mờ Tiah ơm kis đơng lam pơgồp bal mờ ală anih lơh broă geh gơrềng pơn jat tai kờp sền, kơlôi sơnơng nền nòn, ring bal broă lơh tàm jơnau rcang cih Adat, gàr niam bơta gơtùi lơh jat ngan ngồn, geh cồng nha, tơrmù ƀà uă ngan rlau jơh ală bơta kòl yan tàm tam gơl wơl tơnơ̆ tŭ ai lơh jat.