Tàm hơ̆, 251 nơm hìu neh lơh sir, pơgồp bơnah lơh tam gơl ală bơta kis bơh làng bol geh rài kis kal ke in. Tàm kờp jơh 2 rơbô 092 nơm hìu neh lam lơh tàm càr Gia Lai, geh 122 nơm hìu lời ai hìu bơnhă geh sră dong kờl Dà lơgar, cau geh màng mờ Dà lơgar; mờ mờr 2 rơbô nơm hìu lời ai hìu bơnhă rƀah, hìu bơnhă pa lik klàs rƀah in.

Mờ jơnau kờñ lơh rlau 8 rơbô 400 nơm hìu ai ală hìu bơnhă gơwèt broă lơh in lài mờ kàl mìu nam do, càr Gia Lai neh hòi jà tă pơgồp bal bơh uă priă jền mpồl bơtiàn dê. Tàm hơ̆, dùl mpồl lơh sa kă bro neh ring bal Kes priă “Tài cau rƀah” càr, dong kờl 10 tơmàn đong; Ƀộ Kwang àng neh dong kờl rlau 201 tơmàn đong mờ Anih duh broă Làng bol càr Gia Lai neh tam pà 211 tơmàn đong. Mờ bơta mhar ngan, jơh nùs mờ bơta tàm sơm bat tê bal bơh ală kấp, gah broă mờ jơh gùt mpồl bơtiàn dê, broă lơh tơn jơh hìu lơh ing, hìu ồm sèt ñhăt dà mìu tàm càr Gia Lai gam geh lam lơh kràñ cê jơh nùs, nàng kờñ bơtàu tơnguh bơta niam rài kis bơh làng bol dê, is ồn là ală hìu bơnhă rƀah, hìu bơnhă pa lik klàs rƀah mờ hìu bơnhă geh sră dong kờl Dà lơgar dê lài mờ kàl mìu nam do.

Kờp tus jơh poh lài, càr Kon Tum neh tơn jơh geh 1 rbô 16 nơm hìu ing, hìu ồm sèt ñhăt dà mìu tàm kờp jơh 2 rbô 752 nơm hìu geh lơh pa mờ lơh niam wơl. Tàm khà 1 rbô 16 nơm hìu ing, hìu ồm sèt ñhăt dà mìu neh geh càr Kon Tum dong ală hìu làng bol tơn jơh tàm ala, geh 787 nơm hìu lơh pa mờ lơh niam wơl 229 nơm. Ală tŭ tơn jơh hìu ing, hìu ồm sèt ñhăt dà mìu tàm càr Kon Tum pà gŏ geh bơta tus bal jơh nùs bơh ală mpồl, mpồl cau dê.

Nàng pơn jăt tai lơh mhar tơngai tơn jơh hìu ing, hìu ồm sèt ñhăt dà mìu, gơnoar ătbồ 10 kơnhoàl, ƀòn dờng càr Kon Tum dê tŭ do gam lam lơh uă broă lơh tơrgùm tă bơsong kal ke, gơkòl gơ wèt mờ priă tă kâp hơđang tam pà lơyài; priă hòi tơrgùm tă pơgồp nàng tơn jơh hìu ing, hìu ồm sèt ñhăt dà mìu dồ êt; hìu bơnhă ờ geh priă jền tă pơgồp bal, ờ geh cau tus bal lơh, lơh niam wơl hìu.