Tàm ƀlàng sre Soi, thôn Nam Phước, sàh Nghĩa Giang, càr Quảng Ngãi ală kòi tàm lŏ sre gam mut tàm tơngai tơnhào gơ krăm tàm dà. Geh tiah, mìng gam gŏ sơn yùr kòi lik bơh mat dà; geh tiah, jơh lŏ sre kòi gơ pừ jơh tơn. Làng bol pal tiă tàm lŏ sre toès tơl căp kòi, dăp tàm plung prìt ntrờn guh hơđang. Hìu bơnhă mò Lê Thị Kiều, ơm tàm thôn Mỹ Tịnh, sàh Nghĩa Giang geh 4 sào sre, 1 sào gơtìp ngơr bam dà jrô uă ngai. Mò Kiều pal kơnờm mpồl ling griăp ƀòn sàh dê dong kờl toès kòi:

“Dà cò pơr dô bal rơhe ngơr jơh lŏ sre, hìu bơnhă añ lòt khòm jơh rơhe ngơr tàm lŏ sre. Tŭ do dà neh hoài soăt mờ geh sàh dong kờl den tàng pa toès tơn. Sền bè bơh drim tus tŭ do sàh dong kờl 6 nă cau tus toès kòi. Mờ bàr pe nă kòn klau mut bruh kòi. Dilah mà ờ geh bơta dong kờl den ngan là kung sang lơm, ờ gơtùi lơh bè lơi nàng toès jai ờ”.

Uă tiah lŏ sre ngơr jrô tàm dà, kòi gơtìp tram tàm dà uă ngai neh sơnđờm gơ căt bồ mat. Làng bol gơ jal tơl tŭ jơ dà hoài soăt nàng toès kòi. Tàm ƀlàng sre, sap cau hòi bal, săp mơ̆ toès kòi bơrlŭ bal mờ săp nggồr măi bruh kòi, lơh geh ù tiah hô hơng. Ală ngai do, bi Nguyễn Thị Thu Hiền, Lam bồ Mpồl lơh broă Mặt trận thôn An Hội Bắc 2, sàh Nghĩa Giang, bal mờ mpồl cau tàm thôn dong kờl làng bol thôn Nam Phước toès kòi:

 “Bàr pe nă cau ùr mù tàm lŏ sre toès kòi, den hơ̆ sồng ling griăp ƀòn rơ̆p jun pơndiang kòi gơguh hơđang. Ngai òr, lŏ sre đah ne ngơr dà uă ngan, kòi neh gơ căt bồ mat jơh lơm. Ai lŏ sre mờ drim do gam lơh den kung gơtìp ngơr dà sơl. Mho ngai òr lŏ sre do dà ngơr jrô, ờ gơtùi mù. Bơtoah ngan là ờ geh mìu tai den tàng drim ngai do dà hoài soăt. Hìu bơnhă lơh nền kung toès sơl, geh kàr lơi di kàr hơ̆”.

Tàm sàh Nghĩa Giang geh 19 lồ kòi gơtìp ngơr băm dà. Anih duh broă làng bol hòi jà mpồl ling griăp ƀòn lơh broă sùm, ală mpồl cau ùr mờ mpồl cau tàm ală thôn tus dong kờl làng bol. Ồng Cao Thanh Tuyên, Phó Chủ tịch Anih duh broă Làng bol sàh Nghĩa Giang, càr Quảng Ngãi pà gĭt:

“Tềng đăp mat, sàh hòi jà ală mpồl cau toès kòi, gàr niam di pal mờ trồ tiah. Dơ̆ 2 tai là sàh pơgồp bal mờ ală anih lơh broă geh gơrềng, kờp dŭ rơ̆p tam gơl niam tŭ tơngai sih tam nàng pleh gơtìp tŭ tơngai geh mìu gờñ bè tŭ do. Pơn yơu bè, nam tơnơ̆ bol he gơtùi tam gơl tŭ tơngai sih tam, tam gơl tơngai pờ dà ai làng bol in gờñ rlau mờ tŭ tơngai do pơgăp 10 ngai. Dilah trồ tơngai sih tam geh tơnguh lài pơgăp 1 poh den tus tŭ do neh tơnhào jơh lơm rao”.

Ală ngai do, uă tiah tàm ù tiah càr Quảng Ngãi geh mìu dờng tus mìu dờng ngan, lơh rlau 63 lồ kòi mờ phan tam lơyah ngai gơtìp gơrềng. Tàm hơ̆, rlau 48 lồ kòi tàm ală sàh An Phú, Nghĩa Giang mờ Đình Cương gơtìp ngơr bơm dà. Gơnoar atbồ mờ ală mpồl cau ƀòn lơgar gam lơh ngan dong kờl làng bol toès kòi nàng tơrmù ƀà hoàc huơr.