Gơtìp mè bèp chơ̆t jơh, ờ mìng là jơnau moăt bơh să tờm ală kơnòm dềt mờ gam là hoàc huơr bơh hìu nhă, cau pròc mhàm dê tai. Oh Võ Thị Ngọc Ngân, bơsram tàm Hìu bơsram kấp 2 Bà Điển, ƀòn dờng Hồ Chí Minh pà git: “Bơh ngai bèp chơ̆t, rài kis hìu nhă gơtìp uă ngan kal ke tŭ ală bơta broă lơh sa ndrờm gơtìp gơwèt mờ mè dê. Bŭ lah broă lơh glar bòl mờ priă geh ờ kơl jăp, mè kung gam sùm lơh ngan jơh pràn nàng oh mi kòn geh pơn jăt tai lòt bơsram ndrờm bè ală bơyô ndai dê sơl”.

Gùt lơgar tŭ do geh di pơgăp 1 tơlăk 500 rơbô nă kơnòm dềt geh rài kis gơtìp kal ke, tàm hơ̆ geh di pơgăp 176 rơbô nă kơnòm dềt kòn đời, kơnòm dềt gơtìp sơrbì is. Uă broă lơh, broă dong kờl neh geh lơh nàng gàr niam ai kơnòm dềt kòn đời, kơnòm dềt gơtìp sơrbì is in bơtàu tơnguh mờ tơrgùm bal niam rơlao bè: Kơrnoăt hơ bal bơh ală lơgar dê bè gơnoar kơnòm dềt, Adăt Kơnòm dềt, Broă lơh dà lơgar tài kơnòm dềt tơngai bơh nam 2021 tus 2030; broă dong kờl adăt boh lam bè kơnòm dềt geh rài kis gơtìp kal ke uă…

Tŭ do, gùt lơgar gam lơh jăt broă dong kờl mpồl bơtiàn pah nhai ai 21 rơbô nă kơnòm dềt kòn đời in. Bơdìh hơ̆ tai, Đảng mờ Dà lơgar neh ai ngui broă dong kờl lài, pơlam ală mpồl lơh broă, cau dùl nă să, mpồl lơh sa kă bro tàm lơgar mờ lơgar bơdìh tus bal, pơgồp bal bơta pràn drơng gàr kơnòm dềt kòn đời đơs is, kơnòm dềt geh rài kis gơtìp kal ke đơs bal.

Bơh tŭ hơ̆ neh drơng gàr rài kis kơnòm dềt kòn đời, kơnòm dềt gơtìp sơbì is, ai geh bơta niam ndrờm bal, di pal rơlao mờ gơnoar kwơ di pal, di mờ adăt boh lam, lam sồr ală kơnòm dềt pin dờn tơnguh bơta pràn, brồ guh tơrgùm bal mờ mpồl bơtiàn. Ồng Nguyễn Văn Lực, Chủ tịch Mpồl dong kờl cau koĕt kơl te càr Lâm Đồng pà git: “Tàm càr Lâm Đồng geh rơlao 4 rơbô nă kơnòm dềt kòn đời pal drơng gàr. Pah nhai bol añ dong kờl 400 nă, tơl nă 1 tơlăk đong, 1 nam bè hơ̆ là 4 tơmàn 800 tơlăk đong. Mờ tàm pah nam bơsram, bol añ bơyai lơh lam ală oh mi tàm mpồl tă priă, ờ dan priă dong kờl, nàng drơng 20 nă kòn dềt kòn đời in mŭt bơsram đại học mờ tơl nă geh dong kờl 200 tơlăk đong nàng drơng tàm 4 nam bơsram. Mờ lơh bè lơi nàng ală kơnòm dềt pal pin dờn mŭt tàm rài kis, brồ guh, ờ mìng tơrgùm mờ mpồl bơtiàn mờ tơnơ̆ do gam pơgồp bal tàm mpồl bơtiàn in tai”.

Ồng Ngô Sách Thực, Chủ tịch Mpồl Dong kờl cau kwĕt kơl te lơgar Việt Nam pà git: mờ broă tus bal bơh ală mpồl lơh broă, mpồl lơh sa kă bro, cau geh nùs nhơm niam mờ mpồl bơtiàn, tàm 5 nam do, ală kấp mpồl neh lam sồr tă geh rơlao 637 tơmàn đong nàng pà priă bơsram, rơndeh coh, phan ngui bơsram… drơng ai kơnòm dềt geh rài kis gơtìp kal ke in. “Mpồl Dong kờl cau kwĕt kơl te Việt Nam sùm kơlôi rơcang lơh bè lơi nàng broă drơng gàr kơnòm dềt kòn đời in ờ mìng ơm wơl tàm broă dong kờl bè đah phan bơna mờ gam ai geh bơta pràn nàng ală kơnòm dềt pơn jăt tai bơsram sră, bơsram tàp brồ guh tàm rài kis, ờ sơrbì cau lơi hờ tơnơ̆”.

Đảng, Dà lơgar he sùm đơs lài kung bè tơnơ̆ bơtàu tơnguh ai kòn bơnus là lơh tờm, là cau tờm, là jơnau kờñ mờ bơta pràn bơh broă bơtàu tơnguh dê. Den tàng, drơng gàr kơnòm dềt kòn đời, kơnòm dềt gơtìp sơrbì is mờ ală cau geh rài kis gơtìp kal ke là kơnòl bơh Dà lơgar dê mờ là broă lơh bơh gùt mpồl bơtiàn dê. Do kung là bơhiàn niam bơh jơi bơtiàn dê, drơng gàr, sền gàr mờ ai geh bơta niam nàng kơnòm dềt kòn đời geh bơsram sră, bơtàu tơnguh tơl ală bơta, pràn kơl dang gơs làng bol geh kwơ mpồl bơtiàn in.