Sờh Lơh sơnơm càr Dăk Lăk neh sồr jơh ală Hìu sơnơm mờ Anih kham sơm kòp gơ wèt 102 sàh, sơnah ƀòn lam lơh broă rơndap lơh kham pràn kơldang să jan jat tơngai pơrgon, kham sac rơ wah ờ sa priă ai làng bol in. Tàm hơ̆, lam lơh tơrlòng lài tàm 4 sàh, sơnah ƀòn là Tân An, Tuy Hòa, ală sàh Đồng Xuân mờ Krông Bông; 98 sàh, sơnah ƀòn gam wơl rơp dơ̆ lĕ bal lam lơh bơh ngai 01/7 tus do.

Tus tŭ do, mờr 500 nă làng bol neh geh kham wil tơl jat jơnau pơlam bơh Ƀộ Lơh sơnơm dê mờ broă lơh sac rơ wah kung gam pơn jat tai geh lơh mờ git nđờ rbô nă cau. Càr Dăk Lăk tơnơ̆ tŭ tơmut bal geh 3 tơlak 340 rbô nă làng bol. Tơngai bơh nam 2026 tus nam 2030, càr Dăk Lăk kờp dŭ ai 1 rbô tơmàn đong pah nam nàng kham sac rơ wah ờ sa priă ai làng bol in. Is ồn nam 2026, càr tam pà 400 tơmàn đong ai 102 hìu sơnơm sàh, sơnah ƀòn in mờ khà tă mờr 350 rbô đong dùl nă cau dùl dơ̆ kham. Bơh 2 poh lam lơh tơrlòng lài, kơnờm rơcang lài phan bơna, cau lơh broă, lơh pràn broă lơh mblàng yal jơnau bal mờ bơta ring bal dùl nùs, lơh jat jơh nùs làng bol dê, broă lơh jat Jơnau lơh nền tàm pơrjum bơh sơn rờp neh cih dờp ală cồng nha niam ngan, lơh gơlik bơnàng jă nàng lam lơh dơ̆ lĕ bal tàm gùt càr tàm tơngai tus.