Gơ jal ngan tŭ klo ngai ơm rlô, Trung tá Y Dhăm Byă, Phó lam bồ Kwang àng sàh Quảng Phú, càr Dăk Lăk, măi rơndeh mut tàm ƀòn Ea Mắp. Bi jòi tus hìu kra ƀòn ồng Y Lưng Êban, cau geh bơngă pin dờn mờ kung là Cau lam bồ Mpồl lơngăp lơngai rơdăp tăp sèng bơh ƀòn dê, nàng cribơyai broă lơh, gĭt ală bơta rơndăp tăp sèng lài mờ dơ̆ ơm rlô Ngai Sơntờm dà lơgar.

Rlau dùl nam do, ală dơ̆ tìp bè hơ̆ geh lơh sùm. Ờ kơp tus ală tŭ tơngai lơh uă lơm, Trung tá Y Dhăm mờ kra ƀòn ồng Y Lưng lơh sùm dơ̆ tàm yal tơngĭt jơnau nàng di tŭ gĭt ală broă gơlik geh tàm ƀòn. Kra ƀòn ồng Y Lưng yal: “Bi Y Dhăm đềt mềr mờ ƀòn, ngan là bơh tơnơ̆ tŭ tơmŭt bal mờ lơh jăt gơnoar atbồ ƀòn lơgar 2 kâp. Bi sùm mŭt tàm ƀòn gĭt broă gơlik geh, ngan là tàm tiah mpồl bơh cau jat Yàng dê, iăt broă lơh bơh tiah mpồl dê di mờ adat boh lam lah ờ. Tŭ bi lòt sền bè hơ̆ den añ kung lòt bal, pơgồp bal mblàng yal mờ bơto pơlam làng bol”.

Bơh ală dơ̆ tìp mờ cau kra ƀòn, jơnau yal bè rài kis, nùs nhơm bơh làng bol dê geh jun tus mpồl kwang àng sàh. Tŭ geh broă gơlik geh, cau geh bơngă pin dờn bal mờ gơnoar atbồ mờ kwang àng tàm ƀòn lơgar tìp măt, mblàng yal, hòi jà tơn, ala mờ lời ală bơta gơkòl jŏ jòng.

Broă lơh do neh ngui geh cồng nha tàm ƀòn Ea Mắp tàm broă bơsong broă gơrềng tus gah pin dờn jat Yàng. Pơgăp mờ do 7 nam, bàr pe hìu làng bol tus bal broă lơh gah pin dờn jat Yàng ờ hềt dipal mờ jơnau sồr. Kwang àng sàh Quảng Phú pơgồp bal mờ kấp ủy, gơnoar atbồ, kra ƀòn mờ cau geh bơngă pin dờn tìp mat, mblàng yal, bơto pơlam nàng làng bol in git mờ lơh jat di jơnau sồr adat boh lam. Rlau 200 nă cau tơnơ̆ hơ̆ rê wơl lơh jat broă lơh gah pin dờn jat Yàng jat jơnau sồr dê.

Mục sư ồng Y Nuer Bdap, Atbồ Hìu pơrjum Tin Lành Lutheran ƀòn Ea Mắp pà gĭt, gơnoar atbồ mờ mpồl kwang àng sùm cribơyai, bơto pơlam nàng ală broă lơh geh lơh jat di mờ jơnau sồr. Tŭ do, broă lơh "Dòn jat Yàng kơ̆ kơnhăp - ƀòn lơgar ring lơngai" gam geh lam lơh tàm ƀòn, wèt tus bơt bơtàu mpồl bơtiàn cau jat Yàng tam klăc bal, kis niam rài kis, niam gùng Yàng, lơh jat adat boh lam mờ tus bal sền gàr lơngăp lơngai. "Làng bol jăt Yàng chờ hờp ngan tŭ geh dờp ngan ngồn, geh tơrgùm lơh pơrjum tàm dùl anih. Tơl nă cau sùm hòi jà, tàm tơngkah bal mờ gơ̆p iăt jat jơnau đơng lam, bơto pơlam bơh gơnoar atbồ dê, tơryang tơryồng lơh sa kơ̆ kơl jăp rài kis. Tŭ broă lơh "Dòn jat Yàng kơ̆ kơnhăp, ƀòn lơgar lơngăp lơngai" geh tơlik mat, làng bol geh tìp tơn, rềp mềr mờ ală kấp gơnoar atbồ bơh sàh tus càr. Làng bol jăt Yàng iang nùs ngan".

Tơnơ̆ tơmŭt bal, sàh Quảng Phú (càr Dăk Lăk) geh 37 thôn, ƀòn mờ mờr 62 rơbô nă làng bol, tàm hơ̆ geh 9 ƀòn uă ngan là kòn cau Rơđê ơm kis. Ù tiah dờng ơnàng, làng bol ơm kis li la, broă lơh pin dờn,jăt Yàng li la uă lơh broă gàr niam lơngăp lơngai rơndăp tăp sèng tàm ƀòn lơgar sồr kwang bàng pal git loh ù tiah mờ git rài kis mpồl bơtiàn dê.

Là kòn cau Rơđê, geh bơto bơtê broă lơh sền gàr lơngăp lơngai, Trung tá Y Dhăm Byă geh bơta ƀuơn bè dà đơs mờ gĭt wă bơhiàn, ờ mờng bơh yau dê. Nàng gĭt nền ù tiah mờ bơsong broă bơh kâp hơđơm, bi sùm lòt tus tơl thôn, ƀòn, tìp mat làng bol, cau kra ƀòn, cau geh bơngă pin dờn nàng iăt mờ jòi gĭt jơnau bơh tài gơlik geh broă hơ̆. Trung tá Y Dhăm Byă pà git, bơh ală jơnau yal tơn hơ̆, mpồl kwang àng sàh gơtùi rơcăng lài bơsong ală broă gơlik geh tơn bơh tàm ƀòn lơgar. “He pal sùm rềp làng bol, iăt kơno ală jơnau kơ̆p kờñ, bơta kơ̆p kờñ bơh làng bol dê, mơkung là cau mblàng wơl ală tơngume, gùng dà broă lơh nền bơh kâp hơđang dê nàng làng bol in gĭt wă, gĭt mờ lơh di ală jơnau cih bơh adat boh lam dê. He kung pal rềp mềl, lùp còp, tàm bơyai jơnau yal tơngĭt mờ ală cau geh bơngă pin dờn, cau kra ƀòn, cau duh broă Yàng nàng khi in gĭt, wă mờ bơh hơ̆ lam lơh mblàng yal tus tơl nă làng bol lơh jăt niam rơlao”.

Tàm ală ƀòn lơgar geh rài kis niam chài, pin dờn jat Yàng uă, gàr lơngăp lơngai sơn đờm bơh bơta rềp mềr mờ pin dờn. Mờ Trung tá Y Dhăm Byă, hơ̆ là ală dơ̆ lòt tàm ƀòn, tìp mat mờ kra ƀòn, cau geh bơngă pin dờn, iăt kơno làng bol nàng di tŭ gĭt mờ bơsong ală broă bơh tàm ƀòn lơgar. Ală broă lơh ƀuơn ngan hơ̆ pơgồp bal tàm broă tơmù ƀà bơta ngài đah kwang bàng mờ làng bol. Rùp hin cau kwang bàng geh gơ jal tŭ ơm rlô klo ngai lòt tus hìu cau kra ƀòn kung là dùl broă bơsram mờ lơh jăt Wa Hồ: rềp làng bol, bal mờ ƀòn lơgar, nàng gàr ring lơngai bơh tơl ƀòn lơgar dê.