Tàm ală ngai nggùl nhai 9, tàm Tiah ƀòn ơm kis pa tiah gơtìp rềs àr sàh Cát Tiến, càr Gia Lai, rơlao 40 hìu làng bol gam lơh hìu pa. Tiah lơh ƀòn ơm kis pa ngài mờ ƀòn yau tàm 2, 3 rơhiang thơ̆k, ù tiah ring niam, phan bơna ồs đèng, dà mờ gùng lòt geh bơcri priă lơh ndrờm bal. Là dùl tàm ală hìu gờñ lơh gơs hìu ơm, ồng Bùi Thanh Vương neh ntrờn rê tàm ƀòn pa tàm 1 nhai do. “Dà lơgar sền gròi nàng làng bol rê tus tàm tiah ƀòn pa den chờ hờp ngan. kàl mìu tus bloh den tàng làng bol kơ̆p gơn ngan cau chài lơh hìu lơh mhar gơs nàng pleh mờ tơrlah bơnơm, tàm do tŭ mìu tus den ngòt rơngơ̆t ngan. Tŭ do tàm do den cau chài lơh ồs đèng, cau chài lơh dà tus gal ngan, tàm do chờ hờp lơh broă. Mìng is bơnah añ dê geh 2 pang sră ngui ù, dờp geh 2 bă ù pa”.

Bal mờ hìu nhă ồng Vương, uă hìu làng bol ndai tàm thôn Trung Lương, sàh Cát Tiến kung rơcang lơh hìu mơ tŭ geh jào ù, mờ kơ̆p kờñ gờñ lik bơh tàm tiah di gơlan gơtìp tơrlah ù. Ồng Mai Trần Hải, làng bol kis tàm thôn Trung Lương pà git, lài do pah tŭ mìu càl dờng, hìu nhă ồng pal ntrờn tus tàm tiah lơngăp lơngai. Tŭ do geh ù lơh ƀòn ơm kis pa bal mờ priă dong kờl, hìu nhă ơpah cau chài lơh hìu pa. “Lŭ dờng tơrlah gơdùh di tàm hìu làng bol, jơh tàm tiah hơ̆ pal ntrờn làng bol jơh, ờ geh cau lơi ơm tàm hơ̆ tai”.

Nùs nhơm kơlôi rơcang hơ̆ sơn đờm bơh dơ̆ tơrlah uă ngan tàm bơnơm Cấm nhai 11 nam 2021, lơh gơbồr rơlao 40 nơm hìu tàm thôn Trung Lương. Càr Bình Định lài do tŭ hơ̆ neh yal bè jơnau jal mhar bơh rềs àr tơrlah ù tàm tiah do. Sàh lơh gùng dà broă lơh nàng ai bă ù lơh ƀòn ơm kis pa ai 64 hìu làng bol tàm tiah ngòt rơngơ̆t in. Ồng Lại Minh Đức, Kwang atbồ thôn Trung Lương pà git, tus tŭ do, 44 hìu neh mờ gam lơh hìu pa. “Tiah lơh ƀòn ơm kis pa tŭ do làng bol neh tus mờ ơm geh di pơgăp 80% neh dờp priă tus tàm ƀòn ơm kis pa nàng lơh hìu ơm. Gam 20 hìu làng bol kung gam pơn jăt tai pơlam nàng tus tàm ƀòn ơm kis pa sơl”.

Ồng Nguyễn Ngọc Thạch, Phó Kwang lam bồ Cơl dŭ Lơh sa sàh Cát Tiến pà git, sàh gam pơn jăt tai lơh mhar broă tơm ntrờn, ntrờn làng bol; mờ lơh gùng dà broă lơh nàng gàr niam lơngăp lơngai ai ală hìu ờ hềt ntrờn rê tàm ƀòn ơm kis pa in. “Tàm tơngai tus lơh ngan lơh mhar broă ntrờn nàng làng bol kơl jăp rài kis tàm tơngai tus, Anih duh broă Làng bol sàh kung neh lơh gùng dà broă lơh nàng ntrờn làng bol, bơdìh hơ̆ tai neh lơh broă rơndăp lơh rơcang pleh mờ trồ tiah lơh aniai nam 2026. Ờ mìng tàm bơnơm Cấm, mờ sàh neh ai gùng dà broă lơh mùl màl di lah gơtìp rềs àr bơh trồ tiah, sàh rơ̆p lơh ngan ntrờn làng bol tus tàm ală tiah niam lơngăp lơngai bè ală hìu bơsram, tiah ñhoa nàng dong kờl làng bol”.

Bơh tàm bă ù neh geh tŭ sùm gơtìp mờ bơta di gơlan gơtìp tơrlah, làng bol kis tềng jơng bơnơm Cấm gam rơhời ntrờn tus tàm tiah ơm pa lơngăp lơngai rơlao. Ală hìu pa geh lơh ờ mìng dong kờl làng bol kơl jăp rài kis, mờ gam là cồng nha bơh broă rơcang ntrờn làng bol lik bơdìh tiah di gơlan gơtìp rềs àr bơh trồ tiah uă. Mơya, tŭ kàl mìu càl dờng mờr tus, broă lơh gơs ntrờn ală hìu gam tai kung gam là kơnòl jal mhar, nàng tơrmù ờ uă ngan bơta di gơlan gơtìp hoàc huơr tài bơh tơrlah ù, gàr niam lơngăp lơngai màng kis bal mờ phan bơna làng bol dê.