Jat Sờh Bơt bơtàu càr Dăk Lăk, mpồl lơh broă dờp lơh rơndăp broă lơh, 100 nơm hìu pơrjum mpồl bơtiàn pơgồp bal rcang gàr lài drơng mờ dà tih dà lìu tàm ală thôn, ƀòn tàm ù tiah càr dê geh dùl ròt bal sơnđờm mut lơh bơh ngai 27/6, tàm 27 thôn, ƀòn gơwèt ală sàh, sơnah ƀòn, mờ kờp jơh priă bơcri lơh mờr 171 tơmàn đong. Tơl nơm hìu geh lơh tàm bă ù ơnàng 220 thơk vuông, kờp jơh bă ù ngui rlau 440 thơk vuông, geh 2 cờn, lơh bơnàng bê tông lòs, jrong lòs kơ̆ mờ bơnàng pleh dà tih dà lìu.

Tŭ ai mut ngui, tơl nơm hìu geh bơta pràn lơh geh jơnau kờñ ntrờn tiah ơm kis, ơm kis ing tơrgùm bal ai pơgăp 200 nă cau tàm tŭ digơlan gơlik geh trồ tiah lơh aniai jal mhar. Tus tŭ do, 98 nơm hìu neh lơh sir tuh bê tông, bơnàng hìu, rơkàng hìu; ală bơta gam wơl bè tri kơlik hìu, lă bơnàng, crăp phan bơna.... gam geh gơ jal ngan lơh sir, crăp rcang sền sơwì, ai mut ngui. 2 nơm hìu gam wơl kung gam geh lơh mhar tŭ tơngai, pơn đơl pràn lơh ngan lơh sir jat tŭ tơngai geh ai.

Ồng Hà Lương Đức, Phó Bí thư Duh broă sùm Đảng ủy sàh Hòa Mỹ, càr Dăk Lăk, pà gĭt, tiah do geh Anih duh broă Làng bol càr ai priă tă lơh 9 nơm hìu pơrjum mpồl bơtiàn pơgồp bal rcang gàr lài drơng mờ dà tih dà lìu. Tus tŭ do, ală broă lơh bơt bơtàu neh lơh sir rlau 98% mpồl broă crăp, rcang sền sơ wì di tŭ drơng broă làng bol in tŭ kàl mìu càl rơbŭt dờng neh sơnđờm. “Ală broă lơh pleh dà tih dà lìu jat gùng dà broă lơh bal pal lơh sir lài mờ ngai 15/9. Jat tàm nùs nhơm hơ̆, Anih duh broă Làng bol sàh gam pơgồp bal mờ cau tờm dờp lơh, ală mpồl lơh broă mut lơh mhar ngan lơh mhar tŭ tơngai mut lơh nàng lơh sir ală bơnah broă gam wơl bơh jơh ală broă lơh dê jat tŭ tơngai mut lơh bal, lơh mbè lơi ai mut ngui nàng làng bol in rcang gàr drơng mờ trồ tiah lơh aniai”.

Broă bơcri priă lơh ală hìu pơrjum mpồl bơtiàn pơgồp bal mờ rcang gàr lài drơng mờ dà tih dà lìu nàng kờñ lơh ngan ngồn gùng dà broă lơh bơh Đảng, Dà lơgar dê tàm broă sơlơ tơnguh tai bơta pràn jak rcang gàr lài drơng mờ trồ tiah lơh aniai, gàr niam lơngăp lơngai màng kis mờ phan bơna bơh làng bol dê tềng đap ală bơta gơlik geh ngai sơlơ kal ke bơh tam gơl nhơm trồ tiah dê. Mờ ală broă lơh bơt bơtàu kung pơgồp bơnah lơh sir ală phan bơna bơt bơtàu tàm ƀòn lơgar, lơh geh ù tiah pơrjum mpồl bơtiàn mờ drơng rài kis làng bol in tàm ală thôn, ƀòn tàm ù tiah càr Dăk Lăk dê.