Pa lơh gơs sră nggal tàm anih lơh broă dùl mpồng tềng hìu lơh broă Ủy ƀan Ñân zân (UɃÑZ) xã Ea Tiêu, kơnhoàl Cư̆ Kuiñ, càr Dăk Lăk, bi Trần Vũ Hải Đăng pà git, bi mìng roh di pơgăp 30 phút ai broă lơh sră nggal: “Ngai do añ tus xã Ea Tiêu nàng lơh sră dờp ờ hềt bao, den añ gŏ kwang bàng, kông ñân, viên cứk lơh broă tàm do dong dong kờl jơh nùs ngan, bơto sồr loh làng cih ală jơnau bè lơi, bơsong sră nggal mhar nàng làng bol ờ roh tơngai tŭ tus lơh sră nggal”.

Jăt khà kờp bơh UɃÑZ kơnhoàl Cư̆ Kuiñ yal, pah nam tơl xã tàm kơnhoàl dờp geh bơh 13 rơbô tus 16 rơbô pang sră. Nàng ai geh bơta ƀuơn mpồl lơh broă, cau dùl nă să in tŭ tus lơh sră nggal, ală xã neh lir loh làng Gah broă lơh sră nggal gơwèt gơnoar gơtùi bơsong tềng anih lir sră nggal hìu lơh broă anih lơh broă bal mờ tàm pang điện tử xã dê; tam pà ală kwang bàng gơwèt ală bơnah broă lơh tờm mờ kwang đơng lam xã lơh jăt kơnòl tàm Gah broă dờp mờ tơrwơl cồng nha lơh sră nggal. Ală xã kung ngui broă lơh “Gơguh niam sră nggal” pơgồp bal mờ “Ngai dơ̆ 5 làng bol ờ cih sră, gơnoar atbồ ờ pơrgon” cèng geh ală cồng nha niam. Ồng Nguyễn Kim May, Phó Ƀí thư, Củ tịc UɃÑZ xã Ea Ktur, kơnhoàl Cư̆ Kiuñ pà git: “Bol añ neh crăp camera sền gròi kông cứk tàm bơnah lơh broă dùl mpồng kung bè git geh ală bơta làng bol tus lơh sră nggal, bơh tŭ hơ̆ tơnguh kơnòl kwang bàng, kông cứk tàm anih lơh broă. Geh ờ uă broă bơsong sră nggal bol añ sùm geh lơh ndrờm bal, ai tơl bơta niam ngan, gàr niam bơta nàng làng bol in tàm broă lơh sră nggal, hơ̆ là broă bè tơngai bol añ tơmù jăt mờ kơrnoăt geh ai bơh adăt boh lam dê, ai tơl bơta niam nàng làng bol in den bol añ lơh ngan bơsong...”.

Ồng Võ Tấn Huy, Củ tịc UɃÑZ kơnhoàl Cư̆ Kuiñ pà git, nàng bơ̆t bơtàu broă lơh sră nggal jăk chài, pràn kơl dang, geh cồng nha, UɃÑZ kơnhoàl neh tơlik broă rơndăp lơh bè lơh niam wơl sră nggal dà lơgar bơh tơl nam dê. Jăt tơngai, UɃÑZ kơnhoàl bơyai lơh tơn jơh ing, pơrjum tam jào broă lơh, lơh niam sră nggal nàng lơh jăt broă lơh, broă rơndăp lơh, sền wơl ală cồng nha neh lơh geh, ală broă lơh gam ờ pràn nàng ai geh ală gùng dà broă lơh, kơnòl broă di pal tàm tơngai pơn jăt tai. Bal mờ hơ̆, kơnhoàl lơh jăt broă kĭ hơ bal lơh jăt kơnòl gơwèt mờ Củ tịc UɃÑZ ală xã tàm kơnhoàl. Kơnhoàl kung bơ̆t bơtàu broă rơndăp lơh ngui Zalo nàng lơh anih lơh broă bal đah làng bol mờ gơnoar atbồ kơnhoàl... Ồng Võ Tấn Huy pà git: “Dùl tàm ală tơngu me mờ kơnhoàl tơrgùm sền gròi ngan hơ̆ là broă lơh niam sră nggal dà lơgar, lơh niam broă bơcri priă blơi ală bơta phan lơh broă bơh kơnoàl tus xã jăt broă lơh ƀuơn, lơh pa ai làng bol in. Mờ pơgồp bal mờ Ƀưu cíñ viễn thông nàng ai geh ală tơngu me lơh broă nàng lơh jăt ală broă lơh bơh điện thoại at tê. Kơnhoàl kung neh đơng lam tàm broă lơh jăt broă dong kờl kơnòl broă lơh, bơ̆t bơtàu mpồl kwang bàng lơh broă geh bơta ngăc ngar, jơh nùs, geh kơnòl tàm broă lơh, tàm tơngu me ală broă lơh bơh broă lơh niam sră nggal den kơnòl bơh tơngu me tờm là wèt tus gơnoar atbồ điện tử, cíñ phủ sồ, nàng lơh niam broă do hơ̆ là broă tam gơl sồ”.

Tàm tơngai do, Broă lơh niam sră nggal càr Dăk Lăk dê geh lơh tơl ală bơta tàm 06 tơngu me bơh Broă lơh tơrgùm bal lơh niam sră nggal dà lơgar tơngai bơh nam 2021 tus 2030 bơh Cíñ phủ ai. Càr neh geh uă tam gơl pa tàm broă đơng lam, lam lơh nàng tơnguh uă bơta di nùs bơh làng bol, mpồl lơh sa kă bro dê. Tàm hơ̆ uă ngan là broă lơh pràn broă lơh jăt broă drơng ala dà lơgar tàm bơta 3, bơta 4. Tàm nam 2022, càr Dăk Lăk neh gơguh 32 khà bè khà gŏ di nùs bơh làng bol dê, ơm dơ̆ 27 tàm gùt lơgar. Nàng broă lơh niam sră nggal geh cồng nha niam tàm tơngai tus, ồng Nguyễn Tuấn Hà, Phó Củ tịc UɃÑZ càr Dăk Lăk pà git: “Mpồl kông cứk, tàm hơ̆ uă ngan là cau lam bồ pal bơceh pa, bơsong pràn broă lơh. Dơ̆ bàr tai là kwang bàng tàm Mpồl đơng lam tơnguh broă lùp sền, sền gròi broă lơh niam sră nggal, bơsong sră nggal, lơh jăt niam kơrnoăt pal jăt, bơsong broă gam ờ pràn. Dơ̆ pe pơn jăt tai sền wơl nàng koh tơmù, lơh niam jơh sră nggal, tam gơl pa broă lơh jăt kơrnoăt dùl mpồng, dùl mpồng pơgồp bal tàm broă bơsong sră nggal di jăt mờ broă tơnguh uă bơta niam broă lơh”.

Mờ broă lơh jăt ndrờm bal ală broă lơh, bal mờ ală broă lơh bơceh pa, broă lơh tam gơl niam wơl sră nggal tàm càr Dăk Lăk neh geh ală broă lơh gơguh niam; bơh tŭ hơ̆ ai geh bơta ƀuơn, cèng geh bơta di nùs ai mpồl lơh broă, cau dùl nă să in tŭ tus lơh broă, pơgồp bal tàm broă bơ̆t bơtàu gah lơh sră nggal jăk chài, lơh pa, lơh pràn, lơh geh cồng nha, di pal mờ jơnau kờñ, kơnòl broă tàm bơta pa dê.