Jơnau lơh nền tàm pơrjum geh lơh jat ngan ngồn bơh ngai 05/6/2026, mờ uă gùng dà dong kờl pa, wèt tus sền gàr phan lời wơl dồ bă ngan ngồn mờ kơnhăp jŏ rlau. Jơnau lơh nền tàm pơrjum tơrgùm tàm 5 mpồl tơngume tờm, geh dong kờl bơto wơl, lơh wơl anih niam chài cing mồng, dong kờl broă lơh mpồl cau dê, lơh niam wơl hìu jòng mờ ù tiah mpồl bơtiàn pơgồp bal mờ lòt nhơl, mờ kung lơh pràn tam gơl sồ nàng prap gàr wơl jơnau tơnggit niam chài.

Jat jơnau lơh nền tàm pơrjum, càr Dăk Lăk rơp dong kờl uă ngan rlau jơh 80 rbô đong dùl nă cau dùl ngai priă sa, lòt rê ai cau tus bal ală ơdŭ bơto cing mồng tàm mpồl bơtiàn in; dong kờl ngai lơh broă uă ngan rlau jơh là 300 rbô đong dùl nă cau dùl ngai tŭ tus bal broă lơh lơh wơl; 200 rbô đong dùl ƀùi gơ wèt mờ cau tus bal kờp sền, lơh gơs sră nggal, bơyai lơh drơng kup sap, kup rùp. Càr dong kờl 5 tơlak dong dùl mpồl dùl nam, mờ kung ai priă blơi cing mồng, phan soh mờ măi mok, loa. Ală mpồl niam chài geh dờp bơta dong kờl pal geh bơh 10 nă cau mờ bơyai lơh, pơrjum jat tơngai pơrgon bơh 1 dơ̆ tàm dùl nhai. Pơgồp bal prap gàr niam chài cing mồng mờ bơtàu tơnguh lòt nhơl mpồl bơtiàn, càr Dăk Lăk kờp dŭ rơ wah êt ngan là 1 ƀòn geh pơn rơ tàm ală sàh, sơnah ƀòn neh geh rơndap ù tiah nàng bơt bơtàu anih sền git cing mồng, pơgồp bơnah ai geh broă lơh làng bol jơi bơtiàn dồ êt nă cau tàm ƀòn lơgar in.