Chính phủ ai tơlik măt sơnđan Broă lơh tơnơ̆ mờ tŭ tơrgùm là: “Broă lơh jơnau kờñ dà lơgar bơtàu tơnguh niam chài mpồl bơtiàn, ƀòn lơgar, jơi bơtiàn mờ tiah bơnơm tơngai bơh nam 2026 tus 2035”.

Broă lơh geh tơrgùm bal bơh 4 Broă lơh tŭ do bè niam chài; bơto bơtê mờ bơsram; ƀòn lơgar pa, tơrmù rơƀah, bơtàu tơnguh tiah làng bol jơi bơtiàn ờ gal cau mờ tiah bơnơm; sền gàr bơta pràn kơl dang să jan, khà kờp làng bol mờ bơtàu tơnguh; rơndăp bal geh 7 mpồl kơnòl tờm. Kờp jơh priă hòi tàm tàm tơngai bơh nam 2026 tus 2030 kờp dŭ là rơlao 808 rơbô tơmàn đong, tàm hơ̆, kes priă dà lơgar là 345 rơbô tơmàn đong. Kờp dŭ, Bộ Broă lơh sa suơn sre mờ Tiah ơm kis lơh aniai đơng lam bal, dong broă Mpồl Sồr lơh Dà lơgar; Bộ Priă jền dờp kơnòl tơrgùm bal, tam pà, jào priă; ală Bộ mìng gah broă lơh tơlik khà geh ai, khà broă, sền cồng nha broă lơh geh; ală càr ƀòn dờng ngui kơrnoăt “Càr, ƀòn dờng ai geh, cà, ƀòn dờng lơh, càr, ƀòn dờng dờp kơnòl” rơwah is khà măt broă, ai lài priă, dờp kơnòl tơl ală bơta bè kơl jăp niam, tơngai lơh.