Jat Jơnau lơh nền bơh Chính phủ dê sồ 66/2025, càr Gia Lai geh tam pà rlau 1 rơbô 400 tấn phe ai rlau 24 rơbô nă kơnòm bơsram, cau bơsram gơwèt mpồl cau dờp bơta dong kờl mpồl bơtiàn dê.

Cau dờp geh uă ngan là kơnòm bơsram kấp 1, kấp 2 mờ kấp 3 gam bơsram tàm tiah làng bol jơi bơtiàn dồ ết nă cau mờ tiah kơh bơnơm, tiah kal ke uă ngan, tiah ù bràs rềp kềng gah dà lềng, jat kềng gah dà lềng mờ bồt bơlào, tiah kal ke, ờ gơtùi rê tàm ngai.

Broă lơh dong kờl do kung ngui gơwèt mờ kơnòm bơsram jơi bơtiàn dồ ết nă cau, kơnòm bơsram gơwèt hìu bơnhă rƀah, hìu bơnhă pa lik klàs rƀah mờ bàr pe nă cau dờp bơta dong kờl mpồl bơtiàn dê bè kòn cau ling chơ̆t màng, kòn cau ling sồt să, cau ling kòp tê jê să, kơnòm bơsram kuĕt kơlte.

Gơwèt mờ cau bơsram tàm ală Anih bơto bơtê broă lơh – Bơto bơtê sùm, broă lơh dong kờl ngui ai ală cau gơwèt mpồl cau dờp bơta dong kờl mpồl bơtiàn dê, hìu bơnhă rƀah, hìu bơnhă pa lik klàs rƀah, làng bol jơi bơtiàn dồ ết nă cau tàm tiah kal ke uă ngan halà geh bơta ơm ngài bơh hìu tus anih tờm dê bơh 10 kơi sồ rlau hơđang.

Bơdìh mờ hơ̆, lơh jat Jơnau lơh nền bơh Chính phủ dê sồ 188/2026, càr Gia Lai geh pà tai rlau 291 tấn phe dong kờl rlau 6 rơbô 800 nă kơnòm bơsram in. Tàm khà do, rlau 4 rơbô 200 nă kơnòm bơsram ơm sa klo ngai geh dong kờl rlau 136 tấn phê, rlau 2 rơbô 500 nă kơnòm bơsram ơm sa bĭc tơn geh dong kờl rlau 155 tấn.

Ală kơnòm bơsram do gam jat bơsram tàm 7 hìu bơsram 2 kấp tàm tiah nhàr lơgar, geh ală hìu bơsram tàm ală sàh:  Ia O, Ia Chia, Ia Mơ, Ia Púch, Ia Nan mờ Ia Dom.

Anih duh broă Làng bol càr Gia Lai jàu Chi kụk Ơn prap Dà lơgar tiah 10 jun pơndiang, gàr tơl khà mờ bơta bơkah niam tus ală tiah jàu dờp tàm anih tờm ală sàh, sơnah ƀòn dê. Broă jàu dờp pal lơh sir lài mờ ngai 30 nhai 9.

Sờh Bơto bơtê mờ Bơsram geh jàu lơh anih sơn rờp, pơgồp bal mờ Anih duh broă Làng bol ală sàh, sơnah ƀòn mờ ală mpồl lơh broă geh gơrềng dờp, tam jàu phe di tŭ, di cau.

Broă dong kờl pơgồp bơnah gàr tơl ală bơta bơsram sră, ơm kis pah ngai ai kơnòm bơsram mờ cau bơsram geh rài kis kal ke in, ngan là tàm ală tiah sar lơgar ngài, tiah nhàr lơgar; bơh hơ̆ dong ală oh iang nùs lòt bơsram tàm nam bơsram pa.