Gah đơng lam Ling klàng càr Khánh Hoà neh dờp rlau 80 jơnau yal gơrềng tus ală tiah geh digơlan gam bơtô bồc cau ling chơ̆t màng. Tàm hơ̆ geh 7 jơnau yal bè bơtô ƀồc mpồl bal, kờp dŭ rlau 200 ƀồc ntìng cau ling chơ̆t màng. Bơh kờp sền, sền gĭt, bơh sơn rờp neh tơrgùm geh 6 bơtô ƀồc cau ling chơ̆t màng jun rê tàm ală ƀlàng tơ̆p ƀồc tàm ù tiah càr dê. Bal mờ lòt jòi, rờ tơrgùm, càr Khánh Hoà gam lơh mhar broă đal gĭt mat cau ling chơ̆t màng mờ broă lơh sền gĭt ADN.

Tus tŭ do neh tơrgùm geh pơgăp 2 rơbô 700 mẫu sinh phẩm bơh rlau 3 rơbô nă cau pròc mhàm cau ling chơ̆t màng dan cih mat, lơh geh mờr 90% broă rơndăp lơh mờ sơr lèt rlau 550 mẫu pơndrờm mờ broă jàu. Mờr 80 nă cau dờng sơnam, pràn kơl dang ờ gam tai geh dong kờl ai mẫu tàm hìu tơn. Jat kờp sền, càr Khánh Hoà tŭ do geh rlau 12 rơbô jơnau yal cau ling chơ̆t màng, tàm hơ̆ mờr 4 rơbô 900 nă cau ờ hềt gĭt geh jơnau yal bè bơtô ƀồc. Den tàng, tơl nă cau gĭt, tơl nă làng bol neh gĭt bè tiah tam lơh, cau gŏ tiah tơ̆p bơh sơn rờp bơh cau ling chơ̆t màng dê ndrờm gơtùi tă pơgồp bal dùl bơnah kwơ màng tàm broă lơh lòt jòi.