Mho ngai 28/5, tàm Hìu Quôk hội, Mpồl duh broă Jơi bơtiàn bơh Quôk hội dê bơyai lơh Dơ̆ tơngkah kir sơnrai 65 nam tơnggơs mờ dờp rò Sơlòng Lơh broă khà 1. Củ tịc Quôk hội ồng Trần Thanh Mẫn tus bal mờ đơs đơng lam. Bơh 65 nam lơh broă, Mpồl duh broă Jơi bơtiàn neh geh uă tă pơgồp kwơ màng tàm broă lơh lơh adat, jat sền nền mờ lơh nền ală broă dờng bơh dà lơgar dê; tus bal sền sơ wì, tă pơgồp jơnau đơs ai gĭt nđờ rơhiang rơndăp broă lơh adat, pơgồp bơnah lơh sir gùng dà broă lơh gơwèt mờ làng bol jơi bơtiàn dồ ết nă cau, tiah kơh bơnơm, tiah sar lơgar ngài. Củ tịc Quôk hội ồng Trần Thanh Mẫn cih dờp, jờng rơ ală bơta lơh ngan, tă pơgồp dà kơl hề bơh ală rơnàng kwang bàng Mpồl duh broă Jơi bơtiàn dê.

Tàm tơngai tus, Củ tịc Quôk hội sồr Mpồl duh broă Jơi bơtiàn tơnguh uă cồng nha kơlôi sơnơng, kờp dŭ lài gùng dà broă lơh; gàr niam bơtàu tơnguh mờ ring bal, sền gàr bơhiàn niam chài is mờ lơh kơ̆ kơl jăp mpồl tam klăc dờng gùt jơi bơtiàn. Mờ ală gùng dà broă lơh lời ai làng bol in pal ngan ngồn, rềp mờ bơta geh ngan, lơh geh di mờ jơnau kờñ kờñ pal geh bơh làng bol dê.