Ală ngai do, oh Vũ Thị Giang, kơnòm bơsram ơdŭ 8, Hìu bơsram kâp 2 Lê Quý Đôn, sàh Ea Bung, càr Dăk Lăk hờn chờ ngan rơcang lòt bơsram wơl. Oh pà git: “Pơgru bal mờ mpồl đơng lam hìu bơsram, ală kâp sền gròi, pơn jờng oh uă ngan bè phan bơna mờ nùs nhơm. Hìu bơsram den ai jồm sră măi, tơrmù priă tă bơsong tài hìu bơnhă kal ke. Tàm nam bơsram ơdŭ 6 oh geh bơsram dimơ đau, ơdŭ 7 den oh geh kơnòm bơsram jak. Oh kờñ pơn đơl rlau tai nàng geh kơnòm bơsram jak ngan”.

Ờ mìng gròi sền ai ală kơnòm bơsram geh rài kis kal ke in, ală ƀòn lơgar càr Dăk Lăk dê kung tơrgùm lơh niam wơl, lơh pa phan bơna, gàr tơl ală bơta pal geh drơng broă bơto bơtê mờ bơsram in. Bơh sền wơl hìu bơsram, ơdŭ bơsram, sàh Krông Ana neh tă ai rlau 11 tơmàn 300 tơlak đong nàng bơcri lơh 16 broă lơh tàm nam bơsram do. Ồng Phan Thanh Việt - Phó Chủ tịch Anih duh broă Làng bol sàh Krông Ana pà git:

“Bàr pe broă lơh gam geh jal mhar lơh gơs nàng di tŭ drơng nam bơsram pa in. Bal mờ lơh niam wơl, lơh niam ơdŭ bơsram, hìu bơsram, ƀòn lơgar sồr ală hìu bơsram rơcang lài sèn swì, koh chi, klah ntê nàng kờñ gàr niam lơngăp lơngai tàm tơngai mìu càl rbut dờng”.

Gơ wèt mờ ală sàh tiah nhàr lơgar, jơnau sồr geh ai tơlik ờ mìng là lơh sir hìu bơsram, ơdŭ bơsram mờ gam pal gơ dờp mờ broă rơndap tap sèng wơl ală hìu bơsram. Tàm sàh Ia Lốp, bơh 5 hìu bơsram lài do, ƀòn lơgar rơndap wơl gam 2 hìu bơsram. Tàm hơ̆, Hìu bơsram ơm sa bic tơn kâp 1 mờ kâp 2 Ia Lốp geh tơng gơs ngai 20/7 mờ neh lơh sir broă rơndap tap sèng kwang bàng, pơgru bal mờ broă lơh rơ wah kơnòm bơsram. Ồng Bùi Tiến Hoạt - Phó Chủ tịch Anih duh broă Làng bol sàh Ia Lốp yal:

“Tus tŭ do den hìu bơsram, broă rơndap lơh tàm dơlam kung neh lam lơh wil tơl, crơng gơs ală jơnum gah môn bơsram, rơndap tap sèng ơdŭ hơ̆ sồng broă lơh rơ wah kơnòm bơsram ndrờm neh lơh sir jơh lơm. Tŭ do, bol hi bal mờ Mpồl atbồ rơndap broă lơh mờ ală cau tờm bơcri priă jal mhar rơcang ală broă lơh, lơh bè lơi nàng di tàm ngai 30 nhai 8 rơp jàu wơl hìu bơsram nàng mut tàm nam bơsram pa”.

Bal mờ ală tam gơl bè ală hìu bơsram, mpồl cau pơgru kung ơm tềng đap jơnau sồr gơ dờp mờ ală kơnòl broă pa. Ồng Phạm Thế Trường - Phó Lam bồ Hìu bơsram kâp 2 Buôn Trấp, sàh Krông Ana pà git:

“Hìu bơsram neh rơndap ai pơgru in bơto pơlam is kung bè tus bal ală dơ̆ bơto pơlam mờng chài lơh broă bơh Sờh mờ Ƀộ Bơto bơtê mờ Bơsram dê. Is ồn, hìu bơsram pơn jờng cau pơgru sơlơ tus bal ală ơdŭ bơsram bè tam gơl sồ kung bè rơcang gơ dờp mờ jơnau bơto bơsram pa”.

Bơta rơcang ndrờm bal bơh phan bơna, mpồl cau pơgru tus ală gùng dà broă lơh dong kờl gam lơh gơlik bơta tờm nàng nam bơsram pa tàm càr Dăk Lăk sơn đờm tàm bơta rơcang lài, lơngăp lơngai mờ crăp rơcang nàng kơnòm bơsram tàm jơh bal tiah ƀuơn mờ tiah kal ke geh tai bơta niam nàng bơsram sră, pơlam tàp mờ dờng pràn.