Bơh hơ̆, tàm nam do tơn, ƀòn lơgar rơ̆p lơh jăt rơndăp, kơ̆ kơl jăp làng bol ơm kis ai 1 rbô 133 hìu tàm ală kơnhoàl ù tiah geh pơhìn trồ tiah lơh aniai, gơguh 153 hìu pơndrờm mờ broă rơndăp lơh bơh chờm. Broă tam gơl wơl do nàng kờñ lơh mhar ntrờn làng bol lik bơh tiah tơrlah, ngơr bam jrô dà tih tus tiah ơm niam lơngăp lơngai. Ală ƀòn lơgar geh lơh mhar tơngai pơrgon lơh, geh: Rơndăp broă lơh ntrờn ơm kis pa tiah trồ tiah lơh aniai thôn Trà Cong, sàh An Hoà; Rơndăp broă lơh ntrờn ơm kis wơl tiah trồ tiah lơh aniai tơrgùm bal thôn Sông Ba, sàh Ia Rsai mờ Rơndăp broă lơh ntrờn ơm kis pa jal mhar tiah tơrlah bơnơm Gành, thôn Xuân An, sàh Đề Gi.

Bơh tŭ do tus nam 2030, càr Gia Lai rơndăp, kơ̆ kơl jăp làng bol ơm kis lik bơh tiah trồ tiah lơh aniai là 1 rbô 858 hìu tàm 13 rơndăp broă lơh ntrờn ơm kis pa tơrgùm bal mờ 3 broă rơndăp lơh tàm bơrlŭ bal. Kờp jơh jơnau kờñ priă tă lơh là rlau 1 rbô 87 tơmàn đong, tàm hơ̆ rlau 207 tơmàn đong dong kờl tơn ai làng bol in bè hìu ơm, ntrờn, bơtàu tơngguh lơh sa, phan sa mờ dà ngui sa.