Broă lơh geh bơyai lơh tàm Hìu bơsram ơm sa bic tơn kâp 1 mờ kâp 2 Ia Lốp. Tàm sap jañ sơng gơr tamya lân nggồr chờ, ală oh geh sền đơs crih tamya, ràng tơlik võ thuật, tus bal ală broă lơh nhơl ñŏ mờ sa ƀañ kèu Trung thu. Dơ̆ sơn rờp geh wă rò Trung thu tàm Hìu bơsram pa, oh Triệu Thị Lan Anh, kơnòm bơsram ơdŭ 7, Hìu bơsram Bal ơm sa bic tơn kâp 1 mờ kâp 2 Ia Lốp chờ hờp đơs: “Ngai do oh geh nhơl Trung thu chờ hờp ngan, oh geh bơsram tàm hìu bơsram pa, oh gŏ geh kuơ ngan, ală bơyô kòn dê kung chờ hờp mờ hô hơng ngan sơl. Oh dan ưn ngài ală cau ling, ală wa, ală mơi ngài hìu mờ ală wa, ală mơi lơh broă dong kờl is, ală bi đoàn viên. Oh hơ pơrgon rơp gơ lòng sồr, bơsram gơ in jak”. 

Ia Lốp là sàh tiah nhàr lơgar, rài kis uă hìu bơnhă kơnòm bơsram dê gam uă kal ke. Nam bơsram do, pơgru mờ kơnòm bơsram Hìu bơsram Bal ơm sa bic tơn kâp 1 mờ kâp 1 Ia Lốp geh tai bơta chờ hờp tŭ hìu bơsram pa geh bơcri priă lơh, ai ngui. Pơgru Phạm Duy Tĩnh - Lam bồ Hìu bơsram pà git, sa tềp Trung thu nam do, 862 nă kơnòm bơsram hìu bơsram dê ndrờm geh pà phan mờ wă rò “mang chờ àng kơnhai ndar me” chờ hờp, ram mhŭ: “Do là dùl bơta chờ hờp ngan, ờ mìng gơ wèt mờ pơgru mờ gam gơ wèt mờ jơh tơl nă kơnòm bơsram kung bè hìu bơnhă ală oh bơsram tàm do. Ngai do kung geh bơyai lơh broă lơh trung thu do den geh kuơ is ồn ngan. 20 nam do, do là broă bơyai lơh dờng ngan rlau jơh mờ kung là dơ̆ sơn rờp hìu bơsram sàh Ia Lốp dê”.

Tàm broă lơh, Mpồl bơyai lơh neh jàu 10 broă lơh tơrlòng lài lơh broă, lơh sa, 10 nơm rơndeh coh, 10 bơnah priă dong kờl bơsram bal mờ 890 bơnah phan pà làng bol mờ kơnòm bơsram sàh Ia Lốp in; mờ kung jàu sră pơyua jờng rơ ală oh geh cồng nha jak ngan tàm broă lơh “Dong oh tus hìu bơsram”.

Să tờm Bí thư Tỉnh ủy càr Dăk Lăk ồng Lương Nguyễn Minh Triết kung jàu 10 bơnah priă dong kờl bơsram pà kơnòm bơsram sơrlèt gan kal ke mờ 100 tơlak đong dong kờl lơh hìu ơm ai dùl hìu bơnhă cau jơi bơtiàn dồ êt nă cau geh rài kis kal ke.

Đại tá Đỗ Quang Thấm, Chính ủy Mpồl đơng lam Mpồl ling sền gàr tiah nhàr lơgar càr Dăk Lăk đơs nền, do là broă lơh ngan ngồn mờ geh gơtha wèt hờ tiah nhàr lơgar, lơh gơlik nùs nhơm chờ hờp chờ hờn ai ală sau tàm tiah nhàr lơgar in di dơ̆ sa tềp Trung thu: “Do là dùl broă lơh ngan ngồn mờ geh gơtha ai tơnggŏ nùs nhơm, bơta sền gròi is ồn bơh ală kâp, ală gah broă lơh mờ mpồl ling sền gàr tiah nhàr lơgar dê gơ wèt mờ ală sau pa tàu mờ kơnòm dềt tàm tiah nhàr lơgar. Bơh broă lơh do den dong ală sau geh bơta pin dờn tàm bơta sền gròi uă ngan bơh ală kâp, ală gah broă lơh dê nàng lơh ngan bơsram jak rlau tai, nàng gơ gơs là ală cau geh kuơ mờ bal mờ Mpồl ling sền gàr tiah nhàr lơgar sền gàr kơ̆ tiah nhàr lơgar Dà lơgar tờm dê”.