Jat Ală jơnau neh lơh nền tơn jơh hìu lơh ing, hìu ồm sềt ñhăt dà mìu bơh Cíñ phủ dê, càr Dăk lăk rơ̆p dong kờl hìu ơm ai 4 rơbô 285 hìu bơnhă, mờ kờp jơh priă tă lơh mờr 343 tơmàn đong. Bơdìh hơ̆, càr Dăk Lăk kung rơ̆p dong kờl lơh niam wơl hìu ơm ai rlau 1 rơbô 120 hìu bơnhă in. Ală jơnau neh lơh nền bơh Kwang àng càr Dăk Lăk đơng lam, pơgồp bal mờ gơnoar atbồ ală tiah lơh jat bơh bồ nhai 3 mờ lơh sir tàm nggùl nhai 8 nam 2025.

Tơnơ̆ rlau 2 poh lam lơh Ală jơnau neh lơh nền tơn jơh hìu lơh ing, hìu ồm sèt ñhăt dà mìu, càr Dăk Lăk neh sơnđờm mut lơh rlau 1 rơbô nơm hìu, kờp dŭ lơh sir tàm nhai 4 tus do. Ală broă lơh gam wơl rơ̆p pơn jat tai lơh pràn mờ lơh sir lài mờ ngai 15/8/2025. Krông Bông là dùl tàm ală kơnhoàl tiah sar lơgar ngài rƀah ngan rlau jơh càr Dăk Lăk dê. Dơ̆ do kơnhoàl geh 513 hìu bơnhă kal ke bè hìu ơm geh dong kờl lơh pa, mờ kờp jơh priă tă lơh rlau 41 tơmàn đong, mờ 96 hìu bơnhă ndai geh dong kờl 2 tơmàn 880 tơlak đong nàng lơh niam wơl hìu.