Anih tờm Bơto bơtê is rơmis Pandur, tàm thôn Xuân An 2, sàh Bắc Bình, càr Lâm Đồng gơ wèt kơnhoàl ù tiah kơnhoàl Bắc Bình, càr Bình Thuận yau)- tiah gam ngui ală gùng dà broă rơndăp lơh dong kờl dong ai uă kơnòm dềt ờ niam tàm tơngoh, tơngoh ngim ngơm mờ kal ke tàm bơsram sră pràn wơl mờ neh kis gơrờm bal mờ gơ̆p bơyô bè ờs. Ùr pơgru Thanh Thị Hằng, cau đềt mềr mờ Anih tờm bơh ală ngai sơnrờp yal, do ờ mìng là tiah lơh broă mờ gam là hìu ơm bơh he dê.

“Gơ wèt mờ kơnòm dềt ờ niam tàm tơngoh, tơngoh ngim ngơm, gơ sơblung tơngoh den broă bơyo ai ală oh in kal ke ngan pơndrờm mờ ală oh dềt bè ờs. Hơ̆ kung là gơn kơnờm dong oh bơsram bal mờ Anih tờm nàng bơtơl tai bơta chài, bơta gĭt wă mờ broă mờng lơh nàng bơto ai ală oh dềt in dồ bă dipal rlau, dong ală oh gờñ kis gơrờm bal mờ mpồl bơtiàn. Hơ̆ là bơta chờ hờp dờng bơh oh dê”.

Ai gơ wèt mờ ùr pơgru kơnòm să Lư Thị Mỹ Viên, bơta chờ hờp dờng ngan rlau jơh bơh ùr pơgru dê là tŭ sền gŏ ală oh dềt gơguh jak pah ngai.

“Gơn kơnờm nàng oh sơrlèt rlau bơta kal ke là tŭ bơto yal ală jơnau gĭt wă mờ geh ală oh iăt wờng mờ lơh jăt. Pơnyơu bè oh đơs oh ai dà pơgru in hùc yơ den oh wờng mờ lòt ai tơn. Hơ̆ sồng geh ală oh kung đal gĭt geh do là zĕp he dê, halà đìh rơndeh là pal nggùi ngkời. Kwơmàng ngan rlau jơh là dong geh oh gơmù ƀà ală broă lơh sơbơng roh mờ ngai sơlơ gơguh jak”.

Pơgru tàm Anih tờm pal kong mờ bơta bòl glar mờ gơ sồr bơta lơh ngan rlau tai uă ngan, tài bơh gùng dà broă rơndăp lơh bơto bơtê is ồn lời ai kơnòm dềt ờ niam bè bồ tơngoh gĭt wă, nùs nhơm, ờ niam iăt đơs mờ ñă ntàu. Tơl nă pơgru bulah tàm sơnam krơi is, rài kis hìu bơnhă krơi is mơya tŭ săc rwah broă bơto bơtê is ồn, khi geh bơta bal là nùs gơboh kờñ uă ngan gĭt lơh gơ wèt mờ kơnòm dềt, khin ơn pơdờng, dờn dờp jơh tơl ală kal ke, bơta lòng mờ gĭt nền ai he in dùl bơta kơ̆p kờñ niam bơnĕ đềt mềr mờ broă lơh jŏ jòng.

Ùr pơgru Nguyễn Thị Bích Thủy, cau tơnggơs Anih tờm do pà gĭt, tŭ gam àñ kong tàp lòt bơsram khai gŏ uă rài kis ờ bơtuah bơtuài, bè: rơngim rơngưm tàm bồ tơngoh kal ka tàm bơsram; ờ niam tàm bồ tơngoh, gơ sơblung tàm bồ tơngoh, đơs ờ gơtùi…Mờ kơlôi sơnơng dong oh dềt bơh gờñ nàng gơtùi kis gơrờm bal mờ mpồl bơtiàn, pơgru neh lơh anih tờm do:

“Oh gŏ jơnau kờñ tàm ƀòn he dê bè kơnòm dềt rơngim rơngưm tàm bồ tơngoh, ờ niam tàm bồ tơngoh mờ kriañ là ờ hềt geh tŭ niam nàng dong kờl gờñ, dipal bè tàm ƀòn dờng Hồ Chí Minh. Bal mờ hơ̆ uă mè bèp kơnòm dê gam ờ hềt tơl bơta chài, bơta gĭt wă mờ jơnau yal. Să tờm oh là pơgru, oh kung kơ̆p kờñ cèng bơta chài, bơta gĭt wă mờ ală mờng chài mờ oh neh geh bơsram, neh lơh broă tàm ƀòn dờng Hồ Chí Minh rê ndo dong kờl ai ală sau in”.

Bơh sơnrờp pa tơnggơs, Anih tờm mìng geh bàr pe jơ̆t nă mè bèp kơnòm dê jun kòn tus bơsram. Tơnơ̆ dùl tŭ tơngai, mờ ală cồng nha lơh geh bơh ală tŭ bơto bơh Anih tờm dê, uă hìu bơnhă geh kòp gơtìp kal ke tơm bơh bơr, geh kòn gơtìp ờ niam tàm bồ tơngoh, rơngim rơngưm tàm bồ tơngoh…neh pin dờn jun kòn tus Anih tờm nàng geh bơto pơlam broă dong kờl gơ in dipal. Bi Đào Thị Thanh Xuân, pà gĭt, kơnờm geh ală pơgru tàm Anih tờm bơto pơlam mờ dong kờl gờñ, tŭ do kòn bi dê neh kis gơrờm bal mờ ală bơyô dềt bè ờs ndai.

“Ală tŭ dong kờl, bơh ơm sa ngai tàm hìu bơsram tus nă să is den kòn añ dê tŭ do neh jơh bơsram ơdŭ dùl rao. Tŭ do, añ gŏ kòn kis dờng pràn kơldang bè dùl nă kòn dềt bè ờs ndai sơl. Pơnyơu, tŭ cau krơi tìp kòn den kung ờ gŏ gĭt sơl là kòn neh gơtìp kòp dilah bè he ờ yal den ală cau bơyô sơning là kòn he dê bè ờs. Ală ùr pơgru dong kờl bơto pơlam, sùm pơndờm pơnđiang, pơn jờng mờ bơh bơta kơ̆ nùs bơh he dê, bơta kong ơ̆t bơh ală pơgru dê, den tàng tŭ do kòn kis dờng pràn kơldang lơm”.

Tus tŭ do, Anih tờm Bơto bơtê is rơmis Pandur gam geh 43 nă oh mờ 2 anih bơto. Geh ală oh rơ̆p pa 2 sơnam lơm mơkung geh sơl oh hơđăng 5 sơnam, tơl nă oh geh ală jơnau gơ tơnggŏ krơi is, kòp kơn jơ̆ nggờk krơi is. Den tàng bè hơ̆, Anih tờm pal tam pà uă ơdŭ mờ lơh jăt ală gùng dà broă rơndăp lơh dong kờl krơi is. Mờ tơnơ̆ 6 nhai tus 1 nam, geh tŭ là bơh 2 tus 3 nam, bơta bơh ală oh dê rơ̆p geh niam wơl.

Lòt còp mờ pà phan ai Anih tờm in, ồng Trương Mai Hạnh, Ƀí thư Đoàn kâp hơđơm Mặt trận Dà lơgar tờm Việt Nam càr Lâm Đồng sền dờng màng ngan ală cau lơh broă lơh bơto bơtê is rơmis – ală “cau pơgru is rơmis” sền gàr kơnòm dềt bơh jơh plai nùs mờ bơta ơn pơdơng phi să ngềt ngơ̆t ngan:

“Să tờm broă bơto ơdŭ bơh sơnrờm là dùl broă lơh neh dờng màng ngan rao, mơya mờ gơ wèt mờ ală ùr pơgru tàm do khi pal lơh ngan uă ngan gĭt nđờ dơ̆ pơndrờm mờ broă bơto ơdŭ bơh sơnrờp. Tài bơh ală oh rơngim rơngưm tàm bồ tơngoh là ală oh gơtìp sơblung tơngoh broă lơh, kal ke tơm bơh bơr, ală sau ờ chài gĭt geh să tờm den gơ sồr bơta lơh ngan uă ngan bơh ală ùr pơgru drơng kơnòl bơto ală oh in”.

Tŭ do, gùng dà broă lơh dong kờl adăt boh lam ai bơto bơtê kơnòm dềt gơtìp rơngim rơngưm tàm bồ tơngoh in gam uă kal ke, ờ huan uă. Bơta dong kờl ai ală pơgru bơto cau là kơnòm dềt is ồn in mìng dồ êt gời lơm. Mơya, ală ùr pơgru tàm Anih tờm kung gam sùm jơh nùs jơh tồr, kơ̆ dơn pah ngai pờ àng gùng lòt, jàu gơboh kờñ, jàu bơta gơn kơnờm.