Kờñ geh dùl mpồl bơtiàn bơtàu tơnguh niam, lài jơh tơl hìu bơnhă pal bơtàu tơnguh kơ̆ kơl jăp. Bulah bè hơ̆, tŭ do dùl bơta geh ngan pal đơs ngan hơ̆ là tam lah tam lơh tàm hìu bơnhă kung gam sơl mờ pơhìn geh sùm tàm uă hìu bơnhă, tàm hơ̆ geh ală hìu bơnhă làng bol jơi bơtiàn dồ êt nă cau.

Tam lah tam lơh ùr klau mờ tam lah tam lơh tàm hìu bơnhă tàm jơh gùt lơgar đơs bal, tàm tiah jơi bơtiàn dồ êt nă cau đơs is, là jơnau ờ hềt tŭ lơi pa. Broă ờ niam do gam lơh dùl bơnah cau ùr jơi bơtiàn dồ êt nă cau ngai sơlơ gơ gơs gơtìp tam cah is, gơtìp gơmù gơrŭc tàm tŭ mpồl bơtiàn geh uă bơta gơ tam gơl mờ bơtàu tơnguh bè tŭ do.

Do kung ngan là dùl tàm ală jơnau bơh tài ală tiah gàr sùm broă lơh “anih pin dờn” bal mờ jơnau kờñ mhar tơrmù ƀà bơta gơ aniai bơh tam lah tam lơh gơrềng tus ùr klau tơn bơh kâp ƀòn lơgar bơh broă yal drơng broă dong kờl mhar ai cau gơtìp lơh pờng gơrềng tus ùr klau, tàm hơ̆ geh: dô pồn ing, sền gàr pràn kơldang să jan, bơto pơlam nùs nhơm huềng nùs, bơto pơlam adat boh lam kwơmàng, dong kờl jun ntrờn tus hìu sơnơm tŭ kờñ ngan; Gơhòi gơ jà geh bơta tus bal mờ tơnguh uă bơta gĭt wă bơh làng bol dê tàm ƀòn lơgar tàm broă rơcăng kơryan lài mờ sơndră wơl mờ bơta tam lah tam lơh gơrềng tus ùr klau; Sền gàr broă pơgồp bal đah ală gah geh gơrềng tàm broă dong kờl cau gơtìp aniai bơh tam lah tam lơh dê gơrềng tus ùr klau, lơh gơs mpồl cau lơh broă bal lơh broă lơh ring bal ùr klau tàm ƀòn lơgar.

Tàm càr Lào Cai, bơh bồ nam 2023 tus tŭ do, Mpồl Cau ùr ală kâp càr Lào Cai lơh pa 2 “Anih pin dờn tàm mpồl bơtiàn” tàm thị trấn Nông trường Phong Hải, kơnhoàl Bảo Thắng mờ xã Thẳm Dương, kơnhoàl Văn Bàn bal mờ rlau 40 nă cau tus bal. Do là 2 broă lơh bơh Mpồl Tam klăc cau ùr càr dê sồr lơh lài tơngai bơh nam 2021- 2025.

Jăt Broă rơndăp lơh bơh Ủy ƀan Ñân zân càr Lào Cai dê bè lam lơh jăt ring bal ùr klau mờ bơsong ală broă kờñ pal bơsong mhar tơn gơ wèt mờ cau ùr mờ kơnòm dềt tàm ù tiah càr dê, tàm tơngai bơh nam 2021- 2025, jơh gùt càr pồ tơl, tơnguh uă cồng nha halà lơh pa 48 anih pin dờn tàm mpồl bơtiàn.

Tàm càr Bình Định, broă lơh “Anih pin dờn ai mpồl bơtiàn in” dong kờl cau ùr mờ kơnòm dềt gơtìp tam lah tam lơh tàm hìu bơnhă neh geh lam lơh mờ bơh sơnrờp neh cèng wơl ală cồng nha ngan ngồn. Tŭ do, broă lơh “Anih pin dờn mpồl bơtiàn” dong kờl cau ùr mờ kơnòm dềt gơtìp tam lah tam lơh tàm hìu bơnhă neh geh lơh tàm 5 kơnhoàl: An Lão, Vân Canh,Vĩnh Thạnh, Hoài Ân mờ Tây Sơn. Broă lơh do gam ngai sơlơ pơgồp bơnah tơnguh uă bơta gĭt wă bơh mpồl bơtiàn tiah làng bol ơm kis tàm broă lơh rơcăng lài tam dră wơl mờ broă tam lah tam lơh tàm hìu bơnhă, kwơmàng là sền gàr cau ùr, ală cau ờ pràn lơbơn lơño tàm mpồl bơtiàn. Mò Hoàng Thị Thanh Nhã, Phó Kwang ătbồ Mpồl Tam klăc Cau ùr càr Bình Định, pà gĭt: Jơnau kờñ bơh broă lơh do dê là nàng kờñ dong ai cau ùr tàm mpồl in mờ kơnòm dềt in tŭ geh broă tam lah tam lơh tàm hìu bơnhă gơlik geh den geh dùl anih nàng dô pleh ing. Geh dùl anih nàng khi in yal, đơs ală broă mờ khi kờñ dong kờl.

Tàm càr Lai Châu, mò Nguyễn Thị Thủy, Phó Kwang ătbồ Sở Lao động, Thương ƀiñ mờ Xã hội càr Lai Châu, pà gĭt: Mờ tơngume “Sền gàr lơngăp lơngai rài kis mpồl bơtiàn, tơnguh gơnoar broă mờ ai tơl tŭ niam ai cau ùr mờ kơnòm ùr in, nàng kờñ lơh jăt ring bal ùr klau mờ tơn jơh tam lah tam lơh gơrềng tus ùr klau, Ủy ƀan Ñân zân càr Lai Châu neh ai lơh jăt Broă rơndăp lơh lơh jăt Broă lơh Dà lơgar ring bal ùr klau tiah làng bol jơi bơtiàn dồ êt nă cau mờ tiah kơh bơnơm tơngai bơh nam 2022- 2030 nàng kờñ tơrmù ƀà bơta ờ ndrờm bal ir đah ùr klau, ai tơl bơta, ai tŭ niam nàng cau ùr mờ cau klau là cau jơi bơtiàn dồ êt nă cau in tus bal, dờp lèng ring bal tàm ală gah broă cíñ trị, rài kis, niam chài mờ bơtàu tơnguh lơh sa, pơgồp bơnah tàm bơta bơtàu tơnguh bal bơh càr dê. Mò Nguyễn Thị Thủy, đơs: Tàm tơngai tus, càr rơ̆p lơh uă ală broă lơh mblàng yal, tàm hơ̆ sền gròi tàm hìu bơsram, mpồl lơh sa kă bro, mpồl bơtiàn tiah làng bol ơm kis, ngan là wèt tus tiah jơi bơtiàn dồ êt nă cau, ală tiah mờ bơta gĭt wă bơh làng bol dê gam ờ hềt uă bè broă lơh ring bal ùr klau. Bol hi rơ̆p lam lơh geh cồng nha ală broă lơh, hơ̆ là “ƀòn đềt mềr mờ lơngăp lơngai gơ wèt mờ kơnòm ùr”, “hìu bơsram lơngăp lơngai, đềt mềr ờ tam lah tam lơh”, “anih pin dờn, hìu ơm pleh ing tàm mpồl bơtiàn”. Kwơmàng là bol hi pơn jăt tai bơtàu tơnguh mờ rề ơnàng lơh uă broă lơh “kơryan lài mờ tơrmù ƀà bơta gơ aniai bơh tam lah tam lơh dê gơrềng tus ùr klau.