Ùr bơklau bi Lâm Thị Ngọc Hoa - Hìu bơnhă rƀah kòn cau Khmer tàm ƀòn Xẻo Cóc, sàh Lai Hoa, ƀòn dờng Cần Thơ pa do geh sền swì dong kờl broă lơh tơrlòng lài dong kờl ròng be bè dùl “nđàr broă lơh sa”, lơh gơlik tŭ niam brồ guh gàr kơ̆ rài kis. Bi Lâm Thị Ngọc Hoa pà git: “Añ ưn ngài ờ git lơh tơn, nam do geh dong kờl dùl yô be sơntìl. Tŭ do rơp lơh ngan ròng nàng tơnơ̆ do gơ deh kòn, tơnguh mpồl phan ròng, geh broă lơh sa kơ̆ kơljap, tềm pềr priă nàng lơh hìu. Tŭ do añ lòt tơ wès nhơt pah ngai, ai bơklau añ dê den lòt gàr tơnau ròng ka ti cau in, tŭ ơm tàm hìu den dong kờl añ ròng be”.

Ồng Diệp Phước Nghĩa ơm tàm sơnah ƀòn Mỹ Xuyên kơnờm geh càn priă dong kờl cau rƀah 50 tơlak đong bơh 2 dơ̆ càn, neh bơcri priă tam phan tàm bă ù pơgap 4 sàu. Ồng gam bơcri priă lơh gùng ding ƀồm dà tềm pềr, ngui jak chài măi mok mờ ngui jơh măi mok tàm broă tam phan, den tàng priă cồng lơh geh rlau 50 tơlak đong pah nam. Bơh bơta dong kờl dà lơgar dê bal mờ nùs nhơm brồ guh is, ồng neh lơh geh hìu dờng niam mờ ngan ngồn jơh rƀah tàm nam 2024: “Tŭ do tam phan ờ gam roh uă dà kơl kề tai tŭ he ngui măi ƀồm dà hòr ntờc, ngui mô tơ ƀồm dà, tềm pềr uă ngan priă tă lơh. Bơdìh hơ̆ tai, gùng lòt geh bơcri priă lơh tus tàm mìr den tàng cau blơi phan mut blơi phan ƀuơn ƀuài. Làng bol geh ù rềp mờ gơp kung tàm jà gơp sơngka sền gàr phan tam nàng kàl lơh sa tơnhàu geh uă”.

Ƀòn dờng Cần Thơ tơnơ̆ tŭ tơmut bal geh mờr 495 rbô nă cau jơi bơtiàn dùl êt nă cau, tàm hơ̆ gal ngan rlau jơh là làng bol kòn cau Khmer mờ rlau 411 rbô nă. Tàm nam lài, ƀòn dờng neh lam lơh geh cồng nha broă lơh jơnau kờñ dà lơgar bơtàu tơnguh lơh sa - mpồl bơtiàn tiah làng bol jơi bơtiàn dùl êt nă cau, mờ kờp jơh priă bơcri rlau 350 tơmàn đong. Bơh hơ̆, uă broă lơh gùng lòt, bơto bơsram, lơh sơnơm geh bơcri priă; hìu ơm mờ priă ai càn geh dong kờl, dong làng bol bơtàu tơnguh lơh sa, rơhời tơnguh niam rài kis phan bơna mờ nùs nhơm. Tus tŭ do, khà hìu bơnhă rƀah tàm làng bol kòn cau Khmer ƀòn dờng dê gơmù gam mờr 1 rbô 900 hìu bơnhă. Ồng Lê Trung Tuấn - Phó Chủ tịch Anih duh broă Làng bol sàh Thạnh Hới An, ƀòn dờng Cần Thơ pà git: “Bơdìh mờ broă lam lơh ală gùng dà, broă lơh gơ wèt mờ làng bol jơi bơtiàn dùl êt nă cau, sàh gam sền gròi tus broă lơh bơto bơtê broă lơh bơh ală ơdŭ bơto pơlam mờng chài ròng phan, dong kờl bơto pơlam broă lơh sa suơn sre, bơto broă lơh. Bơh hơ̆, dong làng bol tơnguh bơta chài lơh broă, drơng bơtàu tơnguh lơh sa halà mut lơh broă tàm ală kông ty nàng tơnguh priă lơh geh hìu bơnhă in”.

Tơngai tus, ƀòn dờng Cần Thơ rơp lam lơh ndrờm bal ală kơnòl broă, broă lơh bơtàu tơnguh lơh sa mpồl bơtiàn; lơh mhar tơngai hơ pơrgon lam lơh ală broă lơh, rơndap broă lơh gơ wèt ală broă lơh jơnau kờñ dà lơgar; gàr làng bol geh dờp kuơ wil tơl, di tŭ ală gùng dà, broă lơh jat jơnau sồr, bơh hơ̆ rơhời tơnguh niam rài kis.